මෙරට ක්‍රීඩාවට ජාත්‍යන්තර තලයේ පදක්කම් වැඩි වශයෙන් දායාද කරන ක්‍රීඩාව ලෙස මලල ක්‍රීඩාව හැදින්විය හැක. පසුගිය වසර කිහිපයේ දී මෙරට මලල ක්‍රීඩාව දැඩි අගාධයකට වැටී තිබුනත්, අතීතය දෙස බලන කල ආසියානු තලයේ මෙන්ම ලෝක මලල ක්‍රීඩා පිටියේ ද මෙරට ක්‍රීඩක ක්‍රීඩිකාවන් දැක්වූ දස්කම් ඉහළින්ම සටහන්ව ඇත.
2019 දකුණු ආසියානු මලල ක්‍රීඩා උළෙලෙන් පසුව තරමක් පසුබෑමකට ලක් වූ මෙරට මලල ක්‍රීඩාව නැවත හිස එසවීමක් පෙන්නුම් කරන්නට වූ අතර යුපුන් අබේකෝන් වැනි ක්‍රීඩකයන් දැක්වූ දස්කම් මෙන්ම මෙරට යොවුන් ක්‍රීඩකයන් දිගින් දිගටම දක්වන දස්කම් නිසාවෙන් නැවත වතාවක් මෙරට මලල ක්‍රීඩාව පිළිබඳව දෙස් විදෙස් බොහෝ දෙනාගේ අවධානය යොමුව ඇත.
මෙවර Photo Story ලිපිය වෙන් වන්නේ මෙරට මලල ක්‍රීඩා ඉතිහාසයේ මේ දක්වා දක්නට ලැබුණු අමතක නොවන තරග කිහිපයක් අතරතුර කැමරා කාචයේ සටහන් වූ සේයා රූ වෙනුවෙනි.
1. කුළුඳුල් ඔලිම්පික් පදක්කම ගෙන ආ ඩන්කන් වයිට්
14th August 1948: Duncan White of Ceylon fixes his starting blocks to the track at the 1948 London Olympics. Original Publication: Picture Post - 4582 - Fastest Men On Earth - pub. 1948 (Photo by Picture Post/Hulton Archive/Getty Images)
මෙරට නියෝජනය කරමින් 1498 වසරේ ලන්ඩන් නුවර දී පැවති ගිම්හාන ඔලිම්පික් උළෙලට සහභාගි වූ ඩන්කන් වයිට් මීටර් 400 කඩුලු පැනීම ඉසව්ව තත්පර 51.8ක කාලයකින් දෙවැන්නා ලෙස නිමා කරමින් මෙරටට මුල්ම ඔලිම්පික් පදක්කම දිනා දීමට සමත් වූ අවස්ථාව.
2. පරාජයෙන් ජයග්‍රහණය ලැබූ කරුණානන්ද
1964 වසරේ ජපානයේ දී පැවති ඔලිම්පික් උළෙලට සහභාගි වූ රණතුංග කරුණානන්ද එහි මීටර් 10,000 ඉසව්වට සහභාගි වෙමින් මද අසනීප තත්වයක් යටතේ ද තරග වදිමින් අනෙකුත් තරගකරුවන් තරගය නිමා කිරීමෙන් පසුව ද තරග කර ඉසව්ව සාර්ථකව නිමා කරන ලදි.
තරගය අවසන් ක්‍රීඩකයා ලෙස තරගය නිමා කළ ද ඔහුගේ එම ක්‍රියාව නිසා ලොව පුරා සියල්ලන්ම ඔහුට සිය ප්‍රසාදය පුද කරන්නට වූ අතර ජපාන රජය විසින් ඔහුව වීරයෙකු ලෙස සලකමින් ඔහුගේ මෙම ක්‍රියාව ජපාන පාසල් පෙළ පොත්වලට පවා එක්කිරීමට කටයුතු කරන ලදි.
3. පොදුරාජ්‍ය මණ්ඩලීය පදක්කම් සිහිනය ජය ගත් සුගත්
1998 වසරේ මැලේසියාවේ දී පැවති පොදුරාජ්‍ය මණ්ඩලීය ක්‍රීඩා උළෙල නියෝජනය කළ සුගත් තිලකරත්න එහි මීටර් 400 ඉසව්ව තත්පර 44.64ක කාලයකින් අවසන් කරමින් ලෝකඩ පදක්කම දිනා ගැනීමට සමත් විය.
4. ආසියානු වාර්තාවක් ගෙන ආ කෙටි දුර ශූරිය
1998 වසරේ පැවති 13වන ආසියානු ක්‍රීඩා උළෙලට සහභාගි වූ ලාංකික මලල ක්‍රීඩිකා දමයන්ති දර්ශා මීටර් 200 ඉසව්ව තත්පර 22.48ක කාලයකින් අවසන් කරමින් ආසියානු තරග වාර්තාවක් ද සමඟින් ජය ගත් අවස්ථාව.
5. ඔලිම්පික් සිහිනය ජයගත් ආසියාවේ කළු වෙළබ
ශ්‍රී ලංකාව නියෝජනය කරමින් 2000 ගිම්හාන ඔලිම්පික් උළෙලේ මීටර් 200 ඉසව්වට සහභාගි වූ මලල ක්‍රීඩිකා සුසන්තිකා ජයසිංහ එම තරගය තත්පර 22.45ක කාලයකින් අවසන් කරමින් රිදී පදක්කම දිනා ගත් අවස්ථාව.
6. දකුණු ආසියාවේ වාර්තා තැබූ රොහාන්
2004 වසරේ පැවති 09 වැනි දකුණු ආසියානු ක්‍රීඩා උළෙලට සහභාගි වූ රොහාන් ප්‍රදීප් කුමාර එහි මීටර් 200 ඉසව්ව තත්පර 20.99ක කාලයකින් අවසන් කරමින් එම ඉසව්වේ දකුණු ආසියානු වාර්තාව පිහිටුවමින් ජය ගැනීමට සමත් විය.
7. ජාත්‍යන්තර යොවුන් පිටිය කැළබූ කෙටිදුර ශූරයා
2008 වසරේ පැවති පොදුරාජ්‍ය මණ්ඩලීය යොවුන් ක්‍රීඩා උළෙලට සහභාගි වූ කෙටි දුර ධාවන ශූර ශෙහාන් අඹේපිටිය එහි මීටර් 100 (තත් 10.31) ඉසව්ව නව තරගාවලි වාර්තාවක් ද සමඟින් ජය ගැනීමට සමත් විය. (එයට අමතරව මීටර් 200 (තත් 21.27) සහ 100X4 ඉසව්වල රන් පදක්කම් දිනා ගැනීමට ද ඔහු සමත් විය)
8. යොවුන් ඔලිම්පික් සිහිනය සම්පූර්ණ කළ පාරමී
2018 වසරේ පැවති යොවුන් ඔලිම්පික් උළෙල සඳහා ඉදිරිපත් වූ යොවුන් මලල ක්‍රීඩිකා පාරමී වසන්ති එහි මීටර් 2000 බාධක දිවීමේ තරගය තුන්වැන්නා ලෙස අවසන් කරමින් මෙරටට මුල්ම යොවුන් ඔලිම්පික් පදක්කම දිනා දීමට සමත් විය.
9. සියල්ලන් මවිතයට පත්කළ සහය දිවීමේ අවසාන වටය
2019 දකුණු ආසියානු ක්‍රීඩා උළෙලේ කාන්තා මීටර් 400X4 තරගයේ අවසාන වටය තරගවැදි දිල්ෂි කුමාරසිංහ විශාල පසුබෑමක් ද සහිතව යෂ්ටිය ලබා ගනිමින් තරගයේ අවසාන මීටර් 200 තුළ සියල්ලන් අමන්දානන්දයට පත් කළ ධාවනයක් පෙන්නුම් කරමින් රන් පදක්කම දිනා දීමට සමත් වූ අවස්ථාව.
10. දකුණු ආසියාවේ කිරුළ දිනා ගත් යුපුන්
මෙම වසරේ (2020) සැප්තැම්බර් මස ජර්මනියේ පැවති මලල ක්‍රීඩා තරගාවලියකට සහභාගි වූ යුපුන් අබේකෝන් එහි මීටර් 100 තරගය තත්පර 10.16ක කාලයකින් අවසන් කරමින් එම ඉසව්වේ ජාතික මෙන්ම දකුණු ආසියානු වාර්තාව බිඳ හෙළීමට සමත් වූ අවස්ථාව.
මෙම අවස්ථාවලට අමතරව මලල ක්‍රීඩා ඉතිහාසයේ නොමැකෙන සටහන් තැබූ තරග රැසක් මෙරට මලල ක්‍රීඩා ඉතිහාසය දෙස නැවත බැලීමේ දී දැකගැනීමට හැක.
පෙර වසර කිහිපයේ සිදු වූ පසුබෑමෙන් පසුව නැවත වරක් හිස ඔසවමින් සිටින මෙරට මලල ක්‍රීඩාවට අවශ්‍ය නිසි කළමනාකරණය ලබා දීමට බලධාරීන් සමත් වූවහොත් මෙරට මලල ක්‍රීඩාව නැවත වරක් ජාත්‍යන්තර තලයේ ඉහළින්ම රැඳවීමට වැඩි කලක් ගතනොවනු ඇත.
තවත් Photo Story ලිපියක් සමඟින් හමුවෙමු. රැඳී සිටින්න ThePapare.com සමඟින්.
>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
