ධාවන තරගයක ආරම්භය මෙන්ම අවසානය ද ඉතා වැදගත් තැනක්. හොඳ ආරම්භයක් ලබා ගත්තත් එම ආරම්භය අවසාන රේඛාව දක්වා රැගෙන ඒමට නොහැකි වී අවසාන මොහොතේ පරාජයට පත්වීම් බොහොමයක් ධාවන පිටිය තුළ දකින්නට පුළුවන්.
දිගුදුර ධාවන පිටියේ අවසානය එතරම් තරගකාරී වෙන අවස්ථා ඉතා අඩු වූවත් කෙටි දුර ධාවන තරග බොහෝ විට අවසාන රේඛාව දක්වාම තරගකාරී වන්නේ බොහෝ තරගවල අවසාන රේඛාවේ දී ජයග්‍රාහකයා වෙනස් කරමිනි.
මෙවර Photo Story ලිපිය වෙන්වන්නේ ThePapare.com කැමරා කාචයේ සටහන් වූ, ධාවන තරග පිටියේ ක්‍රීඩකයන් අවසාන රේඛාව පසුකරන අවස්ථාවල සේයා රූ වෙනුවෙනි.
1) තියුණු අවසානයක්
2019 වසරේ පැවති ජාතික කනිෂ්ඨ මලල ක්‍රීඩා තරගාවලියේ 16න් පහළ කාන්තා 200m තරගයේ දී, තියුණු සටනකින් පසුව චේශානි බුද්ධියන්ගනී පරාජය කරමින් නුගේගොඩ ලයිසියම් විද්‍යාලයේ දුල්යානා සුළුදාගොඩ අවසාන රේඛාව පසුකරන අවස්ථාව.
2) සාර්ථකව අවසාන රේඛාවට
ශ්‍රි ලංකා මීටර් 5000 ධාවන සහ මීටර් 3000 බාධක දිවීම ඉසව්වේ ජාතික ශූරයා වන ශ්‍රී ලංකා යුද හමුදා කාලතුවක්කු බලකායේ ආර්. එම්. එස්. පුෂ්පකුමාර, නිමා වූ 97 වැනි ජාතික මලල ක්‍රීඩා ශූරතාවලියේ 3000m බාධක දිවීම ඉසව්වේ තරග අවසාන රේඛාව පසුකරන අවස්ථාව.
3) සුපුරුදු රිද්මයෙන් අවසාන රේඛාවට
ශ්‍රී ලංකා දිගුදුර ධාවන ශූරියක් වන හිරුණි විජයරත්න 97 වැනි ජාතික මලල ක්‍රීඩා ශූරතාවලියේ මීටර් 5000 ඉසව්වේ අවසන් රේඛාව ඉතා පහසුවෙන් පසුකර යන අවස්ථාව.
4) වාර්තාගත වේගයකින් අවසානය සනිටුහන් කිරීම
97 වැනි ජාතික මලල ක්‍රීඩා ශූරතාවලියේ 1500m ඉසව්ව නියෝජනය කළ නිමාලි ලියනආරච්චි එම ඉසව්ව මිනිත්තු 04.15.86 වාර්තා ගත කාලයකින් අවසන් කරමින් නව ශ්‍රී ලංකා වාර්තාව පිහිටවූ අවස්ථාව.
5) ජවසම්පන්න ලෙස අවසාන රේඛාව පසුකිරීම
පසුගිය වසරේ පැවති 89 වැනි ශ්‍රීමත් ජෝන් ටාබට් මලල ක්‍රීඩා තරගාවලියේ (ජ්‍යේෂ්ඨ අංශය) 20න් පහළ කාන්තා 200m ඉසව්ව නියෝජනය කළ යොවුන් මලල ක්‍රීඩිකා ශෙලින්ඩා ජැන්සන් ඉතා ජවසම්පන්න ලෙස තරග අවසාන රේඛාව පසුකරන අවස්ථාව.
6) සටන්කාමී අවසානයකින් පසු
89 වැනි ශ්‍රීමත් ජෝන් ටාබට් මලල ක්‍රීඩා තරගාවලියේ 18න් පහළ කාන්තා මීටර් 400X4 සහය දිවීමේ තරගයේ අවසාන අදියරට තරග කළ වළල ඒ. රත්නායක මධ්‍ය විද්‍යාලයේ ක්‍රීඩිකාව ඉතා සටන්කාමී ලෙස අවසාන රේඛාව පසුකිරීමෙන් පසු.
7) දකුණු ආසියානු වාර්තාවක් ගෙන ආ තරග අවසානය
2018 වසරේ පැවති දකුණු ආසියානු කනිෂ්ඨ මලල ක්‍රීඩා තරගාවලියේ පිරිමි මීටර් 400X4 සහය දිවීමේ අවසාන අදියරට තරග වැදුණු යොවුන් ක්‍රීඩක අරුණ දර්ශන විසින් ඉතා සාර්ථක තරග රටාවක් පෙන්නුම් කරමින් දකුණු ආසියානු කනිෂ්ඨ වාර්තාවක් ද සමඟින් තරගයේ අවසාන රේඛාව පසුකළ අවස්ථාව.
8) හදවත මොහොතකට නතර වූ අවසාන රේඛාව
97 වැනි ජාතික මලල ක්‍රීඩා ශූරතාවලියේ 100m ඉසව්වේ අවසන් තරගයේ දී ඉතාම තියුණු සටනකින් පසුව ලාංකික කෙටි දුර ධාවනශූර හිමාෂ ඒෂාන් විසින් තත්පර 0.01ක වාසියක් සමඟින් තරගයේ අවසාන රේඛාව පසුකළ අවස්ථාව.
තවත් Photo Story ලිපියක් සමඟින් හමුවෙමු. රැඳී සිටින්න Thepapare.com සමඟින්.
>> තවත් මලල ක්‍රීඩා පුවත් සඳහා පිවිසෙන්න – මලල ක්‍රීඩා පිටුවට <<
