ජර්මනියේ පැවති International Athletics Meeting Anhalt 2022 මලල ක්‍රීඩා තරගාවලියට සහභාගී වූ ශ්‍රී ලාංකික ක්‍රීඩක යුපුන් අබේකෝන් මීටර් 100 ඉසව්වේ දකුණු ආසියානු වාර්තාව නැවත අලුත් කිරීමට සමත් වුනා.
තරගාවලියේ මීටර් 100 ඉසව්වේ මූලික තරගය තත්පර 10.30ක කාලයකින් දෙවැන්නා ලෙස අවසන් කළ යුපුන් අවසන් තරගය තත්පර 10.06 (-0.2) ක කාලයකින් අවසන් කරමින් පළමු ස්ථානය දිනා ගත්තා.
එම වාර්තාගත කාලය සමඟින් යුපුන් හට පසුගිය වසරේ මීටර් 100 ඉසව්ව තත්පර 10.15ක කාලයකින් අවසන් කරමින් ඔහු විසින්ම පිහිටුවා තිබූ මීටර් 100 ඉසව්වේ දකුණු ආසියානු සහ ශ්‍රී ලංකා වාර්තාව නැවත බිඳ හෙළීමට හැකි වීම විශේෂත්වයක්.
- කල් ගිය ජාතික කනිෂ්ඨ මලල ක්‍රීඩා ශූරතාවය නැවතති
- යුපුන් තමන්ගේම වාර්තාවක් අලුත් කරයි
- යුපුන් 200m දකුණු ආසියානු වාර්තාව බිඳ හෙළයි
- යුපුන්ගේ ජයග්‍රහණ මල්ලට තවත් ජාත්‍යන්තර ජයක්
මෙවර තරග වාරය ආරම්භයේ සිටම සුවිශේෂී දස්කම් දැක්වීමට සමත් වූ යුපුන් මීට දින කිහිපයකට පෙර මීටර් 100 ඉසව්ව තත්පර 10.04 (+2.4) ක කාලයකින් අවසන් කරමින් ඕනෑම තත්වයක් යටතේ දකුණු ආසියානු ක්‍රීඩකයෙක් වාර්තා කළ හොඳම කාලය වාර්තා කිරීමට සමත් වුනා.
එමෙන්ම මීටර් 200 ඉසව්ව තත්පර 20.36ක කාලයකින් අවසන් කරමින් එහි දකුණු ආසියානු වාර්තාව සහ මීටර් 150 ඉසව්ව තත්පර 15.16ක කාලයකින් අවසන් කරමින් එහි ආසියානු වාර්තාව තමන් සතුකර ගැනීමට ඔහු සමත් වුනා.
මෑත කාලයේ කෙටිදුර ධාවනයෙන් සුවිශේෂී වාර්තාවන් පිහිටුවමින් දැක්වූ දස්කම් නිසා යුපුන් මෙම වසරේ පැවැත්වීමට නියමිත පොදුරාජ්‍ය මණ්ඩලීය ක්‍රීඩා උළෙලේ දී ශ්‍රී ලංකාව නියෝජනය කිරීමට ද නියමිතයි.
>> තවත් මලල ක්‍රීඩා පුවත් සඳහා පිවිසෙන්න<<
