සචින්ගේ පිත්තෙන් පන්නරය ලැබූ නවක ඉන්දීය තරුව

“ඔහු සචින් තෙන්දුල්කාර්ගේ හා විරේන්ද්‍ර ශෙවාග්ගේ එකතුවක්!” බ්‍රයන් ලාරා ඉන්දීය නවක පිතිකරු ප්‍රිත්වි ශාව් හැඳින්වූයේ එලෙසිනි.

බ්‍රයන් ලාරා මෙලෙස ප්‍රකාශ කර සිටියේ ප්‍රිත්වි 2018 වසරේ දී ජාත්‍යන්තර පිටියට පැමිණි අවධියේ දී ය. ප්‍රිත්විගේ දක්ෂතා පිළිබඳව අවබෝධ කරගැනීමට ලාරාගේ එම ප්‍රකාශයම ප්‍රමාණවත්‍ ය. 

පාකිස්තාන යොවුන් තරුවක් ඉන්දීය ක්‍රීඩකයෙකුගේ අඩිපාරේ

ඉහළ backlift ඉරියව්ව, ප්‍රබල හා වේගවත් පහර එල්ල කිරීම හා පිතිකරණය සඳහා ඔහු ලබාගන්නා නිර්භීත ප්‍රවේශයන් සැබැවින්ම අලංකාරය. කෙටියෙන් කිවහොත් මේ තරුණ මුම්බායි ක්‍රීඩකයාගේ පිතිකරණ අත්පොත ඕනෑම ක්‍රිකට් ලෝලීයෙකුට විනෝදාස්වාදය සඳහා වූ වට්ටෝරුවකි. මෙම හැකියාවන් සමඟ මිනිසුන්ව ආකර්ෂණය කර ගැනීම ප්‍රිත්වි වයස අවුරුදු තුනේ දී ආරම්භ කළ දෙයකි.

“විරාර් හෝ නගර් පාලිකා හි සිටින විට, ඔහු ටෙනිස් පන්දුව සමඟ සෙල්ලම් කරන ආකාරය ඔබට දකින්න පුළුවන්. එතන විශාල පිරිසක් සිටීවි” යනුවෙන් ඔහුගේ පියා පන්කාජ් ෂෝ හෙළි කරයි. 

“මොකද, ඔහු දැන් ක්‍රීඩා කරන ආකාරය ඔහු එදා ක්‍රීඩා කළ ආකාරයමයි. ඔහුගේ ස්වාභාවික ක්‍රීඩාව ඒ වගේ. ඒ හින්දා හැම කෙනෙක්ම මට කිව්වා ඔහුව මුම්බායි වෙත ගෙන යන්න කියලා. මම ඒ කාලේ ක්‍රිකට් ක්‍රීඩාව ගැන එතරම් දැන සිටියේ නැහැ.”

ෂෝගේ දක්ෂතාවය ඔහු පන්දුවට පහර දෙන ආකාරය බලා සිටින ඕනෑම කෙනෙකුට පැහැදිලිව වටහා ගත හැක. එයට විශාල ක්‍රිකට් දැනුමක් අවශ්‍ය නැත. ඔහු තරුණ වියේ පසුවීම නිසා මුම්බායි හි පුහුණුකරුවන් කිහිප දෙනෙකුම ඔහුව ඉවත් කළ අතර පියා-පුතු දෙදෙනාට නැවත විරාර් වෙත යාමට සිදු විය. එය ඔවුන්ව අධෛර්යයට පත් නොකළ අතර ෂෝගේ ගමන අවසානයේ දී මුම්බායි වලටම පැමිණියේය.

“මාව අවතක්සේරු කරන්න එපා”

ෂෝගේ දක්ෂතාවය කෙතරම්ද යත්, ඉන්දීය ශ්‍රේෂ්ඨතම පිතිකරු වන සචින් තෙන්ඩුල්කාර් පවා ඔහුගේ එක් පුහුණු සැසියකට ගොස් ප්‍රිත්වි පන්දුවට පහර දීම නැරඹීය. 

“මට වයස අවුරුදු 8 දී සචින් තෙන්ඩුල්කාර් MIG වෙත ඇවිල්ලා මගේ පුහුණුවීම් බැලුවා” ප්‍රිත්වි විශාල සිනහවක්ද සමඟින් පැවසීය.

“මට මතකයි එච්චරයි. ඔහු කොහේ හරි සිට බලා සිටියා ඔහු යමක් කියන තුරු මම කිසිවක් දැන සිටියේ නැහැ.”

සචින් තෙන්දුල්කාර් ප්‍රිත්විගේ පුහුණුවීම් බලා සිටියේ නැත. ඉන් නොනැවතුණ ඔහු ක්‍රීඩකයෙකුට දිය හැකි හොඳම තෑග්ග ප්‍රිත්විට ලබා දුන්නේය.

“ඔහු මට ඔහුගේ පිත්ත ලබා දුන්නා. ඒ වෙලාව මට ගොඩක් හැඟීම්බර වෙලාවක්. ඔහු මට සුබ පැතුවා. ‘මම හිතනවා ඔබ මේ පිත්තෙන් ලකුණු ටොන් ගණනක් ලබා ගනීවි කියලා’. ඔහු මට කිව්වා.”

ඉන්දීය ක්‍රිකට් ක්‍රීඩාවේ පිතිකරණ හැකියාවන් සැලකිල්ලට ගෙන කණ්ඩායමට ඇතුළත් වීමට නම් තමාට අසාමාන්‍ය දෙයක් කිරීමට අවශ්‍ය බව ප්‍රිත්විට සෑම විටම සිතී තිබුණි. එය සිදු වූයේ 2013 නොවැම්බර් මාසයේ දී හැරිස් ෂීල්ඩ් තරගයේ දී ය. 

වයස අවුරුදු 14 දී ඔහු වාර්තාගත ඉනිමක් ගොඩනැගූ අතර එය අවසන් වූයේ ලකුණු 546ක් වාර්තා කරමිනි. එය ක්ෂණික කීර්තියක් ගෙන දුන් අතර ප්‍රිත්විට එම විස්මිත ඉනිමෙන් ඔහුගේ දක්ෂතාවය මනා ලෙස ප්‍රකාශ කිරීමට අවස්ථාව උදා විය. 

“මම හෙට එන්නේ නැහැ” කියලා ප්‍රතිවාදී කඩුලු රකින ක්‍රීඩකයා කිව්වා. ඒ වෙද්දී මම ලකුණු  500 වත ගහලා තිබුණේ නෑ. මම 300ක් වගේ ලබාගෙන තිබුණා” ප්‍රිත්වි විනෝදයෙන් සිහිපත් කරයි. 

“ප්‍රතිවාදී කඩුලු රකින්නාට පන්දුව කිසිසේත්ම ගියේ නෑ. ඔහු මගේ පිටුපසින් පන්දුවක් එනතුරු බොහෝ වෙලාවක් බලා සිටියා.”

ප්‍රිත්විගේ මෙම ඉනිමේ ප්‍රවෘත්තිය පුළුල් ආවරණයක් ලබා ගත් අතර එය මුම්බායි හි පිතිකරණ ඉතිහාසයේ වාර්තාවක් පිහිටුවීමත් සමඟ ප්‍රිත්වි වටා ඇති ජනප්‍රියත්වය වේගවත් විය. පළමු පන්තියේ තරග ආරම්භය ඔහුගේ ඊළඟ පියවර වූ අතර 2017 දී එම අභියෝගය ද සාර්ථකව සම්පූර්ණ කිරීමට ප්‍රිත්වි සමත් විය. 

රංජි කුසලාන අවසන් පූර්ව තරගයේ දී මුම්බායි වෙනුවෙන් ඉනිම ආරම්භ කිරීමට ප්‍රිත්වි ශාව් එක්විය. ඔහුගේ මංගල ඉනිම සාර්ථක නොවූ නමුත් ඊළඟ ඉනිමේ දී ඔහු තම හැකියාවන් පෙන්වූ අතර, ඔහු වේගවත් පිතිහරඹයක් සඳහා දිරි ගැන්වීමක් ලබා දුන්නේ ශතකයක් වාර්තා කරමිනි. ප්‍රිත්විගේ ඒ ඉනිම ඔහු තරගයේ වීරයා බවට පත්කිරීමට සමත් විය.

“මම නොසන්සුන් වුනා. මොකද රංජි කුසලානය ක්‍රීඩා කිරීම මගේ එක් ඉලක්කයක්. එය ලොකු බලාපොරොත්තුවක්”  පළමු ඉනිමේ අසාර්ථකත්වය මඟහරවා ගැනීමට ඔහුට උපකාර කළ උපදෙස් පිළිබඳව ද ප්‍රිත්වි අදහස් දක්වා සිටියා.

“චන්දු සර්ට ඒ වෙලාවේ සචින් සර්ගෙන් පණිවුඩයක් ලැබුණා. එහි තිබුණා මම නිතරම ක්‍රීඩා කරන ආකාරය ක්‍රීඩා කරන්න මට උපදෙස් දෙන්න කියලා. මේ තරගයේ වෙනස් කිසිම දෙයක් නෑ. අපට තරගය ජය ගන්න පුළුවන් කියලා ඒ පණිවිඩයේ තිබුණා” ප්‍රිත්වි පැවසීය.   

ඔහු සිය පළමු පන්තියේ වෘත්තීය ජීවිතය අඛණ්ඩව ශක්තිමත් කරමින්, ඉහළම අනුකූලතාව පෙන්නුම් කළ අතර එහි කැපී පෙනෙන දෙය නම් සියලු ආකෘතින් තුල ඔහු ලබාගත් වේගවත් ආරම්භයයි.

2018 වයස අවුරුදු 19න් පහළ ලෝක කුසලානය පැහැදිලිවම ඊළඟ පියවර වූ අතර ප්‍රිත්විට කණ්ඩායමේ නායකත්වය ද හිමිව තිබුණි. කෙසේ වෙතත්, අභියෝග ඔහුට අලුත් දෙයක් නොවීය.

ෂෝට ඔහුගේ ප්‍රමිතීන්ට අනුව ප්‍රබල තරගාවලියක් නොතිබුණ ද, ඔහු ලෝක කුසලාන තරගාවලියේ දී වැඩිම ලකුණු ලබා ගත් ඉන්දීය නායකයා බවට පත්විය. ඉන්දියාව එම ශූරතාව දිනා ගැනීම පැහැදිලිවම මූලික ජයග්‍රහණය විය.

ලෝක කුසලානය ගැන කණගාටුදායක අනාවැකියක්

“නිසැකවම, ලෝක කුසලානය විශාල දෙයක්. එය මට ලොකු දෙයක්. මට මතකයි 2008 දී විරාත් [කෝලි] නායකයා වූ විට මම සියලු තරග නැරඹුවා. ඒ නිසා 2018 දී මම ලෝක කුසලාන තරගාවලියේ කණ්ඩායමට නායකත්වය දෙන බව දැන ගත් විට මට තේරුණා ඒක ලොකු දෙයක් කියලා. ”

ප්‍රිත්විට ඉන්දියාවේ ජ්‍යේෂ්ඨ කණ්ඩායමට කැඳවීමක් ලැබුණේ එම වසරේ දී මය. ඒ ඔහු එංගලන්ත සංචාරයේ මැද භාගයේ දී ටෙස්ට් සංචිතයට ඇතුළත් වීමත් සමඟය. එයට පෙර කොදෙව් කණ්ඩායම සමඟින් පැවති තරගාවලියට ද එක්වීමට ඔහුට අවස්ථාව හිමිවුවද එය අවසන් මොහොතේ ගිලිහී ගියේය. එංගලන්ත තරගාවලියේ පළමු ඉනිමේ දී ශතකයක් වාර්තා කරමින් ඔහු ජාත්‍යන්තර ටෙස්ට් පිටියේ පළමු තරගයේ වීරයා සම්මානය ලබා ගැනීමට සමත් විය. එම තරගාවලියේ  වීරයා බවට ද ප්‍රිත්වි පත්විය.

“මට එහි කතාවක් කිරීමට සිදු වුනා (ක්‍රීඩක විවේක කාමරයේ). ඇත්තටම කතා තුනක්. එකක් මගේ ටෙස්ට් තරගයට පෙර, එකක් මම තරගයේ වීරයා ලැබීමෙන් පසුවත්, තරගාවලියේ වීරයා බවට පත්වීමෙන් පසුවත්” ප්‍රිත්වි පැවසීය. 

මේ දක්වා ඉන්දීය කණ්ඩායම වෙනුවෙන් ටෙස්ට් තරග 4කට ක්‍රීඩා කර ඇති ප්‍රිත්වි එහි දී ලකුණු 335ක් වාර්තා කර ඇත්තේ සාමාන්‍ය 55.83ක් ලෙස රඳවා ගනිමිනි. ශතකයක් හා අර්ධ ශතක 2ක් තම නම ඉදිරියේ සටහන් කරගැනීමට ඔහු සමත්ව ඇත.

Cricbuzz ඇසුරෙනි.

>> තවත් ක්‍රිකට් පුවත් සඳහා පිවිසෙන්න <<