2021/22 අළුබඳුන තරගාවලිය තවත් තරග දෙකක් ඉතිරිව තිබිය දීම ජයග්‍රහණය කිරීමට ඕස්ට්‍රේලියා කණ්ඩායම පසුගිය දා සමත් වුනා.
පළමු ටෙස්ට් තරග තුනේ දී ම එංගලන්ත කණ්ඩායමේ ක්‍රීඩා විලාසය දුර්වල මට්ටමක පැවතුණා. ඕස්ට්‍රේලියාවේ ජයග්‍රහණය සහ එංගලන්තයේ දුර්වල දස්කම් පිළිබඳව ඕස්ට්‍රේලියාවේ හිටපු නායක Ricky Ponting පසුගිය දා අදහස් දක්වා සිටියා.
මෙවර තරගාවලිය සඳහා සහභාගී වන එංගලන්ත කණ්ඩායම අළුබඳුන තරගාවලියක් සඳහා ඕස්ට්‍රේලියාවේ සංචාරය කළ දුර්වලම එංගලන්ත කණ්ඩායම බව ඔහු පවසා සිටියා.
ඕස්ට්‍රේලියාව පළමු ටෙස්ට් තරග තුනම ජය ගැනීමට සමත් වූ අතර ඒ අනුව ඔවුන් තරග පහකින් සමන්විත තරගාවලිය 3-0ක් ලෙස පෙරමුණ ගැනීමට සමත් වුනා. ඒ අනුව අළුබඳුන කුසලානය නැවත දිනා ගැනීමේ එංගලන්තයේ සිහින බොඳ වී තිබෙනවා.
තත්ත්වය තරමක් හෝ යහපත් වීමට නම්, සංචාරක එංගලන්ත කණ්ඩායමට සිය දක්ෂතා සම්බන්ධයෙන් නැවතත් මුල සිට වැඩ කිරීම ආරම්භ කළ යුතු බව Ricky Ponting යෝජනා කර සිටිනවා.
“පසුගිය තරග තුනේ දී මා දැක්ක විදිහට ඕස්ට්‍රේලියාවේ දී මේ තරම් නරක දස්කම් දක්වන කණ්ඩායමක් මම දැකලා නැහැ. අපි ඕස්ට්‍රේලියාවේ දී මෙය අත්විඳ තියනවා. මීට වසර කිහිපයකට පෙර තත්වය දිහා ආපසු හැරී බැලුවොත් අපි එංගලන්තයේ දී මේ වගේම අරගල කළා. අපි තණතීරු වෙනස් කළා, පන්දුව වෙනස් කළා, අපි ඒ තත්වයන් තුළ අසාර්ථක නිසා අපි සියල්ල වෙනස් කළා”, Ricky Ponting cricket.com.au වෙත අදහස් දක්වමින් පවසා සිටියා.
“එංගලන්තය ඔවුන්ගේ තණතීරු සහ තත්ව අපේ ඒවාට වඩාත් ගැළපෙන්නේ කෙසේ දැයි බලන්න ඕනේ. ඔවුන් තවමත් එංගලන්තයේ දී හොඳින් ක්‍රීඩා කරනවා. නමුත් ඔවුන් මෙහි පැමිණෙන විට හොඳින් ක්‍රීඩා කරන්නේ නැහැ. සමහර විට ඔවුන් Kookaburra පන්දුව සමඟ වැඩිපුර ක්‍රීඩා කරනවා. ඒ නිසා මේක වෙන්න පුළුවන්. සමහර විට ඔවුන් තණතීරු තරමක් වියළි විදිහට හදනවා. ඒ නිසා එහි එතරම් දෝලනයක් සහ වේගයක් නැති වෙනවා. ඒ නිසා පිතිකරුවන් විශාල ලකුණු ලබා ගනිමින් වැඩි කාලයක් පන්දුවට පහර දෙනවා. මීට වසර තුනකට හෝ හතරකට පෙර ඕස්ට්‍රේලියාව මුහුණ දුන් අභියෝගයත් ඒක වෙන්න පුළුවන්.”
- ශ්‍රී ලංකාව ආසියානු කුසලානයේ අවසන් පූර්ව වටයට
- ශ්‍රී ලංකා – සිම්බාබ්වේ කාලසටහන නිකුත් වෙයි
- ජීවන් මෙන්ඩිස් ජාත්‍යන්තර ක්‍රිකට් පිටියට ආයුබෝවන් කියයි
- ගුණතිලක, දික්වැල්ල හා මෙන්ඩිස් බංග්ලාදේශයට!
- ඕස්ට්‍රේලියා ක්‍රිකට් රහස්‍ය වාර්තාවක් මාධ්‍යයට නිකුත් වෙයි
එංගලන්තය මීට පෙර ඕස්ට්‍රේලියාවේ දී පූර්ණ තරගාවලි පරාජයන් වලට ලක්ව තිබෙනවා. ඒ අතරින් විශේෂ ස්ථානයක් හිමිවන්නේ 2013 තරගාවලියටයි. මෙවර එංගලන්ත පිතිකරණය අතිශයින්ම අසාර්ථක වන මට්ටමක දී තවත් පූර්ණ තරගාවලි පරාජයක් හිමිවීමට ඉඩ ඇති බව Ricky Ponting පවසා තිබෙනවා.
Joe Root සහ Dawid Malan හැර සෙසු එංගලන්ත පිතිකරුවන්ගේ දක්ෂතා ඉතා කණගාටුදායක තත්වයක පැවතුණා. Zak Crawley, Haseeb Hameed, Olie Pope සහ Ben Stokes වැනි ක්‍රීඩකයන් එංගලන්ත පිතිකරණයේ දී අසාර්ථක වීම කැපී පෙනුණා.
“පසුගිය සංචාර දෙකේ දී මම දැක්ක එංගලන්තයේ සමහර ප්‍රමුඛ පෙළ පිතිකරුවන් ටෙස්ට් තරගවලට ගැළපෙන්නේ නැහැ. මම නම් සඳහන් කරන්නේ නැහැ. ටෙස්ට් තරගවල දී මම දන්නා සමහර ශිල්පීය ක්‍රම ඔවුන් භාවිතා කරන ආකාරය එක්ක ඔවුන් ටෙස්ට් තරගවලින් දියුණු වේවි කියලා හිතන්න බැහැ. නැගී සිටීමට යන්නේ නැත. අභියෝගාත්මක තත්වයන් යටතේ සහ ලෝක මට්ටමේ පන්දු යවන්නන් ප්‍රමිතියෙන් තොර තාක්ෂණික ක්‍රමවලට එරෙහිව ක්‍රීඩා කරද්දී වෙන දේ ඔබ අද MCG හිදී දැක්කා”, Ricky Ponting වැඩිදුරටත් පවසා සිටියා.
“කුඩා දෝලනයක් සහිත සාමාන්‍ය පන්දුවලට ඔවුන් මුහුණ දෙන්නේ ප්‍රාන්ත ක්‍රිකට්වල විතරයි. ජාත්‍යන්තර ටෙස්ට් තරගවල දී ඔවුන් ඒවාට මුහුණ දෙන්නේ නැහැ. ඔවුන් මුහුණ දෙන්නේ ඇත්තටම පන්දු යැවීමට හැකි ක්‍රීඩකයන්ට. ඔවුන්ගේ පිතිකරණයෙන් මම දැකපු දේ තමයි මේ පන්දු යවන්නන්ට ඔවුන් හොඳ මදි.”
අළුබඳුන ටෙස්ට් තරගාවලියේ පළමු තරගය ඕස්ට්‍රේලියා කණ්ඩායම ජයග්‍රහණය කළේ කඩුලු 9කින්. දෙවැනි තරගය ලකුණු 275කින් ජයග්‍රහණය කළ ඕස්ට්‍රේලියා කණ්ඩායම ඊයේ නිමා වූ තුන්වැනි ටෙස්ට් තරගය ජයග්‍රහණය කළේ ඉනිමකින් සහ ලකුණු 14කින්.
තරගාවලියේ සිව්වැනි තරගය එළඹෙන ජනවාරි මස 5 වැනිදා ආරම්භ වීමට නියමිතයි.
Hindustan Times ඇසුරිනි
>> තවත් ක්‍රිකට් පුවත් සඳහා පිවිසෙන්න <<
