1992 අගෝස්තු මස දිනෙක සිංහල සමාජ පිටියේ දී ක්‍රිකට් ලෝකයට නව තාරකාවක් බිහි විය. ඒ වන තෙක් ක්‍රිකට් ක්‍රීඩාවේ ඔහුගේ ඉදිරි මග කෙසේ ද කියා ඔහු දැන සිටියේ නැත. එසේම එය තමාගේ දෛවය වෙනස් කරන පැය කිහිපය කියා ද රන්වන් හිසකේ ඇති ඕස්ට්‍රේලියානු තරුණයා එදා දැන සිටියේ නැත.
1992 වසරේ ඕස්ට්‍රේලියානු කණ්ඩායමේ ශ්‍රී ලංකා සංචාරයේ සිංහල සමාජ ක්‍රීඩා පිටියේ පැවැත්වුණ පළමු ටෙස්ට් තරඟයේ දින හතර හමාරක් පුරාවටම තම ආධිපත්‍ය පතුරවා ගෙන සිටි ශ්‍රී ලංකා කණ්ඩායම අවසාන මොහොතේ පරාජයට පත්වූයේ කිසිවෙකු නොසිතු පරිද්දෙනි.
ශ්‍රී ලංකා පළමු ඉනිමේ දී සිංහල සමාජ පිටිය වටා සතර කොනට පහර කෑමට ලක්වූ ෂේන් වෝන් නම් ඕස්ට්‍රේලියානු අංකුර පා දඟ පන්දුයවන්නා ශ්‍රී ලංකා දෙවන ඉනිමේ අවසාන කඩුලු තුන දවා ගත්තේ කිසිදු ලකුණක් ප්‍රතිවාදීන්ට ලබා ගැනීමට අවස්ථාවක් නොදෙමිනි.
ෂේන් වෝන් නම් අග්‍රගණ්‍ය ක්‍රිකට් පුරාවෘත්තයේ හැරවුම් ලක්ෂ්‍යය ලෙස බොහෝ දෙනා සලකන්නේ මෙම තරගයයි.
සිරිමත් ගති නැති ක්‍රිකට් ක්‍රීඩාවේ හොලිවුඩ් තරුව
“මම හරිම උද්දාමයකට පත්වෙලා හිටියේ. මම පුහුණු දැලේ දී පුළුවන් තරම් පන්දු යැව්වා. නැවත ටෙස්ට් තරගයකට ක්‍රීඩා කරන්නට ලැබීම සැබවින්ම භාග්‍යයක්.
මම පැය ගණනක් ඇලන් බෝඩර්ට පන්දු යැව්වා. පුහුණු දැල නියම ටෙස්ට් තරගයක් ලෙස සලකන එකම ක්‍රීඩකයා ඔහුයි.
මා පළමු ටෙස්ට් තරගයට ක්‍රීඩා කරන ක්‍රීඩකයින් එකොළොස් දෙනා අතරට නම් කර තිබුණා. 1983 වසරේ අප ශ්‍රී ලංකාව ටෙස්ට් තරගයකින් පරාජය කළා. 1969 වසරෙන් පසු ඒ දක්වා ආසියාවේ දී ඕස්ට්‍රේලියානු කණ්ඩායමක් ලද එකම ටෙස්ට් ජයග්‍රහණය එය පමණයි ”
ෂේන් වෝන් සුප්‍රකට ශ්‍රී ලංකා ටෙස්ට් තරඟය ගැන මතකය අවධි කරන්නේ එසේය.
තරගයේ කාසියේ වාසිය දිනූ ශ්‍රී ලංකා නායක අර්ජුන රණතුංග පළමුවෙන්ම පන්දුවට පහර දීම ඕස්ට්‍රේලියානුවන්ට බාර කළේය. චන්දික හතුරුසිංහ ඇතුළු ශ්‍රී ලංකා මද වේගපන්දු යවන්නන් හමුවේ අසරණ වූ ඕස්ට්‍රේලියානු ප්‍රථම ඉනිම ලකුණු 256කට සීමා විය.
ඉයන් හිලී පසුපෙළ පිතිකරුවන් සමඟ එක්වී ඕස්ට්‍රේලියානු ඉනිම ස්ථාවර නොකරන්නට ආගන්තුකයින්ගේ ඉනිම තවදුරටත් අසරණවන්නට ඉඩ තිබුණි.
පිළිතුරු ලෙස සිය පළමු ඉනිම ක්‍රිඩා කළ ශ්‍රී ලංකා පිතිකරුවන් ඕස්ට්‍රේලියානු පන්දු යවන්නන්ට නොසෑහෙන්නට බැට දුන්නෝය.
මංගල තරගයට ක්‍රීඩා කරන රොමේෂ් කළුවිතාරණ ඇතුළු ශ්‍රී ලාංකික පිතිකරුවන් තිදෙනෙකු ශතක වාර්තා කළ අතර තරග 38කට පසුව මුල්ම වතාවට ශ්‍රී ලංකා කණ්ඩායම ලකුණු 500 සීමාව ඉක්මවා ලකුණු ලබා ගන්නට සමත් විය.
විශේෂයෙන්ම නායක අර්ජුන රණතුංග, ෂේන් වෝන්ට කිසිම බුරුලක් ලබා දෙන්නට සූදානම් වූයේ නැත. ෂේන් වෝන්ගේ පන්දුවාර විසිදෙකක් තුළ ලකුණු 107ක් ලබා ගන්නට ශ්‍රී ලංකා පිතිකරුවන් සමත් වී තිබුණි.
ක්‍රිකට් ක්‍රීඩාවේ තුන්කල් දුටු නවසීලන්ත ප්‍රාඥයා
1962 වසරේ සැප්තැම්බරයේ දිනක නවසීලන්ත ඕල්බ්ලැක්ස් ……..
ලකුණු 291ක් පිටුපසින් සිටිමින් සිය දෙවන ඉනිම ආරම්භ කළ ඕස්ට්‍රේලියානුවෝ කිසිම ලෙසකින් සිය සටන අතහැරීමට සූදානම් වූයේ නැත.
ඕස්ට්‍රේලියානු දෙවන ඉනිමේ ඉහළම ලකුණු ලාභියා වූයේ ඩේවිඩ් බූන්ය. ලකුණු 10ක් ලබා සිටි බූන් ලබා දුන් උඩපන්දුව රොමේෂ් කළුවිතාරණ අතින් ගිලිහී ගිය නමුත් බූන් මෙන්ම සෙසු ඕස්ට්‍රේලියානු පිතිකරුවන් ද සිය වගකීම මැනවින් වටහා ගෙන ක්‍රීඩා කළෝය.
ප්‍රතිඵලය ලෙස ඕස්ට්‍රේලියානුවන් සිය දෙවන ඉනිමට ලකුණු 471ක් රැස් කරගැනීමට සමත් විය. එය සාමූහික පිතිකරණ දක්ෂතාවයකි. ජයග්‍රහණය වෙනුවෙන් තරගයේ අවසාන දිනයේ ශ්‍රී ලංකා කණ්ඩායමට ලැබුණ ඉලක්කය ලකුණු 181කි.
බැලූ බැල්මට එය එතරම් අපහසු ඉලක්කයක් ලෙස පෙනුණේ නැත. නමුත් ඇලන් බෝඩර් ඇතුළු ඕස්ට්‍රේලියානුවන් සිය සටන අත්හරින්නට සූදනම්ව සිටියේ නැත.
ලකුණු 181ක ඉලක්කය හඹා ගිය ශ්‍රී ලංකා කණ්ඩායමේ ආරම්භක පිතිකරුවන් දෙදෙනා රොෂාන් මහානාම සහ චන්දික හතුරුසිංහ මුල්ම කඩුල්ලට එක් කළ සබඳතාව ලකුණු 76ක් විය. ශ්‍රී ලංකා දෙවන ඉනිමේ මුල්ම කඩුල්ල ලෙස දැවී ගියේ රොෂාන් මහානාමය.
මහානාමගේ දැවී යෑමෙන් අනතුරුව පස්වැනි දිනයේ තේ පානයට මොහොතකට පෙර අනෙක් ආරම්භක පිතිකරුවා වූ හතුරුසිංහ දුවද්දී දවා ගන්නට ටොම් මූඩි සමත් විය.
පස්වැනි දිනයේ තේ පානයට තරගය නතර කරන විට ශ්‍රී ලංකා ලකුණු පුවරුව කියවුණේ ලකුණු 79කට කඩුලු දෙකක් ලෙසිනි.
“තරගය තේ පානයට නතර කළ අවස්ථාවේ මට තදබල කලකිරීමක් ඇතිවෙලා තිබුණේ. මගේ මංගල ටෙස්ට් තරගයේ දී මම එතරම් හොඳින් දස්කම් දැක්වූයේ නැහැ. නමුත් මම මගේ පන්දු යැවීම දියුණු කරගන්න සෑහෙන මහන්සි වුනා. ශ්‍රී ලංකා පිතිකරුවන් මට කිසිම ගෞරවයක් ලබා දුන්නේ නැහැ.
දෙවියනි මෙය මට කැප නැහැ. මම මටම කියා ගත්තා.
සමහර විට ක්‍රිකට් කියන්නේ මට උරුම දෙයක් නොවෙන්න ඇති මට හිතුණා.
තේ පානය අතරතුර ඇලන් බෝඩර් මා වෙත පැමිණියා.
“ඔබ ඉතා හොඳින් පන්දු යැව්වා. ඉවසන්න නියම වෙලාව එනවා. මම විශ්වාසෙන් කියන්නේ” ඒ.බී (ඇලන් බෝඩර්) පැවසුවා.
මේ අතර ග්‍රේග් මැතිව්ස් කඩුලු කිහිපයක් දවා ගත් නිසා ශ්‍රී ලංකා ඉනිමේ කඩුලු හයක් දැවී ගොස් තිබුණා.
එක්වරම ඒ. බී ෆයින් ලෙග් කලාපයේ පන්දු රකිමින් සිටි මට කෑගසා කීවා අනෙක් අන්තයෙන් පන්දු යැවීම ආරම්භ කිරීමට සූදානම් වන ලෙස.
ශ්‍රී ලාංකිකයින්ට ජයග්‍රහණයට තවත් උවමනා කළේ ලකුණු 34ක් පමණයි.
අනේ මට නම් බැහැ. මම පන්දු යැව්වොත් මේක පන්දුවාර දෙක තුනකින් ඉවර වේවි. ඒ. බී ඔබට මේ අපරාධයට නම් මට කරගහන්න දෙන්න බෑ. මගේ අතින් තරගය ගිලිහෙන්න පුළුවන්, දෙයියනේ ඇයි මම.
මම යැවූ පළමු පන්දුවාර නිලකුණු පන්දුවාරයක්. මා එතරම් මානසික ඒකාග්‍රතාවයකින් යුතුව කිසිම දිනක පන්දු යවා නැහැ. මේක අත්හරින්න බැහැ මම මටම කියා ගත්තා.
මේ අතර මැතිව්ස් කඩුල්ල මුවා කිරීමේ වරදින් අනෙක් පසින් තවත් කඩුල්ලක් දවා ගත්තා. දැන් ඔවුන්ගේ කඩුලු හතක් දැවී ගොසින්. අපි තවම පරාජය වී නැහැ.
මොහොතකින් ප්‍රමෝද්‍ය වික්‍රමසිංහ ලබා දුන් උඩපන්දුව මාක් වෝ (ජූනියර්) විසින් රැකගත්තා. ඒ මගේ ටෙස්ට් දිවියේ දවා ගත් දෙවන කඩුල්ලයි.
ඩීන් ජෝන්ස් මා වෙත පැමිණ කිව්වා. නියමයි දැන් උඹේ පන්දු යැවීමේ සාමාන්‍යය 160ක් කියා. මා එය විහිළුවක් ලෙස ගත්තේ නැහැ.
දොන් අනුරසිරිට ද වැඩි වේලාවක් කඩුල්ලේ රැඳී සිටීමට අවස්ථාවක් ලැබුණේ නැහැ. එවරත් උඩපන්දුවක් රැකගත්තේ ජූනියර්.
ඒ වන විටත් ශ්‍රී ලංකා කණ්ඩායමේ නම් දැරූ පිතිකරුවෙකු වූ අසංක ගුරුසිංහ කඩුල්ලේ රැඳී සිටියා. මැතිව්ස් ක්‍රියාත්මක කළ ඊළඟ පන්දුවාරයට වේගවත් ස්වීප් පහරවල් දෙකක් එල්ල කිරීමට ගුරු සමත් වුනා.
හතරේ පහර දෙකක් !
ජයග්‍රහණය වෙනුවෙන් ලබා ගත යුතු ලකුණු සංඛ්‍යාව 17ක්. පන්දුවාරයේ අවසාන පන්දුවට ගුරු එක් ලකුණක් ලබා ගැනීමට උත්සහ කළත් අනෙක් අන්තයේ සිටි රංජිත් මධුරසිංහ ඒ වෙනුවෙන් සූදානමකින් සිටියේ නැහැ.
ඊළඟ පන්දුවාරය මධුරසිංහට යැවීමටයි මගේ සූදානම. ඔව් මධුරසිංහ විශාල පහරකට උත්සහ කළේ. ඉහළ නැගුණ පන්දුව මැතිව්ස් විසින් රැකගත්තා.
සචින් තෙන්ඩුල්කාර් නම් ඉන්දියානු දෙවියා
සචින් තෙන්ඩුල්කාර් යනු ඉන්දියානුවන්ට එක්තරා ආකාරයකින් දෙවියෙකි……
ඕස්ට්‍රේලියානු කණ්ඩායමට ලකුණු 16ක විශිෂ්ට ජයග්‍රහණයක්.
අපි උමතුවෙන් මෙන් දිවගියා.
ක්‍රීඩක විවේකාගාරයේ අපි අපේ විශිෂ්ට ජයග්‍රහණය සමරන්නට පටන් ගත්තා. ඇත්තටම එදා ශ්‍රී ලංකා ක්‍රීඩක විවේකාගාරය තිබුණේ එක් බිත්තියක පරතරයකින්. අපි ජයග්‍රහණය සමරන වාරයක් වාරයක් පාසා පිහියකින් නොනවත්වා හදවත පසාරු කරන තරමේ වේදනාවක් ශ්‍රී ලාංකික ක්‍රීඩකයින්ට දැනුණ බව පසුව දැනගන්නට ලැබුණා.
ඇත්තටම එය අපේ ක්‍රිකට් ඉතිහාසයේ සුවිශේෂීම ජයග්‍රහණයක්. නමුත් රූපවාහිනියෙන් හෝ එය නැරඹීමට ඕස්ට්‍රේලියානුවන්ට හැකියාවක් තිබුණේ නැහැ. එය ඇත්තටම හරිම අභාග්‍යසම්පන්න දෙයක්.
අනිවාර්යයෙන්ම ෂේන් වෝන් නම් ක්‍රිකට් ක්‍රීඩකයාගේ ක්‍රිකට් ජීවිතයේ හැරවුම් ලක්ෂ්‍යය එම තරගයයි.” වෝන් පවසන්නේ සිනාමුසු මුහුණෙනි.
>> තවත් විශේෂාංග ලිපි සඳහා පිවිසෙන්න <<
