විවිධ දේශපාලනික සහ ආර්ථික ගැටලු රැසක් හේතුවෙන් දැඩි ලෙස පීඩාවට පත්ව සිටින සුවහසක් ශ්‍රී ලාංකික ක්‍රීඩාලෝලීන්ගේ මුවඟට යම් හෝ සිනහවක් රැගෙන ඒමට එළඹෙන බංග්ලාදේශ තරග සංචාරය ජයග්‍රහණය කිරීම තීරණාත්මක සාධකයක් වනු ඇති බවට ශ්‍රී ලංකා කණ්ඩායමේ සහය පුහුණුකරු ලෙස අභිනවයෙන් තේරීපත් වුනු Naveed Nawaz මහතා සඳහන්කොට තිබේ.
ඔහු පෙන්වාදී තිබුණේ බංග්ලාදේශ තරග සංචාරය ඉලක්ක කර ගනිමින් ආරම්භ කර ඇති පුහුණුවීම් කටයුතු සහ පුහුණු කඳවුරු සඳහා මෙරට දැනට උද්ගතව ඇති තත්වයන්ගේ කිසිදු බාධාවක් ඉල්ල වී නොමැති බවයි. Nawaz මහතා වැඩිදුරටත් පවසා සිටියේ ක්‍රීඩකයින් ද ඔවුන්ගේ උපරිමය ලබා දෙමින් ඉතාමත් හොඳින් පුහුණුවීම් කටයුතුවල නියැලෙමින් සිටින බවයි.
“ගොඩක් ක්‍රීඩකයින් ඉතාමත් උනන්දුවෙන් සහ කැපවීමෙන් තමන්ගේ වැඩ කොටස හරියාකාරව ඉටු කරනවා. ඔවුන් තරග සංචාරය සඳහා දැනටමත් මාස 2කට වඩා වැඩි කාලයක ඉඳන් සූදානම් වෙනවා. ලංකාව ඇතුළේ අපිට මේ වෙලාවේ දී ධනාත්මකව බලන්න පුළුවන් දේවල් තියෙන්නේ බොහොම පොඩි දේවල් ප්‍රමාණයක් වුනාට අපි බලාපොරොත්තු වෙනවා මේ තරගාවලිය හොඳින් අවසන් කරලා ජයග්‍රාහී ප්‍රතිඵලයක් එක්ක නැවත ලංකාවට එන්න.”
- පිතිකරුවන් සම්පූර්ණ ගෞරවය දිනා ගනිමින් තරගය අවසන්
- Mumbai Indiansට සුපිරි පිතිකරුවෙකු අහිමි වෙයි
- පාකිස්තානයේ ශ්‍රී ලංකා සංචාරයෙන් එක්දින තරගාවලිය කැපේ
- වනිඳුගේ සුපිරි පන්දු යැවීම හමුවේ RCBට දැවැන්ත ජයක්
මෙම තරග සංචාරය සඳහා එක්වන ශ්‍රී ලංකා කණ්ඩායමේ පන්දු යැවීමේ බලඇණිය සම්බන්ධයෙන් අදහස් දක්වමින් Nawaz මහතා පෙන්වාදී තිබුණේ, ජාත්‍යන්තර තරග අත්දැකීම් එතරම් නොමැති වූවත් බංග්ලාදේශ පිතිකරුවන්ට ඕනෑම මොහොතක දී අභියෝග කළ හැකි දක්ෂ පන්දු යවන්නන් කිහිපදෙනෙකුම කණ්ඩායම සතුව සිටින බවයි.
“කණ්ඩායම් දෙකේ පන්දු යැවීමේ අංශයන් සංසන්දනය කරන කොට පැහැදිලිවම පේන්න තියෙන කාරණාව තමයි අපේ පන්දු යවන්නට ජාත්‍යන්තර තරග අත්දැකීම් අඩුයි කියන එක. නමුත් පිතිකරණය පැත්තෙන් ගත්තහම කණ්ඩායම් දෙකම ඉන්නේ ප්‍රබල තැනක. මට හිතෙනවා මේ ටෙස්ට් තරගාවලිය ඉතාමත් තියුණු සහ උණුසුම් තරග අවසානයන්ගෙන් පිරුණු අමතක නොවන තරගාවලියක් බවට වෙයි කියලා. ශ්‍රී ලංකා කණ්ඩායමට මේ තරගාවලිය හිතන තරම් පහසු වෙන එකක් නැහැ.”
“නමුත් අපි හැමවෙලාවේම හැමදෙයක්ම දිහාම සුභවාදී සහ විවෘත මනසකින් දකින්න උත්සාහ කරනවා. අපි උපරිම උත්සාහ කරනවා හැකි තරම් ඉක්මනින් ඔවුන්ගේ තණතිලිවලට සහ කාලගුණ තත්වයන්ට අනුගත වෙන්න. විශේෂයෙන්ම අපි ක්‍රීඩා කරන Chittagong ක්‍රීඩාංගණයේ තණතීරුවලට ඉක්මනින්ම හැඩ ගැහෙන්න පුළුවන් වුනොත් ලොකු ලකුණු සංඛ්‍යාවල් ඉලක්ක කරගෙන ප්‍රතිවාදී කණ්ඩායමට විශාල පීඩනයක් එල්ල කරන්න පුළුවන්.”
ශ්‍රී ලංකා ක්‍රිකට් ආයතනය විසින් Naveed Nawaz මහතා සිය අභිනව ධුරය සඳහා තෝරාපත් කරගැනීමට ප්‍රථමයෙන් ඔහු බංග්ලාදේශ වයස අවු.19න් පහළ කණ්ඩායම සමඟ ඉතාමත් සමීපව කටයුතු කළ අතර වයස අවු.19න් පහළ ලෝක කුසලානය ජයග්‍රහණය කළ බංග්ලාදේශ කණ්ඩායමේ පුහුණුකාරවරයෙකු ලෙස ද සිය සේවය ලබා දීමට කටයුතු කර තිබේ.
එම කාලසීමාව තුල දී ඔහුගෙන් ගුරුහරුකම් ලබා ගත් Mahmudul Hasan සහ Shariful Islam වැනි ක්‍රීඩකයින් ජාතික කණ්ඩායම වෙත එකතු වී සිටීම සම්බන්ධයෙන් අදහස් දක්වා සිටි Nawaz මහතා සඳහන් කර සිටියේ එම ක්‍රීඩකයින් සතුව බංග්ලාදේශ ක්‍රිකට් සන්නාමය තවදුරටත් ජාත්‍යන්තර ක්‍රිකට් වේදිකාවේ ඉදිරියට රැගෙන යාමේ හැකියාව පවතින බවයි.
“ඔවුන් දෙදෙනාම අති දක්ෂ ක්‍රීඩකයින් දෙදෙනෙක්. කවදා හරි දවසක ඔවුන් බංග්ලාදේශ ක්‍රිකට් වෙනුවෙන් විශිෂ්ට සේවාවක් ඉටු කරන ප්‍රබල ක්‍රීඩකයින් බවට පත් වේවි. මම ගොඩ කාලෙකින් ඔවුන්ව මුණ ගැහිලා නැහැ. මම හිතනවා ඔවුනුත් සතුටු වේවි මාව නැවත මුණ ගැහෙන්න අවස්ථාවක් ලැබෙන එකට.”
Cricinfo ඇසුරෙනි
>> තවත් ක්‍රිකට් පුවත් සඳහා පිවිසෙන්න <<
