ඒ සමයේ දේශීය ක්‍රිකට් පිටියේ සිංහල සමාජ ක්‍රීඩා සමාජයත්, ටැමිල් යූනියන් ක්‍රීඩා සමාජයත් අතර පැවැත්වෙන අන්තර් සමාජ ක්‍රිකට් තරගයට හිමි වූයේ සුවිශේෂී තැනකි.
ඇතැමෙකුට අනුව මෙරටින් බිහි වූ අද්විතීයම පිතිකරුවා ලෙස ගැනෙන මහදේවන් සතාසිවම් නැතහොත් ‘සතා’ එදා ටැමිල් යූනියන් ක්‍රීඩා සමාජය නියෝජනය කරමින් සිටියේය.
අනෙක් පසෙන් සිංහල ක්‍රීඩා සමාජ කණ්ඩායම මෙහෙයවමින් උපායශීලී එෆ්. සී ද සේරම්ය.
සතාසිවම් මෙල්ල කිරීම ලෙහෙසි පහසු නොවේ. විවිධ උපායන් කල්පනා කළ සේරම් අවසානයේ වෙනස් ආකාරයක උගුලක් සතාසිවම් වෙනුවෙන් අටවන්නට තීරණය කළේය.
තරගයට පෙර දිනයේ සතාසිවම්ට සිංහල ක්‍රීඩා සමාජයෙන් කා බී විනෝදවන්නට ආරාධනාවක් ලැබෙන්නේය.
ආරාධනාව පැහැර නොහරිමින් එදා සිංහල ක්‍රීඩා සමාජයට ගිය සතාසිවම්ව හොඳින් බීමතින් සප්පායම් කරන්නට සිංහල ක්‍රීඩා සමාජ සාමාජිකයෝ වග බලා ගත්හ.
තරගය දා අලුයම වන තෙක් කා බී තුටු වූ සතාසිවම් එදා තම නිවසට ගියේ නැත. එලෙස නිවසට නොගිය ඔහු රාත්‍රිය පහන් කළේ තමන්ගේ මෝටර් රථයට වී නිදාගෙනය.
සතාසිවම් සිය කාරයේ නිදන විට සිංහල ක්‍රීඩා සමාජ සාමාජිකයෝ තම සැලැස්ම අකුරටම ක්‍රියාත්මක වන බව දැන දැනම සතුටින් විසිර ගියෝය.
අනූ ගණන්වල අපි, ක්‍රිකට් සහ සබ්සේ බඩා කිලාඩි!
පසුදින සිංහල ක්‍රීඩා සමාජ සාමාජිකයෝ තව තවත් සන්තෝසයට පැමිණියේ තරගයේ උදෑසන කාසියේ වාසිය ද ඔවුන්ට පක්ෂපාතීව වැටුණ බැවිනි.
සිංහල ක්‍රීඩා සමාජ කණ්ඩායමේ නායක එෆ්. සී ද සේරම්ගේ ආරාධනාවෙන් මුලින්ම පන්දුවට පහර දීමට පැමිණි ටැමිල් යූනියන් ක්‍රීඩා සමාජයේ මුල්ම කඩුලු දෙක, තරගය ඇරඹී විනාඩි විස්සක් යන තැන, ලකුණු පුවරුව විසි හතරක් වෙද්දී ගැලවී වැටුණේය.
කඩුලු දෙක දැවී යන අතරවාරයේ මෝටර් රථයේ රැය පහන් කළ සතාසිවම් කෙළින්ම ක්‍රීඩක විවේකාගරයට ගොස් හොඳින් නා කියා ගත්තේය. පිතිකරණ ලැයිස්තුවේ හතරවැන්නා ලෙසින් පිටිය මැදට පැමිණියේය.
සතාසිවම්ගේ පහරක් දෙකක් එල්ල වන විට තමන්ට කොහේ නමුත් බරපතළ ලෙස වැරදී ඇති බව සිංහල ක්‍රීඩා සමාජ නායකයාට ඒත්තු ගියේය.
පෙරදින රාත්‍රියේ කරටි කැඩෙන්නට ගැසූ සතාසිවම් තරගයේ දිවා ආහාරයටත් ප්‍රථම ශතක සීමාවෙන් ඔබ්බට පැන ගත්තේය. ශතක ගමනේ දී සතාසිවම්ගේ පිත්තෙන් ගිලිහුණු පන්දුව දාහත් වරක් හතරේ සීමාව පසු කර තිබුණි.
මහදේවන් සතාසිවම් ගැන කතාව ලියද්දී අඩිපුඩි ගසා ක්‍රිකට් තවත් ගැසූ තවත් පතාක යෝධයෙක් සිහියට ආවේය.
ඒ ක්‍රිකට් ක්‍රීඩාවේ තුන් ඉරියව්වට මෙන්ම නැටුමට, අඩියට පුඩියට උපන් හපන්කම් ඇති ශ්‍රීමත් ගාෆිල්ඩ් සෝබර්ස් ගැනය.
ඒ 1973 බටහිර ඉන්දියානු කොදෙව් කණ්ඩායමේ එංගලන්ත සංචාරයේ ලෝඩ්ස් ක්‍රීඩාංගණයේ පැවති ටෙස්ට් තරගයයි. තරගයේ පළමු දිනය නිමා වන විට බටහිර ඉන්දීය කණ්ඩායමේ සෝබර්ස් ලකුණු 31ක් ලබා නොදැවී ක්‍රීඩා කරමින් සිටියේය.
එදින රාත්‍රියේ කණ්ඩායම සමග නවාතැන් ගෙන සිටි හෝටලයට නොගොස් වීදි සංචාරයේ ගිය සෝබර්ස්ට ඔහු මෙන්ම විනෝදයට බර මිතුරෙකු කලකට පසු මුණ ගැසුණේය.
වේගපන්දුවෙන් විකුම් පෑ අසමසම ‘මැකෝ’
සෝබර්ස්ට හමු වූ මිත්‍රයා ටෙස්ට් තරග තුනකට බටහිර ඉන්දියානු කණ්ඩායම නියෝජනය කළ දඟපන්දු කරුවෙකු වූ රෙජිනෝල්ඩ් ස්කාලට්ය.
කලකට පසු තමන්ගේ හමුවීම සමරා පොඩි අඩියක් ගසන්නට සෝබර්ස්- ස්කාලට් යුගල කල්පනා කළෝය.
මිතුරන් දෙදෙනාගේ විනෝදය පසුදා උදෑසන තෙක් ඇදී ගිය අතර තරගය දෙවන දිනයට ආරම්භ කරන්නට යාන්තම් මොහොතකට පෙර ඔවුන් දෙදෙනා විසිර ගියහ.
වෙරි මරගාතේ සිටි සෝබර්ස් කඩිමුඩියේ ක්‍රීඩක විවේකාගරයට ගොස් සීතල වතුර පොදක් ස්නානය කොට නායක රොහාන් කන්හායි සමඟ පන්දුවට පහර දෙන්නට පිටියට පිවිසියේය.
තරගය ආරම්භ වී බොබ් විලිස් තමාට එවූ මුල්ම පන්දු පහ පිත්තේ වදිනවා තියා තමා දුටුවේවත් නැති බව සෝබර්ස් පසුකලෙක ප්‍රකාශ කළේය.
නායක කන්හායි මෙන්ම අනෙකුත් බටහිර ඉන්දීය ක්‍රීඩකයින් සිනහ සාගරයක ගිලෙද්දී හයවැනි පන්දුව යන්තාම් පිත්තේ වද්දවා ගැනීමට සෝබර්ස්ට හැකියාව ලැබුණි.
පසුව 652/8ක් ලෙසින් නායක කන්හායි විසින් කොදෙව් ඉනිම අත්හිටුවන විට සෝබර්ස්ගේ නම ඉදිරියෙන් නොදැවුණ ලකුණු 150ක් ලියවී තිබුණි.
2006 වසරේ මාර්තුවේ දිනක ජොහැන්ස්බර්ග් නුවර දී ඕස්ට්‍රේලියානුවන් ලබා දුන් ලකුණු 435ක ඉලක්කය දකුණු අප්‍රිකානුවන් හඹා ගිය ආකාරය මෙරට ක්‍රීඩාලෝලීන්ට පවා අමතක නැත.
ශ්‍රී ලංකාවේ ක්‍රිකට් ප්‍රේක්ෂකයින්ට විදේශ ක්‍රීඩා තරග නැරඹිය හැකි කේබල් රූපවාහිනී පහසුකම් සුලබව නැති සමයක සංයුක්ත තැටි ඔස්සේ මෙම තරගය වේගයෙන් හුවමාරු වූ ආකාරය අදටත් මට හොඳින්ම මතකය.
ක්‍රිකට් ඉතිහාසයේ අමතක නොකළ හැකි තරගයක් වූ එම තරගයේ දකුණු අප්‍රිකානු වීරයා වූයේ පන්දු 111කින් ලකුණු 175ක් රැස් කළ හර්ෂල් ගිබ්ස්ය.
තරගයට පෙරදා රාත්‍රියේ මිතුරෙකු සමඟ උදෑසන එක වනතුරු බීමතින් සප්පායම් වූ ගිබ්ස් එදා එල්ල කළ හයේ පහරවල් ජොහැන්ස්බර්ග් නුවර තුනී වාතය කපාගෙන ගොස් නරඹන්නන් අතරටම වැටුණේය.
බීමත්කම ගැන කියන විට එංගලන්ත කණ්ඩායමේ හිටපු සුපිරි තුන් ඉරියව් සුරුවා ඇන්ඩෲ ෆ්ලින්ටොෆ් ද නම් දැරූ බේබද්දෙකි.
2003 වසරේ දකුණු අප්‍රිකානු කණ්ඩායමේ එංගලන්ත සංචාරයේ ලෝඩ්ස් ක්‍රීඩාංගණයේ පැවති තරගය අතරතුර සවස් යාමයේ පොඩි අඩියක් ගසන්නට ෆ්ලින්ටොෆ් ලක ලෑස්ති වුණේය.
එංගලන්ත නායකත්වයට හාහාපුරා කියා අලුතින්ම පත්වූ මයිකල් වෝන්, ෆ්ලින්ටොෆ්ගේ එක ‘ෂොට් එක’ දෙක තුනට පෙරළෙද්දී පසුදින උදෑසනම පන්දුවට පහර දීමට තිබෙන බව ඔහුට සිහි කළේය.
“හරි, හරි ලොක්කා. මං ඔයාට හෙට සීයක් ගහල දෙන්නම්කෝ” කී ෆ්ලින්ටොෆ් නැවත වීදුරුවක් පුරවා ගත්තේය.
පොරොන්දුව පරිදි යමින් පන්දු 146කින් ලකුණු 142ක් ලබා ගැනීම ෆ්ලින්ටොෆ් සමත් විය. නමුත් ෆ්ලින්ටොෆ් එදා එල්ල කළ හතරේ පහර 18 හෝ හයේ පහර පහ එංගලන්ත පරාජය වළක්වන්නට සමත් වූයේ නැත.
2007 බටහිර ඉන්දියානු කලාපයේ පැවති ලෝක කුසලාන තරගාවලිය අතරතුර එංගලන්ත කණ්ඩායමේ උපනායකයා ලෙසින් කටයුතු කළේ ද ෆ්ලින්ටොෆ්ය.
ක්‍රිකට් තිරය පිටුපස දැවැන්ත මෙහෙවරක් කළ නිහඬ චරිතය
නවසීලන්තය සමඟ පැවති තරගය පරාජය වීමෙන් සිත්තැවුලට පත් ෆ්ලින්ටොෆ් බීමතින් බෝට්ටු පදින්නට ගොස් උපනායකත්ව පට්ටම ගලවා ගත්තේය.
එලෙස හිතුවක්කාර, නොහික්මුණු ෆ්ලින්ටොෆ් බීමට තිත තැබුවේ ද අමුතුම සිදුවීමක් නිසාය.
ජර්මනියේ පැවති පාපන්දු තරගයක් නරඹන්නට ගිය ෆ්ලින්ටොෆ් නැවත එංගලන්තයට එන්නට ගුවන් යානයට ගොඩ වූයේ තරමක බීමතිනි. ඊටත් එහා ගිය මුත්‍රා කිරීමේ අවශ්‍යතාවක් ෆ්ලින්ටොෆ්ට පැන නැගී තිබුණි.
ගුවන් යානයට ගොඩවන්නට සිටි අනෙකුත් එංගලන්ත පාපන්දු රසිකයින් පරයා පෝලිමේ ඉදිරියටම ගොස් හැමට කලියෙන් ගුවන් යානයට ඇතුළු වන්නට ෆ්ලින්ටොෆ් සමත් විය.
ඇස් වසාගෙනම ගුවන් යානයේ වැසිකිළියට කඩිමුඩියේ රිංගා ගත් ෆ්ලින්ටොෆ් කලිසම පහත් කොට බර නිදහස් කරගන්නට සූදානම් විය.
කරුමක මහත. මූත්‍රා කිරීමට වැරදීමකින් වැසිකිළිය වෙනුවට නියමු කුටියට පැමිණ ඇති බව ෆ්ලින්ටොෆ්ට වැටහෙන විට සියල්ල සිදුවී හමාරය.
“මූව අයින් කරපල්ලා” ජර්මානු ගුවන් නියමුවෝ මහ හඬින් කෑ මොර දෙන්නට විය.
එදා ගුවන් යානයට ගොඩවන්නට බලා සිටි සිය ගණනක් වන එංගලන්ත පාපන්දු රසිකයින් මැදින් ෆ්ලින්ටොෆ් ගුවන් යානයෙන් ඉවත් කෙරුණ අතර ජීවිතයේ තමා ලද දරුණුම ලැජ්ජාවක් ලෙස ෆ්ලින්ටොෆ් එම සිද්ධිය හඳුන්වයි.
>> තවත් විශේෂාංග ලිපි සඳහා පිවිසෙන්න <<
