பங்களாதேஷ் அணியின் நட்சத்திர வீரரான முஷ்பிகுர் ரஹீம் சர்வதேச ஒருநாள் போட்டிகளில் இருந்து ஓய்வு பெறுவதாக அறிவித்துள்ளார்.
பாகிஸ்தான், ஐக்கிய அரபு இராச்சியத்தில் நடைபெற்று வரும் ஐசிசி சம்பியன்ஸ் கிண்ண கிரிக்கெட் தொடர் இறுதிக்கட்டத்தை எட்டியுள்ளது. மொத்தம் 8 அணிகள் பங்கேற்றிருந்த இத்தொடரில் இந்தியா மற்றும் நியூசிலாந்து அணிகள் இறுதிப்போட்டிக்கு முன்னேறியுள்ளன.
குறித்த தொடரில் A பிரிவில் இடம்பிடித்திருந்த பங்களாதேஷ் அணி விளையாடிய மூன்று போட்டிகளில் இரண்டு தோல்விகளைச் சந்தித்து லீக் சுற்றுடன் தொடரில் இருந்து வெளியேறியது. இந்த நிலையில், பங்களாதேஷ் அணியின் அனுபவ வீக்கெட் காப்பு துடுப்பாட்ட வீரர் முஷ்பிகுர் ரஹீம் சர்வதேச ஒருநாள் கிரிக்கெட்டில் இருந்து ஓய்வு பெறுவதாக அறிவித்துள்ளார். தனது இன்ஸ்டாகிராம் பதிவின் மூலம் இந்த அறிவிப்பை வெளியிட்டுள்ளார்.
இருப்பினும் அவர் டெஸ்ட் மற்றும் T20i போட்டிகளில் பங்களாதேஷ் அணிக்காக தொடர்ந்து விளையாட விரும்புவதாகவும் தெரிவித்துள்ளார். இதுகுறித்து அவர் தனது பதிவில், ‘இன்று முதல் நான் ஒருநாள் கிரிக்கெட்டில் இருந்து ஓய்வு பெறுகிறேன். கடந்த சில வாரங்கள் எனக்கு மிகவும் சவாலானதாக இருந்தது. அதனால் ஒருநாள் போட்டிகளில் இருந்து ஓய்வு பெறுவதற்கு இதுவே சரியான நேரம் என்று உணர்ந்தேன். மேலும் கடந்த 19 ஆண்டுகளாக எனக்கு உறுதுணையாக இருந்த குடும்பத்தினர், நண்பர்கள் மற்றும் இரசிகர்களுக்கு நன்றி’ என்று தெரிவித்துள்ளார்.
- ஒருநாள் கிரிக்கெட்டிலிருந்து ஓய்வு பெற்றார் ஸ்மித்
- சல்மான் அகா தலைமையில் நியூசிலாந்தினை எதிர்கொள்ளும் பாகிஸ்தான்
- சம்பியன்ஸ் கிண்ணத் தொடரிலிருந்து விலகிய ஆஸி. வீரர்
முஷ்பிகுர் ரஹீம், 2005 ஆம் ஆண்டு சர்வதேசப் போட்டிகளில் அறிமுகமானார். இங்கிலாந்து அணிக்கு எதிரான முதல் போட்டியின்போது, ரஹீமின் வயது வெறும் 18 ஆண்டுகள் மற்றும் 17 நாட்களே ஆகும். தொடர்ந்து அடுத்த ஓராண்டு இடைவெளியிலேயே அதாவது 2006 ஆம் ஆண்டிலேயே ஒருநாள் சர்வதேசப் போட்டிகளில் களம்கண்டார். தற்போது அவருக்கு வயது 37 என்பது குறிப்பிடத்தக்கது.
கடந்த 2006 ஆம் ஆண்டு ஜிம்பாப்வேக்கு எதிரான ஒருநாள் போட்டியின் மூலம் சர்வதேச ஒருநாள் கிரிக்கெட்டில் அறிமுகமான முஷ்பிகுர் ரஹீம், பங்களாதேஷ் கிரிக்கெட்டின் மிகவும் அனுபவம் வாய்ந்த மற்றும் வெற்றிகரமான வீரர்களில் ஒருவராக இருந்து வருகிறார்.
முஷ்பிகுர் ரஹீம் ஒருநாள் போட்டிகளில் பல ஆட்டநாயகன் விருதுகளை வென்றுள்ளார். மேலும், தனது அணியை தலைவராகவும் வழிநடத்தியுள்ளார். அவர் தனது 274 சர்வதேச ஒருநாள் போட்டிகளில் 9 சதங்கள் மற்றும் 49 அரைச் சதங்களுடன் 7795 ஓட்டங்களைக் குவித்துள்ளார். 37 ஒருநாள் போட்டிகளில் தலைவராக செயல்பட்டு 11 வெற்றிகளையும் பெற்றுக் கொடுத்துள்ளார்.
இது தவிர, ஒருநாள் கிரிக்கெட்டில் பங்களாதேஷ் அணிக்காக அதிக ஓட்டங்கள் குவித்த மூன்றாவது வீரர் எனும் பெருமையையும் அவர் பெற்றுள்ளார். அதேபோல, விக்கெட் காப்பாளராகவும் சிறப்பாக செயல்பட்டுள்ள அவர், 243 பிடியெடுப்புகள் மற்றும் 56 ஸ்டம்பிங் ஆகியவற்றை செய்துள்ளார் என்பதும் குறிப்பிடத்தக்கது.
இதேவேளை, முஸ்பிகுர் ரஹீம் இன்னும் 6 டெஸ்ட் போட்டிகளில் விளையாடினால், பங்களாதேஷ் அணிக்காக 100 டெஸ்ட் போட்டிகளில் விளையாடிய முதல் வீரர் என்ற பெருமையை பெறுவார்.
>>மேலும் கிரிக்கெட் செய்திகளைப் படிக்க<<
