නිශාන් මධුශ්ක ප්‍රනාන්දු මොරටු පුරවරයෙන් ක්‍රිකට් ලොවට දායාද වූ තවත් එක් දක්ෂ ක්‍රීඩකයෙකි. මොරටු විද්‍යාලය නියෝජනය කරමින් ශ්‍රී ලංකා වයස අවුරුදු 19න් පහළ යොවුන් කණ්ඩායමට ද දක්ෂතා එක් කළ ඔහු ගැන Thepapare.com තබන සටහනකි මේ.
සුමංගල ක්‍රීඩකයෝ තෙවන වතාවටත් මොරටුව තණතිල්ලේ ජයකෙහෙළි නංවති
පානදුර ශ්‍රී සුමංගල විද්‍යාලය සහ මොරටු මහා විද්‍යාලය ……
නිශාන් හැදී වැඩෙන පරිසරය ක්‍රිකට්වලින් ස්වයංෂෝපිත වීම මේ ගමනේ මූලාරම්භයයි. ඔහුට පිත්තත්, පන්දුවත් හුරු වෙන්නේ පාසල් යාමටත් මත්තෙන් ය. කුඩා කාලයේ දී ම ඔහු ක්‍රිකට් ක්‍රීඩාවේ නිපුනයෙක් කළේය. මේ නිසා ගමේ ඔහුට වඩා වැඩිමල් ක්‍රිකට් ක්‍රීඩකයන් අතර ද නිශාන්ට තැනක් ලැබුණි.
“පුංචි කාලෙ ගැන තියෙන මතකයේ පළමු තැන තියෙන්නේ ක්‍රිකට් ගහන්න ගිහිල්ල ගෙදරින් කෝටු පාරවල් කාපු එක තමයි. එහෙම වුනේ මම නිතරම ක්‍රිකට් ක්‍රීඩාවේම නියැලුණ නිසයි. අම්ම තමයි මේ වැඩේට එච්චරම කැමති වුනේ නැත්තෙ. ඒකට මූලික හේතුව වුනේ පොත් පත්වල වැඩ මඟ හැරීම. තාත්ත ටිකක් ෂේප්. ඒත් පස්සෙ කාලයේ දී අම්ම තමයි ළඟින්ම ඉඳගෙන මගේ ක්‍රිකට් ක්‍රීඩාව ගැන සොයා බැලුවේ.” ඒ නිශාන් තමන්ගේ ක්‍රිකට් ක්‍රීඩාවේ ආරම්භය ගැන කියන කතාව ය.
නිශාන්ගේ පවුලේ සිව්දෙනෙකි. පියා සාමාන්‍ය රැකියාවක නියුතු ය. අම්මා ගෘහණියක් ලෙසින් කුටුම්බයේ පරිපාලනය මැනවින් කරගෙන යන්නේ අධ්‍යාපනයට, ක්‍රීඩාවට සහ අනෙකුත් අවශ්‍යතාවන් ද පිරිමහ ගනිමිනි. නිශාන්ගේ සොයුරන් දෙදෙනෙක් මේ වෙද්දී වයස අවුරුදු 13න් පහළ වයස් කාණ්ඩයේ ක්‍රිකට් පුහුණුවීම්වල නිරත වෙති.
නිශාන් පළමු වරට පාසල් ක්‍රිකට් කණ්ඩායමක් නියෝජනය කරන්නේ 2012 වසරේ දී ය. ඒ මොරටු විද්‍යාලයීය වයස අවුරුදු 13න් පහළ කණ්ඩායමට ය. ඊළඟ වසරේ දී ම එම වයස් කාණ්ඩයේ කණ්ඩායමේ නායකත්වය බාර වෙන්නේ නිශාන්ට ය. නිශාන් පාසල් ක්‍රිකට් තරග සමය නිමා කරන්නේ සෑම වයස් කාණ්ඩයකම නායකත්වයේ වගකීම ඉටු කරමිනි. මේ ගෙවී ගියේ එහි අවසන් වසරයි. නිශාන් දක්ෂතා සපිරි දකුණත් පිතිකරුවෙක්ට අමතරව කඩුලු රකින්නෙක් ද වේ.
“නිශාන් මට හමුවෙන්නෙ පාසලේ විවේකකාලයේ සෙල්ලම් කරමින් සිටිද්දී. දවස් දෙක තුනක් මම ඔහුව නිරීක්ෂණය කරමින් සිටියා. ඒ අතර දවසක් ඔහු ක්‍රිකට් පුහුණුවීමට ආවා. මේ පැමිණීම ඔහුට දිගු ගමනක් යන්නට හැකි ක්‍රීඩකයෙක් බවට මට ඉඟි පැවසුවා. මොකද ඔහුට ක්‍රිකට් ක්‍රීඩාවේ නියුතු වීමට දැඩි උවමනාවක් තිබුණා. ඒ වගේම ඔහු දැඩි කැපවීමකින් ක්‍රීඩාවේ නියුතු වුනා.” නිශාන්ගේ ක්‍රිකට් පුහුණුකරු, මොරටු විද්‍යාලයේ ප්‍රධාන පුහුණුකරු ප්‍රසන්න දිසානායක මහතා නිශාන් ගැන මතකය අවදි කළේය.
නිශාන් ගේ කුඩා කළ, ක්‍රිකට් ක්‍රීඩාව ගෙවී යන්නේ උනන්දුවත් උවමනාවත් මත ය. තැනක දෙතැනක යම් යම් දක්ෂතා දැක්වූව ද එය කණ්ඩායමේ රැඳී සිටීමට පමණක් ප්‍රමාණවත් වූ බවකි පුහුණුකරු පවසන්නේ.
“නිශාන් මුල් කාලයේ දී වැඩිය කතා බහට ලක් නොවූ ක්‍රීඩකයෙක්. නමුත් ඔහු අනෙක් ක්‍රීඩකයන් හා සමඟ යමක් කළා. ඒක ඔවුන් හා සම තත්ත්වයේ දැක්වූ දක්ෂතාවක්. ඔහු ක්‍රිකට් ක්‍රීඩාවේ නිපුණතා පෙන්වන්නෙක් වන්නේ අවුරුදු 17න් පහළ වයස් කාණ්ඩයේ අවසන් වසරේ දී. ඒ වසරේ දී ම වයස අවුරුදු 19න් පහළ කණ්ඩායම නියෝජනය කරන නිශාන් ලකුණු දහසක් වාර්තා කරනවා. ඊට පස්සෙ මේ වසරේ දී ද ඔහු ලකුණු දහසක් වාර්තා කරනවා. ඔහුගේ මේ දක්ෂතාත් සමඟින් නිශාන්ට ක්‍රිකට් පිටියේ යන්න බොහෝ දුර ගමනක් තියෙනවා. මම විශ්වාස කරනවා ඔහුට ඒ ගමන යන්න පුළුවන් වේවි කියලා.” ප්‍රසන්න දිසානායක මහතා පැවැසුවේ ය.
වයස අවුරුදු 17න් පහළ අවසන් වසරෙන් පසුව නිශාන්ගේ ක්‍රිකට් කතාව ලියැවෙන්නේ වෙනත්ම මාතෘකාවන් යටතේ ය. ඔහු ගේ මේ දක්ෂතාවන් ශ්‍රී ලංකා වයස අවුරුදු 19න් පහළ කණ්ඩායමේ සාමාජිකත්වය ලබා ගැනීම දක්වා දිගු වන්නේ ය.
“මට ශ්‍රී ලංකා යොවුන් කණ්ඩායම හා එක්වෙන්න පුළුවන් කියන හැඟීම දුන්නේ ප්‍රසන්න සර්. ඔහු සෑම අවස්ථාවකම මාව දිරිමත් කළා. මට අවශ්‍ය සෑම උපදෙසක්ම සහ පහසුකමක් ලබා දීමට කටයුතු කළා. තේරීම් තරගවලට යද්දී මම කරන්න ඕන මොකක්ද කියන එක තේරුම් කරල දුන්නා. මට තිබුණේ මගේ දක්ෂතා දක්වන්න විතරයි. මට හිතන්න කිසිම දෙයක් ප්‍රසන්න සර් ඉතිරි කළේ නැහැ. අනෙක් අතට ප්‍රසන්න සර් නිතරම කිවුවේ ඕනෑම තරගයක් මහා ලොකුවට හිතන්න එපා, ඒක තවත් එක් පාසල් තරගයක් විතරයි කියල හිතන්න කියලයි. ලකුණු අතරට එන්න ඒක මට ඉතා පහසුවක් වුණා.” නිශාන් පැවසුවේ ය.
ඔහු පළමු වරට ශ්‍රී ලංකා වයස අවුරුදු 19න් පහළ යොවුන් කණ්ඩායම නියෝජනය කරන්නේ ආසියානු කුසලාන තරගාවලියක් වෙනුවෙනි. එතැනින් පසු 2017 වසරේ ලෝක කුසලාන තරගාවලිය, බංග්ලාදේශ සංචාරය සහ ඉන්දීය සංචාරයකට ද ඔහු සහභාගී වෙන්නේ ය. එමෙන්ම ඉන්දීය කණ්ඩායම මෙරට පැමිණි අවස්ථාවක සත්කාරක කණ්ඩායම නියෝජනය කිරීමට අමතරව පළමු වරට පැවති Emerging Asia Cup තරගාවලියට සහභාගී වූ කණ්ඩායමේ සාමාජිකත්වය ලබා ගැනීමට ඔහු සමත් වන්නේ ය.
“සහභාගී වූ තරග සංචාර අතරින් අමතකම නොවන ඉනිම වෙන්නේ ලෝක කුසලාන තරගාවලියේ නවසීලන්තයට එරෙහිව ක්‍රීඩා කළ ඉනිම. එම තරගයේ දී මම නොදැවී ලකුණු 114ක් ලබා ගන්නවා. ඒ වගේම සිම්බාබ්වේ කණ්ඩායමට එරෙහිව වාර්තා කළ ශතකයක් මගේ හිතේ තියෙන ඉනිමක්.” නිශාන් ශ්‍රී ලංකා යොවුන් කණ්ඩායම හා එක්ව නිමා කළ කාලයේ මතකය සිහිපත් කළේය.
නිශාන් මේ දක්ෂතා දක්වන විට ශ්‍රී ලංකා පාසල් වයස අවුරුදු 19න් පහළ පළමු කොටසේ ක්‍රිකට් තරගාවලියේ නිමා වූ තරග සමයේ දී ද නැවත වතාවක් ලකුණු දහසේ සීමාව පසු කරන්නේ ය. ඔහු මෙවර තරග 13ක ඉනිම් 20කට ක්‍රීඩා කරමින් ලබා ගන්නා ලද ලකුණු ප්‍රමාණය 1386කි. කණ්ඩායමේ නායකත්වයේ වගකීම ද ඉටු කරමින් නිශාන් මේ දක්ෂතාව දැක්වූයේ ශතක 6ක් සහ අර්ධ ශතක 5ක් ද තම ලකුණු ගිණුමට බැර කර ගනිමිනි.
එම ඉනිම් අතර හොඳම ඉනිම වන්නේ මොරටුව වේල්ස් කුමර විද්‍යාලයට එරෙහිව නොදැවී වාර්තා කළ ලකුණු 172යි. ඊට අමතරව මීගමුව මාරිස් ස්ටෙල්ලා විද්‍යාලයට එරෙහිව ලකුණු 121ක්, මීගමුව ජෝසප් වාස් විද්‍යාලයට එරෙහිව ලකුණු 161ක්, ගල්කිස්ස සාන්ත තෝමස් විද්‍යාලයට එරෙහිව නොදැවී ලකුණු 105ක්, කෑගල්ල සාන්ත මරියා විද්‍යාලයට එරෙහිව ලකුණු 114ක් සහ කැළණිය ගුරුකුල විද්‍යාලයට එරෙහි ව ලකුණු 122ක් ද වාර්තා කරන්නේ ය.
ක්‍රිකට් ආයතනයෙන් ක්‍රීඩකයන්ගේ මතට තිත තබන්නේ ඇයි?
ශ්‍රී ලංකා ක්‍රිකට් ක්‍රීඩකයන් හට තරගාවලි අතරතුර …..
නිශාන්, මහනුවර ධර්මරාජ විද්‍යාලය (74), වත්තල සාන්ත අන්තෝනි විද්‍යාලය (78), මාතර සාන්ත සර්වේසස් විද්‍යාලය (54), කොළඹ මහානාම විද්‍යාලය (90) සහ මොරටුව සාන්ත සෙබස්තියන් විද්‍යාලයට (84) එරෙහිව අර්ධ ශතක වාර්තා කරන්නේ ය.
“මගේ පාසල් කාලයේ අවසන් අවුරුද්දේ දී ලකුණු 1000ක් සම්පූර්ණ කරන්න ලැබීම ගැන මම ඉතා සතුටු වෙනවා. මේ දක්ෂතාව දක්වන්නට මට මගේ කණ්ඩායම ලබා දුන් සහයෝගය ඉතා වැදගත්. මම ඔවුන්ට ස්තූතිවන්ත වෙනවා, මේ ශක්තිය ලබා දීම ගැන.” නිශාන් තම සහෝදර ක්‍රීඩකයන් ගැන සිහිපත් කළේය.
නිශාන් පාසල් පිටිය නියෝජනය කරද්දී ම පළමු පෙළ අන්තර් ක්‍රීඩා සමාජ පිටියේ ද දක්ෂතා දැක්වීමට සමත් වන්නේ ය. ඒ කොළඹ කෝල්ට්ස් ක්‍රිකට් සමාජය නියෝජනය කරමිනි. එහි දී තරග දෙකක ඉනිම් 3කට ක්‍රීඩා කරන නිශාන් අර්ධ ශතකයක් ද සමඟින් ලකුණු 114ක් ලබා ගන්නේ ය. ඔහුගේ මේ වසරේ හොඳම ඉනිම බවට පත් වෙන්නේ එන්. සී. සී. කණ්ඩායමට එරෙහි ව රැස් කළ ලකුණු 64යි.
“කෝල්ට්ස් ක්‍රිකට් සමාජය නියෝජනය කරමින් ක්‍රීඩා තරග දෙක මට විශාල අත්දැකීමක් වුනා. ජ්‍යෙෂ්ඨ ක්‍රීඩකයන් වැඩි ප්‍රමාණයක් සමඟ මට ක්‍රීඩා කරන්නට ලැබීම ම වාසනාවක්. එතැන දී ඔවුන් මාව නවකයෙක් විදිහට පිළිගත්තේ නැහැ. බොහොම සුහදව කටයුතු කළා.” නිශාන් පවසන්නේ ය.
නිශාන්ගේ මේ ගමන කැපවීමත් උනන්දුවත් මත පැමිණි ගමනකි. එම ගමනේ දී ඔහු ළඟින් සිටි ආදරණීය අම්මාත්, තාත්තාත් ඔහු සිහිපත් කරන්නේ ඔවුන් දෙදෙනා නොවන්නට ඔහුට මේ ගමන පැමිණිය නොහැකි වනු ඇතැයි පවසමිනි. එසේම පුහුණුකරු ප්‍රසන්න දිසානායක මහතා සේ ම අමිල කළුගලගේ මහතාත් නිශාන් මහත් ගෞරවයෙන් සිහිපත් කළේය.
නිශාන් මධුශ්ක ප්‍රනාන්දු ගැන අපට අදටත් වඩා හෙට කතා කරන්නට හැකි වෙනු ඇත. ඒ ඔහු මේ වන විට ක්‍රිකට් පිටියේ හිමිකර ගෙන සිටින ස්ථානය ගැන සිතා බලන විට ය.
“ඕනෑම ක්‍රිකට් ක්‍රීඩකයෙක්ගේ බලාපොරොත්තුව රට වෙනුවෙන් ක්‍රීඩා කරන එක. මටත් ඒ බලාපොරොත්තුව තිබෙනවා. ඒක අභියෝගයක්. මට විශ්වාසයි ඒ අභියෝගය ජයග්‍රහණය කරන්නට මට හැකි වෙයි කියලා.”
නිශාන්ගේ බලාපොරොත්තුව ඉෂ්ට වේවායි ThePapare.com අප ද සුබ පැතුම් එක් කරමු.
>> තවත් විශේෂාංග ලිපි සඳහා පිවිසෙන්න <<
