விடைபெற்றார் கால்பந்து நட்சத்திரம் ககா

பிபாவின் 2002ஆம் ஆண்டு உலகக் கிண்ணத்தை வென்ற பிரேசில் அணியில் இடம்பிடித்தவரும் AC மிலான் மற்றும் ரியல் மெட்ரிட் ஆகிய பிரபல அணிகளின் முன்னாள் மத்தியகள வீரருமான ரிகார்டோ ககா கால்பந்து போட்டிகளில் இருந்து தனது ஓய்வை அறிவித்துள்ளார்.  

தற்பொழுது 35 வயதுடைய ககா பிரேசிலின் சாவோ போலோ அணிக்காக தனது கால்பந்து வாழ்வை ஆரம்பித்தார். மிக அண்மை வரை ஓர்லான்டோ சிட்டி MLS கழகத்திற்காக அவர் ஆடினார்.

சர்வதேச அரங்கில் இருந்து ஓய்வு பெறும் இங்கிலாந்து ஜாம்பவான் ரூனி

இங்கிலாந்து தேசிய கால்பந்து அணிக்காக அதிக கோல்கள் பெற்ற வீரரான வேய்ன் …..

கடந்த ஒக்டோபரில் முடிவடைந்த ஓர்லான்டோ பருவகால போட்டிகளிலேயே ககா கடைசியாக கால்பந்து போட்டிகளில் ஆடியிருந்தார். அது போன்றே AC மிலான் கழக இயக்குனர் பதவி ஒன்றுக்கு தான் அழைக்கப்பட்டதை கடந்த நவம்பரில் ககா உறுதி செய்திருந்தார்.

உலகக் கிண்ணம், ஐரோப்பிய கிண்ணம்-சம்பியன்ஸ் லீக் மற்றும் பல்லோன் டிஓர் ஆகிய மூன்றையும் வென்ற எட்டு வீரர்களுள் ஒருவராக  இவர் உள்ளமை இவரது கால்பந்து பிரகாசத்தை உறுதி செய்கின்றது.

கிறிஸ்தவ பக்தரான ககா கடந்த ஞாயிறன்று தனது டுவிட்டரில் கூறியதாவது, “தந்தையே, நான் கற்பனை செய்ததை விடவும் இது மிக அதிகமானதாகும். உங்களுக்கு நன்றி! அடுத்த பயணத்திற்கு நான் தயாராகிவிட்டேன். இயேசுவின் பெயரால் ஆமென்.” என்று குறிப்பிட்டுள்ளார்.

எதிரணி வீரர்களை ஏமாற்றி பந்தை கடத்திச் செல்வதில் பிரபலம் பெற்ற ககா, தனது அற்புத ஆற்றலால் சக வீரர்களுக்கு கோல்பெறும் பல வாய்ப்புகளையும் பெற்றுக் கொடுத்துள்ளார். பிரேசிலுக்காக 92 போட்டிகளில் விளையாடி இருக்கும் அவர் 29 கோல்களை போட்டுள்ளார்.

தனது நாட்டுக்காக உலகக் கிண்ணத்தை வென்ற ககா, 2007இல் மிலான் அணி சம்பியன்ஸ் லீக்கை வெல்ல உதவினார். அதே ஆண்டில் உலகின் மிகச்சிறந்த வீரருக்கான பல்லோன் டிஓர் விருதையும் சுவீகரித்தார்.

இத்தாலியின் பலம்மிக்க கழகத்திற்காக அவர் ஆடிய 2003 தொடக்கம் 2009 வரையான ஆறு ஆண்டு காலம் தனது திறமையை உச்சபட்சமாக வெளிக்காட்டிய காலமாக சந்தேகமின்றி குறிப்பிடலாம். இந்த காலப்பிரிவில் அவர் 2004ஆம் ஆண்டு சீரியஸ் ஏ பட்டம் மற்றும் 2007இல் கழக உலகக் கிண்ணம் என்பவற்றை வென்றார்.

அதனைத் தொடர்ந்து அப்போதைய உலக சாதனை தொகையான 68.5 மில்லியன் யூரோவுக்கு 2009 ஜுனில் ரியல் மெட்ரிட் அணிக்கு காகா ஒப்பந்தமானார். அவர் ஆடிய அணி 2011 கொபா டெல் ரெய் கிண்ணத்தை வென்றதோடு அந்த ஆண்டு இறுதியில் லீக் பட்டத்தையும் கைப்பற்றியது.

2018 FIFA உலகக் கிண்ணத்திலிருந்து ஸ்பெயின் நீக்கப்படும் அபாயம்

ஸ்பெயின் கால்பந்து சம்மேளனத்தில் இடம்பெறும் அரசியல் தலையீடு………

மோசமான முழங்கால் காயங்களால் பாதிக்கப்பட்டிருந்த ககா, 2013இல் ஒரே ஒரு பருவத்திற்கு மிலான் அணிக்கு திரும்பினார். அடுத்த ஆண்டு அவர் அந்த அணியில் இருந்து வெளியேறி ஓர்லான்டோவுக்கு சென்றார்.

உலகக் கிண்ணம், ஐரோப்பிய கிண்ணம்-சம்பியன்ஸ் லீக் மற்றும் பல்லோன் டிஓர் ஆகிய மூன்றையும் வென்ற ஏனைய ஏழு வீரர்களும் வருமாறு:

பொப்பி கார்டன், கெர்ட் முல்லர், பிரன்ஸ் பக்கன்போர், பவோலோ ரொஸ்ஸி, சினடின் சிடேன், ரிவால்டோ மற்றும் ரொனால்டினோ.

ககாவின் வெற்றிகள்