ක්‍රිකට් තරග බිමෙහි මෑත කාලීනව බිහි වූ සාර්ථකම ඉන්දියානු නායකයා කවුරුන් දැයි යමෙක් ඔබගෙන් විමසුවහොත් නිතැතින්ම ඔබගේ මුවඟට පැමිණෙන පිළිතුරු වනුයේ අන් කවරෙකුත් නොව ICC කුසලාන ත්‍රිත්වයක් තම මව්බිම වෙත උරුමකර දුන් හිටපු නායක මහේන්ද්‍ර සිං දෝනිගේ නාමයයි.
විස්ඩන් 21 වැනි සියවසේ වටිනාම ටෙස්ට් ක්‍රීඩකයා ශ්‍රී ලංකාවෙන්
ඉන්දීය කණ්ඩායම ජාත්‍යන්තර ක්‍රිකට් පිටියේ අද වන විට ඔවුන්ගේ ආධිපත්‍යය පතුරවා හරමින් සෙසු කණ්ඩායම් වලට පවා ප්‍රබල තර්ජනයක් බවට පත්වී තිබෙන්නේ දෝනිගේ එම අසහාය නායකත්ව පෞරුෂය මතින් ගොඩනැඟුණු ජයග්‍රාහී රිද්මය නිසාවෙන් බව අදටත් එරට ක්‍රිකට් ක්‍රීඩාලෝලීන් දැඩිව විශ්වාස කරනා කාරණාවකි.
ලෝක කුසලාන ද්විත්වයක්, එක් ශූරයින්ගේ කුසලානයක් ඇතුළුව ප්‍රධාන පෙළේ ICC තරග ඉසව් තුනක කිරුළු තම මව්බිම වෙත දායාද කළ මහේන්ද්‍ර සිං දෝනි ඔහුගෙන් පසුව නායකත්ව යෂ්ටිය සුපිරි පිතිකරු විරාත් කෝලි හට භාර කළේ ඉන්දීය කණ්ඩායමට තවත් ඓතිහාසික තරගාවලි ජයග්‍රහණයක සතුට සැමරීමට ඉඩප්‍රස්තාව සලසා දෙමිනි. 2018/19 වසරේ දී ඕස්ට්‍රේලියානු කණ්ඩායම එරට තුල දී ම පරාජයට පත් කර වාර්තා පොත් සියල්ල අළුත් කළේ කෝලි ප්‍රමුඛ ඉන්දීය කණ්ඩායම ICC ටෙස්ට් ශ්‍රේණිගත කිරීම්හී පළමු ස්ථානය දක්වා ඉදිරියට පැමිණීමට ද ඒ අනුව සමත්කම් දැක්විය.
විරාත් කෝලි නොමැති අවස්ථාවන්හී එම හිඩැස පුරවන උපනායක රෝහිත් ශර්මා ද 2018 වසරේ දී ආසියානු කුසලානය සහ 2019 වසරේ දී නිදහස් කුසලාන ජයග්‍රහණයන් කරා ඉන්දීය කණ්ඩායම මෙහෙය වූයේ විස්සයි විස්ස තරග ආකෘතිය පිළිබඳ ඔහු සතුව ඇති සුවිසල් දැනුම් සම්භාරය උපයෝගී කරගනිමිනි.
IPL තරගාවලි ඉතිහාසයෙහි සාර්ථකම කණ්ඩායම් කිහිපය අතුරින් ඉහළින්ම නම කියැවෙන මුම්බායි ඉන්ඩියන්ස් කණ්ඩායම සිව්වතාවක් ශූරතාව කරා රැගෙන යමින් තිරය පිටුපස සිට දැවැන්ත සේවයක් ඉටු කළ ප්‍රධාන බලවේගය ද රෝහිත් ෂර්මා බව නොරහසකි.
ශ්‍රී ලංකා – බංග්ලාදේශ ටෙස්ට් තරගාවලියත් නැවත පැවැත්වීම අසීරුයි
මොවුන් තිදෙනා යටතේම තරග වැද තිබෙන ක්‍රීඩකයෙකු ලෙස හිටපු ඉන්දීය කඩුලු රකින ක්‍රීඩක පාර්තිව් පටෙල් ඔවුන් එකිනෙකා තම කණ්ඩායම් සාමාජිකයින් හැසිරවීමේ දී යොදා ගන්නා විවිධ උපක්‍රමයන් සහ භාවිත කරන්නා වූ නොයෙක් ශෛලීන් පිළිබඳ සවිස්තරාත්මක පැහැදිලි කිරීමක් ඉදිරිපත් කර සිටියේ YouTube නාලිකාවක් ඔස්සේ පසුගිය දා පැවති සාකච්ඡාවක් අතරතුර දී ය.
“දෝනිගේ මම දකින විශේෂත්වය තමයි ඔහුට තියෙනවා හැකියාවක් එක් එක් ක්‍රීඩකයාට ආවේණික වුන හැකියා දක්ෂතාවන් මොනවද සහ ඒවා හරි තැන හරි වෙලාවට යොදා ගන්න ඕන කොහොමද කියන එක ගැන අවබෝධයක්. ඔහු කිසිම විදියකින් තවත් ක්‍රීඩකයෙක්ගේ නිදහස සීමා කරන්න උත්සාහ කරන්නේ නැහැ. හැමවෙලාවෙම ඔහු උපදෙස් දෙන්නේ පිටිය මැදට ගියාම තමන්ට අනන්‍ය වුන තරග රටාවක් තියෙනවා ඒ ගැන විශ්වාසය තියලා සෙල්ලම් කරන්න කියලා.”
“රෝහිත් ගැන කතා කළොත් ඔහු වැඩ කරන්නෙ සැලසුමකට අනුව. කණ්ඩායමේ හැම සාමාජිකයෙක් ගැනම හොඳ අවබෝධයක් ඔහුට තියෙනවා වගේම ඒ ක්‍රීඩකයින්ට කලට වේලාවට පැවරිය යුතු වැඩ කොටස ගැනත් මනා දැනීමක් ඔහු සතුව තියෙනවා. 2014 වසරෙන් පටන් අරගෙන අද වෙනකොට ඔහු ඇවිල්ල තියෙන ගමන් මඟ දිහා ආපහු හැරිලා බැලුවම ඔහුට සතුටු වෙන්න පුළුවන් කාරණා රැසක් ඉතිරි වෙලා තියෙනවා. මොකද ආරම්භක පිතිකරු භූමිකාව රඟ දක්වනවාට අමතරව නායකයෙකු විදියටත් ඔහු මේතාක් අත්පත් කරගෙන ඇති සාර්ථකත්වය අති විශිෂ්ටයි.”
ප්‍රබල පිතිකරුවන් දෙදෙනෙක් සංචිතයෙන් ඉවත් කළේ මොන පදනමකින් ද?
දෝනි සහ ශර්මා දෙදෙනාගේ නායකත්ව ශෛලීන් සමඟ සන්සන්දනය කිරීමේ දී ඊට හාත්පසින්ම වෙනස් ක්‍රමෝපායන් අනුගමනය කරන වත්මන් ඉන්දීය කණ්ඩායම් නායක විරාත් කෝලී සම්බන්ධයෙන් ද අදහස් දක්වා සිටි පාර්තිව් එහි දී පෙන්වා දී සිටියේ කෝලිගේ අක්‍රමණශීලී තරග සැලසුම් නොවන්නට ඕස්ට්‍රේලියාව වැනි ප්‍රබල ප්‍රතිවාදියෙකු ඔවුන්ගේ භූමිය තුල දී ම පරාජයට පත් කිරීම සැබෑ කර ගත නොහැකි සිහිනයක්ම පමණක් වනු ඇති බවයි.
“කණ්ඩායමේ පෙරමුණ අරගෙන ඉදිරියෙන්ම ඉන්න කැමති පුද්ගලයෙක් විදියට කෝලි සිතන පතන ආකාරය සෙසු ක්‍රීඩකයින්ට වඩා ඇත්තටම තරමක් වෙනස්. දෝනි සහ ෂර්මා ක්‍රීඩකයින් සන්සුන්ව තියා ගන්න උත්සහ කරන අතරේ කෝලිගේ උපක්‍රමය වෙන්නේ ප්‍රතිවාදීන්ට එරෙහිව ආක්‍රමණශීලීව තරග වඳින විදියට ක්‍රීඩකයින්ගේ මානසික මට්ටම නිර්මාණය කරන එක. ඒ ක්‍රමය නිසාත් සාර්ථක ප්‍රතිඵල රැසක් අත්පත් කරගැනීමට ඔහු ඇතුළු ඉන්දීය කණ්ඩායම සමත්ව තියෙනවා.”
>> තවත් ක්‍රිකට් පුවත් සඳහා පිවිසෙන්න <<
