ඕස්ට්‍රේලියානු කණ්ඩායමේ පුහුණුකරු වශයෙන් ඇතැම් ක්‍රීඩකයන්ව කොන් කිරීමට ලක් කළ බවට ඇති චෝදනාව සම්බන්ධව තමන් කිසි දිනෙක සමාව ඉල්ලා නොසිටින බව හිටපු ඕස්ට්‍රේලියානු ක්‍රිකට් ක්‍රීඩක ජස්ටින් ලැන්ගර් පවසනවා.
විස්සයි විස්ස ලෝක කුසලාන ජයග්‍රහණයක් සහ අළුබඳුන තරගාවලි ජයග්‍රහණයක් ඕස්ට්‍රේලියාවට ගෙන ආ පුහුණුකරුවෙකු වන ලැන්ගර් පසුගිය පෙබරවාරි මාසයේ දී සිය ධුරයෙන් සමුගත්තේ ඔහුට ක්‍රීඩකයන්ගෙන් සහයෝගය නොලැබෙන බව ප්‍රසිද්ධ වීමත් සමඟයි.
ඕස්ට්‍රේලියානු ක්‍රිකට් ආයතනයට යැවූ සමුගැනීමේ ලිපියේ ඔහු විසින් සඳහන් කොට තිබුණේ තමන් පුහුණුකරුවෙකු ලෙස “තද වැඩි වූයේ නම්” ඒ පිළිබඳව සමාව ඉල්ලා සිටින බවයි.
එහෙත් මේ සතියේ දී බටහිර ඕස්ට්‍රේලියානු අග්‍රාණ්ඩුකාර කිම් බීස්ලි හා සිදු කළ සාකච්ඡාවක දී ඔහු පවසා ඇත්තේ ක්‍රිකට් ක්‍රීඩාව බරපතළ ලෙස ගැනීම සම්බන්ධයෙන් තමන් කිසිදිනෙක සමාව ඉල්ලා නොසිටින බවයි.
ස්ටීව් වෝ, ඇලන් බෝඩර්, රිකී පොන්ටින් ආදී තද තීරණ ඇති ඕස්ට්‍රේලියානු නායකයින් සහ බොබ් සිම්ප්සන් වැනි පුහුණුකරුවන් යටතේ ක්‍රීඩා කොට ලද අත්දැකීම් ඊට හේතු වූ බව ඔහු පවසා තිබෙනවා.
“නවක ක්‍රීඩකයන් සම්බන්ධව මම තද වැඩියි, බරපතළ වැඩියි කියන එක ගැන කතාවක් තිබුණා. ඒත් ඒ මම ඉගෙන ගත්තු හැටි” යැයි ඔහු කියා තිබුණා.
>> තවත් ක්‍රිකට් පුවත් සඳහා පිවිසෙන්න <<
