ஐசிசி T20 உலகக்கிண்ணத்துக்கான இலங்கை குழாத்தில் யாழ்ப்பாணத்தைச் சேர்ந்த தமிழ்பேசும் சுழல் பந்துவீச்சாளர் விஜயகாந்த் வியாஸ்காந்த் இணைக்கப்பட்டமைக்கான காரணத்தை தேர்வுக்குழு வெளியிட்டுள்ளது.
T20 உலகக்கிண்ணத்துக்கான இலங்கை குழாம் தேர்வு தொடர்பில் அறிவிக்கும் ஊடக சந்திப்பு இன்று திங்கட்கிழமை (13) இலங்கை கிரிக்கெட் சபையில் நடைபெற்றது.
>> ஓய்வு முடிவை அறிவித்தார் ஜேம்ஸ் ஆண்டர்சன்
இந்த ஊடக சந்திப்பின் போது ஜெப்ரி வெண்டர்சே மற்றும் அகில தனன்ஜய ஆகிய அனுபவ சுழல் பந்துவீச்சாளர்கள் நீக்கப்பட்டு, அதற்கு பதிலாக வியாஸ்காந்த் இணைக்கப்பட்டமைக்கான காரணம் வினவப்பட்டது. குறித்த இந்த கேள்விக்கு தேர்வுக்குழு உறுப்பினர்களான டில்ருவான் பெரேரா மற்றும் அஜந்த மெண்டிஸ் ஆகியோர் தங்களுடைய பதிலை முன்வைத்தனர்.
“வியாஸ்காந்தை எடுத்துக்கொண்டால் அவர் அணியிலிருக்கும் ஏனைய சுழல் பந்துவீச்சாளர்களை விட உயரமானவர். அவர் பந்துவீசும் பாணியும் மேலும் உயரத்தை கொடுக்கிறது. எனவே மேற்கிந்திய தீவுகளில் உள்ள மந்தமான ஆடுகளங்களில் வியாஸ்காந்தின் வேகத்துடன், சிறந்த சாதகத்தை பெறமுடியும் என நம்புகிறோம்” என டில்ருவான் பெரேரா குறிப்பிட்டார்.
இதேவேளை அஜந்த மெண்டிஸ் குறிப்பிடுகையில், “நாம் அகில தனன்ஜய மற்றும் ஜெப்ரி வெண்டர்சேவை வைத்து பார்க்கும் போது வியாஸ்காந்த் கடந்த காலங்களில் சிறப்பாக பந்துவீசியுள்ளார். அதுமாத்திரமின்றி வீரர் ஒருவர் சரியான பிரகாசிப்புகளை வழங்கும் போது அதிலிருந்து பயனை பெற்றுக்கொள்ள வேண்டும். சர்வதேச போட்டிகளில் வியாஸ்காந்த் அதிகமாக விளையாடவில்லை. எனினும், லீக் போட்டிகளில் சிறப்பாக பந்துவீசி வருகின்றார். எந்தவொரு சவாலையும் அவரால் எதிர்கொள்ள முடியும் என எதிர்பார்க்கிறோம். எனவேதான் வியாஸ்காந்துடன் நாம் முன்னோக்கி செல்ல தீர்மானித்தோம்” என்றார்.
விஜயகாந்த் வியாஸ்காந்தத் ஐசிசி T20 உலகக்கிண்ணத்துக்கான மேலதிக வீரர்கள் பட்டியலில் முதன்முறையாக இடம்பிடித்துள்ளமை குறிப்பிடத்தக்கது.
>> மேலும் கிரிக்கெட் செய்திகளைப் படிக்க <<
