වත්මන් ඉන්දීය ටෙස්ට් කණ්ඩායමේ උපනායකයා ලෙස කටයුතු කරන සුපිරි පිතිකරු අජින්ක්‍යා රහනේ කණ්ඩායම මෙහෙය වීමේ දී තමන්ට පැවරී ඇති කාර්‍යභාර්‍ය සම්බන්ධයෙන් අදහස් දක්වා සිටියේ Espncricinfo ක්‍රිකට් වෙබ් පිටුව ඔස්සේ පැවති සාකච්ඡාවක් සඳහා සහභාගී වෙමිනි.
සුපිරි ඉන්දීය පිතිකරුවා ඉවත් කළේ කාගේ උවමනාවට ද?
නායක විරාත් කෝලි හැකි සෑම අවස්ථාවක දී ම ප්‍රතිවාදීන් වෙත පීඩනය යොමු කිරීමට දැඩි කැමැත්තක් දක්වන නිසාවෙන් බොහෝ විට ආක්‍රමණශීලී තරග රටාවන්ට අනුගත වීමට සෙසු ක්‍රීඩකයින් ද හුරු පුරුදු වී ඇති බව රහනේ සඳහන් කර සිටියේය.
යම්හෙයකින් එම සැලසුම් සාර්ථක නොවන බව හැඟුණු අවස්ථාවන් හීදි කෝලි සමඟ එක්ව උපායමාර්ගික වෙනස්කම් සිදු කරමින් තරගය යලි කණ්ඩායම දෙසට හරවා ගැනීමට සහය දීම තම භූමිකාව බව රහනේ මෙහි දී පෙන්වා දී සිටියේය.
“උපනායකයා විදියට ගොඩක් දුරට මම කණ්ඩායම හසුරවන්න මැදිහත් වෙන්නෙ නැත්තේ විරාත්ට ඒ සඳහා අවශ්‍ය ආත්ම විශ්වාසය තියෙන නිසා. ඔහුගේ ඔළුවේ එක සැලැස්මක් විතරක් නෙමෙයි වැඩ කරන්නේ. ඉතින් ඔහුට අවබෝධයක් තියෙනවා කළ යුත්තේ මොනවා ද, නැත්තේ මොනවා ද කියලා. නමුත් විරාත් වුනත් අසාර්ථක වෙන වෙලාවල් නැතුවා නෙවෙයි. ඒ වෙලාවට මම මගේ සැලැස්මවල් සූදානම් කරන් ඉන්නේ, මොකද නායකයා විකල්ප හොයනකොට මට දායක වෙන්න බැරි නම් මේ තනතුරෙන් වැඩක් නැහැනේ.”
“කණ්ඩායමේ වගකීම කරට ගන්නවා කියන එක පිටට පේන තරම් ලේසි පහසු කටයුත්තක් නෙමෙයි. නායකයා හැමතිස්සෙම කල්පනා කරන්න ඕනෑ මම ඊළඟට මොන පන්දු යවන්නා ද පාවිච්චි කරන්නේ, ඒ ඒ ක්‍රීඩකයා අනුව කොහොමද පිටිය සකස් කරන්නේ වගේ දේවල් ගැන.
මගේ වගකීම තමයි නායකයා ගන්න හැම තීරණයක් ගැනම හොඳ අවධානයෙන් අධ්‍යයනය කරලා අවශ්‍ය කරන වෙලාවට ඔහුට සහයෝගය ලබා දෙන එක. සමහර වෙලාවට හිතෙනවා ඒ අවස්ථාවේ දී කළ යුත්තේ ඒක නෙමෙයි, මේ මේ දේවල් වෙනස් වෙන්න ඕන කියලා. එතකොට නායකයාත් එක්ක කතා බහ කරලා ගැළපෙන විදියට අවස්ථානුකූලව පිළියම් යොදනවා.”
අපි දෙන්නා කාලයක් හිටියේ එක කාමරේ – ගෞතම් ගාම්භීර්
රහනේ හට පළමු වරට ඉන්දීය ටෙස්ට් කණ්ඩායමේ උපනායකත්වය හිමිවන්නේ 2016 වසරේ පැවති කොදෙව් තරග සංචාරය අතරතුර දී ය. එහි දී ඔහු තමන් කෙරෙහි විශ්වාසය තැබූ කණ්ඩායම් කළමනාකාරිත්වයට ඔහු සතු හැකියා දක්ෂතාවන් වචනයට පමණක් සීමා නොකොට ක්‍රියාවෙන් ද ඔප්පු කර පෙන්වූයේ අගනා ශතකයකින් සහ නොදැවී ලකුණු 78කින් ප්‍රතිවාදීන් හට සංග්‍රහ කරමිනි.
ඉන් අනතුරුව නවසීලන්ත කණ්ඩායමට එරෙහිව තම පිත්ත ක්‍රියාත්මක කරන රහනේ ඔහුගේ ක්‍රිකට් දිවියෙහි හොඳම ටෙස්ට් ඉනිම දියත් කිරීමට සමත් වන්නේ ලකුණු 188කින් ඉන්දීය ලකුණු පුවරුව වර්ණවත් කිරීමට දායක වෙමිනි.
නායක විරාත් කෝලි උරහිසේ ඇති වූ ආබාධ තත්වයක් නිසාවෙන් 2017 වසරේ පැවති බෝඩර්-ගවස්කාර් ටෙස්ට් තරගාවලියෙහි අවසන් ටෙස්ට් තරගය සඳහා ක්‍රීඩා නොකිරීමට තීරණය කළ අතර ඒ ඇවෑමෙන් කණ්ඩායම මෙහෙයවීමේ සුක්කානම උපනායක අජින්ක්‍යා රහනේ අතට පත් කිරීමට කණ්ඩායම් කළමනාකාරිත්වය පියවර ගන්නා ලදි.
දෙපිලම එක් තරගය බැගින් ජය ගෙන තිබූ නිසාවෙන් අතිශය උණුසුම් මුහුණුවරක් ගත් තෙවැනි ටෙස්ට් තරගය කඩුලු 8කින් ජය ගැනීමට රහනේ ප්‍රමුඛ ඉන්දීය කණ්ඩායම සමත්කම් දැක්වූයේ ප්‍රබල ඕස්ට්‍රේලියානු කණ්ඩායම මොහොතකට අසරණ කරමිනි.
KKR අසාර්ථක වෙන්න හේතුව මම නෙමෙයි – ගංගුලි
“ඉන්දීය කණ්ඩායමට නායකත්වය ලබා දෙන්න ලැබෙනවා කියන්නේ ලොකු භාග්‍යයක්. ඒ ටෙස්ට් තරගයේ (2017) ජයග්‍රහණය ඉතාමත් වැදගත් වුනා තරගාවලිය අපේ පැත්තට හරවා ගන්න. හැබැයි මම ඇත්තටම කොයිම වෙලාවකවත් බලාපොරොත්තුවෙන් හිටියේ නැහැ මට නායකත්වය ලැබෙයි කියලා. තරගයට කලින් දවසේ හැන්දෑවේ තමයි මට දැනගන්න ලැබුණේ කෝලිගේ ශාරීරික යෝග්‍යතාව සම්බන්ධයෙන් ගැටලු කිහිපයක් තියෙන නිසා නායකත්වයේ වෙනසක් සිදු කරනවා කියලා.”
“ඒත් මම හිතුවේ නැහැ ඒ අවස්ථාව මටම ලැබෙයි කියලා. ඔය ඉන්න අතරතුර තමයි විරාත් දුරකථන ඇමතුමක් අරගෙන මට කිව්වේ හෙට තරගයේ නායකයා විදියට තරග වදින්න සූදානම් වෙන්න කියලා. අනිල් (කුම්බ්ලේ) අයියා තමයි මට මේ ගැන නිල වශයෙන් දැනුම් දුන්නේ. මට ඇත්තටම ලොකු ආඩම්බරයක් දැනුණා මම ගැනත් මගේ කණ්ඩායම ගැනත්, මොකද ඕස්ට්‍රේලියාව වගේ කණ්ඩායමක් පරාජයට පත් කරන්න ලැබුණා කියන්නේ ඒක කවදාවත් අමතක නොවන සිදුවීමක්.”
>> තවත් ක්‍රිකට් පුවත් සඳහා පිවිසෙන්න <<
