ඕස්ට්‍රේලියානු සීමිත පන්දුවාර ක්‍රිකට් නායක ඒරන් ෆින්ච් ශ්‍රී ලංකා සංචාරය ගැන අදහස් දක්වා තිබෙනවා. ශ්‍රී ලංකා ඉතිහාසයේ දරුණුතම ආර්ථික අර්බුදය මැද ක්‍රිකට් තුළින් ශ්‍රී ලංකා ප්‍රේක්ෂකයන්ට සතුටක් ලබා දිය හැකි යැයි ඔහු බලාපොරොත්තු වනවා.
ඕස්ට්‍රේලියානු කණ්ඩායම මෙවර ශ්‍රී ලංකා සංචාරයක නිරත වන්නේ විස්සයි විස්ස තරග 3ක්, එක්දින තරග 5ක් සහ ටෙස්ට් තරග 2ක් ඇතුළත් දීර්ඝ තරගාවලියක් වෙනුවෙන්. පසුගිය බදාදා (1) ඔවුන් ශ්‍රී ලංකාවට සැපත් වුනා.
“අපි ඇවිත් තියෙන්නේ ක්‍රිකට් ගහන්න. ශ්‍රී ලංකාවට යම් විනෝදයක්, යම් සතුටක් ලබා දෙන්න පුළුවන් වෙයි කියලා බලාපොරොත්තු වෙනවා. 2016න් පස්සේ, ඒ කියන්නේ දිගු කාලයකට පස්සේ අපි මෙහෙ ආපු පළවෙනි වතාව”, ඔහු පැවසුවා.
“මෙය සංචාරය සඳහා විශේෂ තැනක්. මෙහෙන් ලැබෙන ආගන්තුක සත්කාර, මිත්‍රශීලී බව සහ ක්‍රීඩාවට ඔවුන්ගේ තිබෙන ආදරය විශ්වාස කරන්නත් අමාරු තරම්”, ෆින්ච් පවසන්නේ ශ්‍රී ලංකාව සම්බන්ධව එම කරුණු තවමත් නොවෙනස් බවයි.
මෙවර දිවා රාත්‍රී තරග පැවැත්වීම සඳහා යම් ගැටලුවක් මතු වී ඇත්තේ ආර්ථික අර්බුදය හමුවේ විදුලි කප්පාදුවක් ක්‍රියාත්මක වීම හේතුවෙන්. ඒ ගැන විමසූ මාධ්‍යවේදීන්ට ඔහු මෙසේ පැවසුවා.
“එය තිබෙන්නේ මගේ පාලනයට ඉහළින්. ඒත් ඒ හැමදෙයක් ගැනම පාලක මණ්ඩල දෙක අතරත් රජයන් දෙක අතරත් තරගාවලියට පෙර සිටම කතාබහ වුනා.”
“ඒවා දිවා තරග හැටියට වෙනස් වුනත් මම දන්නෙ නැහැ මොනවා වේවි ද කියලා. ඒත් අන්තිම සතිය තුළ දී නම් මට කිසිම පැමිණිල්ලක් ලැබුණේ නැහැ”, ඔහු පවසන්නේ ඔහුගේ ක්‍රීඩකයන් මෙතෙක් හොඳ මානසිකත්වයක සිටින බවයි.
එළඹෙන අඟහරුවාදා (7) ඇරඹෙන විස්සයි විස්ස තරගාවලියේ පළමු තරගයෙන් මෙම තරගාවලිය ඇරඹෙනවා. විස්සයි විස්ස ශ්‍රේණිගත කිරීම්වල ශ්‍රී ලංකාව රැඳී සිටින්නේ 9 වැනි ස්ථානයේයි. ඕස්ට්‍රේලියාව එහි 5 වැනි තැන හොබවනවා. කෙසේ වෙතත් පසුගිය වසරේ විස්සයි විස්ස ලෝක ශූරයන් වූයේ ද ඕස්ට්‍රේලියානුවන්.
“අප ඔවුන් එක්ක ළඟ ළඟ ගියපු තරග කිහිපයක්ම ක්‍රීඩා කළා. ඔවුන් ඉතාම අනතුරුදායක කණ්ඩායමක්”, ශ්‍රී ලංකා කණ්ඩායම ගැන ෆින්ච් අදහස් දැක්වූයේ එලෙසින්.
>> තවත් ක්‍රිකට් පුවත් සඳහා පිවිසෙන්න <<
