දක්ෂයාට නිසි තැන ලබා දෙමින්, ඔවුන් සතු හැකියාවන් තවදුරටත් ඔප්නංවාලීමට අවශ්‍ය අතහිත නොමදව, නොමසුරුව ලබා දීම ගෙවුණ වසර කිහිපය පුරාවටම ක්‍රිකට් තේරීම් කමිටු බලධාරීන් අතින් සිදූ වූ බව අප කවුරුත් හොදාකාරවම දන්නා කාරණාවකි. එවැනි ඉතාමත් සද්භාවයෙන් ඔවුන් ගනු ලැබූ තීරණයක් නිසා මේ වන විට ක්‍රීඩාවට ආදරය කරන්නන් නම් පසුවන්නේ තරමක කළකිරීමෙනි.
Video – සිම්බාබ්වේ දේශය කරා යන ශ්‍රී ලංකා ටෙස්ට් සංචිතය
ශ්‍රී ලංකා කණ්ඩායමේ සිම්බාබ්වේ තරග සංචාරය මේ ………
පාකිස්තාන ටෙස්ට් තරගාවලිය අසාර්ථක වීමෙන් අනතුරුව මෙරටට පැමිණි ශ්‍රී ලංකා කණ්ඩායම ඉදිරියේ ඇති මීළඟ අභියෝගය වන්නේ සිම්බාබ්වේ කණ්ඩායමට එරෙහිව පැවැත්වෙන ටෙස්ට් තරගාවලියයි.
මේ සඳහා ක්‍රීඩකයින් 15දෙනෙකුගෙන් සමන්විත අවසන් සංචිතය පෙරේදා (14) දිනයේ දී ප්‍රකාශයට පත්කෙරුණු අතර සුපුරුදු පරිදි ක්‍රීඩාලෝලීන් හට කතා කිරීමට යමක් ඉතිරි කර තබමින් කුසල් ජනිත් පෙරේරා නැවත වතාවක් කණ්ඩායමෙන් ඉවත් කර තැබීමට තේරීම් කමිටු නිලධාරි කැල පියවර ගෙන තිබුණි.
මෙසේ ටෙස්ට් කණ්ඩායමේ දොරටුව වසා දැමුවේ ජයග්‍රහණ ඉඩෝරයෙන් හෙම්බත්ව සිටි ශ්‍රී ලාංකිකයන් හට ජයපැන් බිඳක් තොල ගෑමේ අනගි අවස්ථාවක් උදා කර දුන්,ටෙස්ට් ක්‍රිකට් ඉතිහාසයේ සුපිරිතම ඉනිම ක්‍රීඩා කළ ක්‍රීඩකයාට එරෙහිව වීම මෙහි දී වඩාත් කැපී පෙනෙන කාරණාව වන්නට විය.
ඩේල් ස්ටේන්, කගීසෝ රබඩා වැනි අතිදක්ෂ වේගපන්දු යවන්නන් තඹ දොයිදුවකටවත් මායිම් නොකළ කුසල් එදා කින්ග්ස්මීඩ් පිටිය දෙවනත් කරමින් ඔවුන්ට පහර පිට පහර එල්ල කළේ ටෙස්ට් ක්‍රිකට් වංශ කතා පොතේ එදා මෙදා තුර පිතිකරුවෙකු දියත් කළ අගනාම ටෙස්ට් ඉනිමේ හිමිකාරත්වය තම නම ඉදිරියේ සටහන් කරගනිමිනි.
නමුත් එම ඓතිහාසික ඉනිම ක්‍රීඩා කර මාස 11ක පමණ කාලයක් ගත වන විට කණ්ඩායමේ තමන්ට හිමි ස්ථානය පවා රැකගැනීමට කුසල්ට දැඩි සටනක නිරත වීමට සිදු වී තිබීම තරමක් පුදුම දනවන සුළු කාරණාවක් බවට පත්වී තිබේ. එක් තරගාවලියක් අසාර්ථක වූ පමණින් අඛණ්ඩව දක්ෂතා දැක්වූ ක්‍රීඩකයෙකු කණ්ඩායමෙන් ඉවතට ඇඳ දැමීම කොතරම් සාධාරණ ද?
Video – කුසල් පෙරේරාව ඉවත් කළ හේතුව තේරීම් කමිටු සභාපතිගෙන්ම දැනගමු
කෙසේ නමුත් ශ්‍රී ලංකා ක්‍රිකට් තේරීම් කමිටුවේ ඉහළ පුටුවල සිටින නිලධාරීන් හට නම් මෙම ගෙන ඇති තීරණය සාධාරණීකරණය කිරීම සඳහා නොයෙකුත් හේතු කාරණා එමටව ඇති බව නම් නොරහසකි.
ESPNCricinfo වෙබ් අඩවිය උපුටා දක්වන පරිදි තේරීම් කමිටු ප්‍රධානී අසන්ත ද මෙල් මහතාගේ මතයට අනුව ක්‍රීඩකයෙකු කණ්ඩායමේ රඳවා ගත යුත්තේ ඔහු රැස්කරන ලකුණු සංඛ්‍යාව මත නොව ඔහු කොපමණ වේලාවක් කඩුල්ලේ රැඳී සිටිනවා ද යන හේතු සාධකය මතයි.
“කුසල්ට 150 ඒවා රැස් කරන්න පුළුවන් බව ඇත්ත නමුත් අපිට වඩාත් වැදගත් වෙන්නේ කඩුල්ල ආරක්ෂා කරගෙන කොච්චර වේලාවක් පිතිකරණයේ යෙදෙන්න පුළුවන් ද කියන එකයි. ඒ නිසා තමයි අපි තිරිමාන්නව ඇතුළත් කරගත්තේ.”
අසන්ත ද මෙල් මහතාගේ මෙම මතභේදාත්මක ප්‍රකාශය කොතරම් දුරට නිවැරදි ද යන්න පිළිබඳ දත්ත වාර්තාවන් මත පදනම්ව කළ විග්‍රහයකට අපි දැන් අවධානය යොමු කරමු.
| ද මෙල් | කුසල් ජනිත් | ||
| නවසීලන්තයට එරෙහිව කුසල් ජනිත් රැස්කළ ලකුණු සංඛ්‍යාව | ලකුණු 24 (සාමාන්‍ය 6.00) | 1 | 0 |
| සිම්බාබ්වේ කණ්ඩායමට එරෙහිව අවසන් වරට රැස්කළ ලකුණු සංඛ්‍යාව | ලකුණු 193 (සාමාන්‍ය 48.25) එක් ශතයක් සහ අර්ධ ශතකයක්ද ඇතුළුව | 0 | 1 |
| තිරිමාන්න සහ කුසල් ජනිත්ගේ ටෙස්ට් ලකුණු සාමාන්‍යයන් | පෙරේරා 31.13 > තිරිමාන්න 22.64 | 0 | 1 |
| මෑත කාලීනව පෙන්වා ඇති දක්ෂතා – 2019 වසරට අදාලව තරග 5කට වඩා ක්‍රීඩාකොට ඇති | 2019 වසරේදී තරග ආකෘති ත්‍රිත්වයේදීම ශ්‍රී ලංකාව වෙනුවෙන් වැඩිම ලකුණු ලාභියා
වැඩිම ටෙස්ට් ලකුණු සාමාන්‍යයක් හිමි ශ්‍රී ලාංකික ක්‍රීඩකයා |
0 | 1 |
| ටෙස්ට් ක්‍රිකට් පිටියේ අමරණීයම ඉනිම | දකුණු අප්‍රිකාවට එරෙහිව කුසල් ජනිත් රැස්කළ ලකුණු 153 | 0 | 1 |
පසුගිය වසරේ දී ටෙස්ට්, එක්දින, විස්සයි විස්ස තරග ආකෘති ත්‍රිත්වයේම ශ්‍රී ලංකාව වෙනුවෙන් වැඩිම ලකුණු ප්‍රමාණයක් රැස් කරගත් පිතිකරුවා බවට කුසල් ජනිත් පත්වද්දී ටෙස්ට් තරගයන්හීද ඉහළතම පිතිකරණ සාමාන්‍යයක් රඳවා ගත් ක්‍රීඩකයා බවට පත්වන්නේ අන් කවරෙකුත් නොව කුසල් ජනිත්ය. අවසන් වරට ශ්‍රී ලංකා කණ්ඩායමක් සිම්බාබ්වේ හී තරග සංචාරය කළ අවස්ථාවේ දී එක් ශතයකින් සහ අර්ධ ශතයකින් සත්කාරකයින් හට සංග්‍රහ කිරීමට ඔහු අමතක නොකළේය.
දකුණු අප්‍රිකානු වික්‍රමයෙන් පසුව පැවති නවසීලන්ත කණ්ඩායමේ මෙරට තරග සංචාරයේ දී පිතිකරුවෙකු වශයෙන් ඔහු අසාර්ථක වූ බව සැබෑවක් නමුත් පාකිස්තාන ටෙස්ට් තරගාවලියේ දී එකදු තරගයක් හෝ ක්‍රීඩා කිරීමේ අවස්ථාව ලබා නොදී එකවරම කණ්ඩායමෙන් නෙරපා දැමීම එතරම් නුවණට හුරු ක්‍රියාවක් නොවන බවට බොහෝ ක්‍රීඩා විචාරකයින්ගේ මෙන්ම ක්‍රීඩාලෝලින්ගේ ද මතයයි.
හිටපු නායක මහේල ජයවර්ධන ද, ගෙන ඇති මෙම තීරණය පිළිබඳව තරමක විවේචනාත්මක ස්වරූපයෙන් ට්විටර් පණිවිඩයක් තම ගිණුමට එක්කර තිබුණ ආකාරය පහතින් දැක්වේ.
Wasn’t he the same player who won the test match in Durban single handedly 12 months ago? He has only played 3 test matches (5 Innings) since then.. ??♂️ https://t.co/gyvMrcEu21
— Mahela Jayawardena (@MahelaJay) January 14, 2020
මෙල් මහතා ඉදිරිපත් කරන තිරිමාන්න, කුසල් ජනිත් සංසන්දනයෙන් ක්‍රීඩකයින් දෙදෙනාටම යම් අසාධාරණයක් සිදු වන අතරවාරයේ යොවුන් නැඟී එන ක්‍රීඩකයින් පිළිබඳව කිසිදු තැකීමකින් තොරව සංචිතය නම් කිරීම පිළිබඳව ද තම අප්‍රසාදය පළකොට කිරීමට බොහෝ අය අමතක නොකළහ.
ICC ටෙස්ට් ශූරතාවලිය සඳහා කිසිදු බලපෑමක් එල්ල නොකරන මෙවැනි තරගාවලියක් සඳහා කමිඳු මෙන්ඩිස්, පැතුම් නිස්සංක සහ සංගීත් කුරේ වැනි දේශීය තරග බිමේ ලකුණු තොග පිටින් රැස්කරන අතිදක්ෂ තරුණ ක්‍රීඩකයින්ගේ දායකත්වය කණ්ඩායම තෝරාපත් කරගැනීමේ දී නොසලකා හැරීම මෙරට ක්‍රිකට් අනාගතය හැඩ කරගැනීමට තිබෙන මහඟු අවස්ථාවකට පයින් ගැසීමක් වැනිය.
ජාත්‍යන්තර ක්‍රිකට් පිටියට තවමත් කෝඩුකාරයින් වන, තරඟ අත්දැකීම් මඳ මෙම යොවුන් ක්‍රීඩකයින්ගෙන් එංගලන්තය, ඕස්ට්‍රේලියාව වැනි ප්‍රබල කණ්ඩායම්වලට එරෙහිව තම පළමු තරග කිහිපයේ දී ම සාර්ථක ප්‍රතිඵල අපේක්ෂා කිරීම කොතෙක් දුරට සාධාරණ ද? ඒ වෙනුවට කළ යුත්තේ මෙවැනි තරගාවලි සඳහා ක්‍රීඩා කිරීමේ අවස්ථාව සකසා දීමෙන් තරගකාරී ජාත්‍යන්තර ක්‍රිකට් වේදිකාවට ඔවුන් අනුගත කිරීම නොවේ ද?
වීරයින්ගේ නික්ම යාමෙන් පසුව තවමත් සංක්‍රාන්ති අවධියේ පසුවෙමින් තරග පරාජය වන අප කණ්ඩායමට යම් තරමක හෝ අස්වැසිල්ලක් ගෙන දිය හැකි තරග දිනවන්නෙකුට බෙදිය යුත්තේ මීට වඩා වෙනස් හැන්දකින් බව ක්‍රිකට් බලධාරීන් අවබෝධ කර ගත යුතු කාලය එළඹ තිබේ.
ආබාධ, තහනම් උත්තේජක වැනි නොයෙකුත් බාධක කම්කටොළු මධ්‍යයේ ඉදිරියට ඇඳුණු කුසල් ජනිත්ගේ ක්‍රීඩා ජීවිතයට තවත් එක් අඳුරු මතකයන් ගොන්නක් උරුම කරදෙන යුගයක ආරම්භය මෙය නොවෙනු ඇතැයි අපි බලාපොරොත්තු වෙමු.
Durban hero “not good enough” for Harare ලිපියේ සිංහල පිරිවර්තනයක්.
>> තවත් ක්‍රිකට් පුවත් සඳහා පිවිසෙන්න <<
