රන්වන් හිසකේ ඇති අප කතානායක ඕස්ට්‍රේලියානු තරුණයා තරමක් තරබාරුය. ඔහුගේ වයස දහඅට හැවිරිදිය. කෙළිදෙළෙන් ජීවත් වීමට ප්‍රිය කරන්නෙකි. නමුත් මෙවර ඔහු අතට ලැබී තිබුණේ ඔහුගේ දෛවය සම්පූර්ණයෙන්ම වෙනස් කරන තාලයේ යම් දෙයකි.
අප කතා කරන මේ තරුණයා ඕස්ට්‍රේලියානු පාපන්දු ලීගයට (AFL) ක්‍රීඩා කරන ශාන්ත කිල්ඩා ක්‍රීඩා සමාජයට අයත් ක්‍රීඩකයෙකි. ඔහු අතට ලැබී තිබුණේ තවදුරටත් ඔහුගේ සේවය ශාන්ත කිල්ඩා ක්‍රීඩා සමාජයට අවශ්‍ය නොකරන බව දැන්වූ ලිපියකි. ඔහුගේ ලෝකය ඔහුගේ දෑස් ඉදිරිපිටම කඩා වැටෙන සෙයක් ෂේන් කීත් වෝන් නම් වික්ටෝරියානු තරුණයාට දැණුනි.
ඕස්ට්‍රේලියානු ක්‍රිකට් විත්ති කූඩුවට ගෙනා නේතන් බ්‍රැකන්
“ජාත්‍යන්තර ක්‍රිකට් ක්‍රීඩාවෙන් සමුගත් පසු ඔබ එතරම් පොරක් ලෙස සැලකෙන්නේ නැහැ.”මෙසේ කියන්නේ…
නමුත් ඔහු නැගී සිටියේය. ඉතිහාසය වෙනස් කරමින් ඕස්ට්‍රේලියානු ක්‍රීඩාවේ පමණක් නොව ලෝක ක්‍රීඩා ඉතිහාසයේම සුවිශේෂී සලකුණක් වෙමින් ඔහුගේ ක්‍රීඩා දිවිය නිමා කළේය. මේ ෂේන් වෝන් නම් හිතුවක්කාර, සල්ලාල, බේබදු ගති ඇති, ඒ සැමට ඉහළින් ක්‍රිකට් පිටිය දිග්විජය කළ ඔහුගේ කතාවයි.
“වයස දහඅටක තරුණයෙකු ලෙස එවැන්නක් ලැබීම ඇත්තටම මගේ ජීවිතය නැවත අවධි කිරීමක් වුනා. එවන් ළාබාල වයසක දී ඔබ යමකට සුදුසු නැහැ කියා යමක් ලැබීම තරුණයෙක්ට දෙවිදියකට බලපාන්න පුළුවන්. ඔබට සමස්ත සමාජ ක්‍රමයට දොස් දෙවොල් තබමින් වැරදි මාර්ගවලට යොමු වෙන්න පුළුවන්. අනෙක් අතට මා කළා මෙන් දිරිමත්ව ජීවිතයට මුහුණ දෙන්න පුළුවන්. 
ශාන්ත කිල්ඩාවෙන් මා ප්‍රතික්ෂේප වීම ඇත්තටම මට දරුණු ආකාරයකින් දැනුණා. එය මගේ සම්පූර්ණ ජීවිතයම වෙනස් කළා. සිකුරාදා දිනයන්හි පීසා බෙදාහැරීමේ සිට රැකියාවන් කිහිපයක් කළා. නමුත් ඒ කිසිවක මට ගැළපීමක් පෙන්නුම් කළේ නැහැ. අවසානයේ මට උරුම දේ මට මුණගැහුණා.
ක්‍රිකට් සහ පා දඟපන්දු යැවීම!
ඔව්. මම තරමක් වයස පහුවෙලා ක්‍රිකට් ක්‍රීඩාවට පැමිණි කෙනෙක්. එය එක් අතකින් වෙස්වලාගත් ආශීර්වාදයක්. වයස පසුවී පැමිණි නමුත් මම සෑහෙන මහන්සි වුනා. මට උවමනා වුනේ මගේ හොඳම පිටපත වෙන්න. මම හිතනවා මට එහෙම වෙන්න ලැබුණා කියල.
ගාෆිල්ඩ් සෝබර්ස්, වෙස්ලි හෝල්ට ඉගැන්වූ කදිම පාඩම
අද වන විට ක්‍රිකට් ක්‍රීඩාවට අත්‍යාවශ්‍යම කොට්ඨාශයක් ලෙස පා දඟපන්දු යවන්නන් හැඳින්විය හැකියි…
ඇත්තටම මට දායාදයක් ලැබී තිබුණා. මට ඉතාම හොඳින් පන්දුව දඟ කවන්න පුළුවන්. ඒ වගේම මට විශාල දෑතක් මෙන්ම ශක්තිමත් මැණික් කටුවක් පිහිටා තිබෙනවා. ඒ මගේ දෙමාපියන්ගේ ජානවලින් ලැබුණ දේවල්.
පුහුණුවීම් වලදී මම හැකිතාක් පන්දු යැව්වා. මම මටම අභියෝගය කරගත්තා. ඒ වගේම ගෙදර සිටින විට මම ක්‍රිකට් පන්දුවක් අතේ තබාගෙන පන්දුව මුදාහරින ආකාරයෙන් උඩ දමමින් පුහුණුවේ යෙදුණා. එමගින් පා දඟපන්දුකරුවෙකුට තිබෙන විවිධාකාරයේ පන්දු පිළිබඳ හැඟීමක් ලබාගැනීමයි මූලික අරමුණ වුණේ.
ඔබ දන්නා පරිදි මගේ පෞද්ගලික ජීවිතය එතරම් යහපත් එකක් නොවෙයි. නමුත් හතරේ සීමාව පසු කොට ක්‍රිකට් පිටියට ආ විට ඒ සියල්ලම මා අමතක කරනවා. මම තරයේ අදහපු දෙයක් මා ගැන විශ්වාසය තැබූ කිසිවෙකු ක්‍රිකට් පිටිය තුළ දී නම් අපහසුතාවයට පත් කරන්නේ නැහැ කියන කාරණාව.”
ෂේන් වෝන් යනු අසීමිත දක්ෂතාවයකින් හෙබි ක්‍රීඩකයෙකි. නමුත් ඔහු එම දක්ෂතාවයෙන් පමණක් කඩුළු දවාගත්තෙකු නොවේ. කොක්කෙන් බැරි නම් කෙක්කෙන් වැඩේ කරගන්නට ඔහු අති සමතෙකි.
“මම ප්‍රතිවාදියාගේ හිසට ඇතුල් වෙන්න කැමතියි. ඔහුව නොසන්සුන් කරන්න, ඔහුට මොනවහරි කියන්න කැමතියි. නැති පීඩනයක් ඇති කරන්න කැමතියි.
දැන් ඔබට හිතෙන්න පුළුවන් මට එරෙහිවත් ඒ ආකාරයෙන් පිටියේ දී වාග් ප්‍රහාර එල්ල වෙනවා ඇති කියා. නමුත් එවැනි දේවල් සිදු වෙන්න සිදු වෙන්න මගේ නම් මානසික ඒකාග්‍රතාවය තව තවත් වැඩිවෙනවා මිසක් ප්‍රතිවාදියාට කිසිම සෙතක් වෙන්නේ නැහැ.
ටෙස්ට් ක්‍රිකට් ක්‍රීඩාවට පැමිණි අවධියේ මගේ දස්කම් එතරම් උසස් මට්ටමක තිබුණේ නැහැ. එවන් අසීරු දවසක මට යම් අපූරු උපදෙසක් ලැබුණා.
එවකට මගේ නායකයා වූ ඇලන් බෝඩර් මා පැත්තකට කැඳවා ගත්තා. මගේ නායකයා පැවසුවා පිතිකරණයේ යෙදෙන විට ඔහුගේ මානසික ඒකාග්‍රතාවය බිඳී යන සෑම විටකම ඔහු ප්‍රතිවාදී කණ්ඩායමේ ක්‍රීඩකයෙකු සමඟ වාග් ප්‍රහාරයකට පැටලෙන බව. එය ඉතාම හොඳ උපදෙසක් බව මට වැටහී ගියා. එවන් අවස්ථාවක සටන ඇත්තේ මාත් ඔහුත් අතර පමණයි. එවන් සටනකට අවතීර්ණ වූ පසු වඩාත් ආක්‍රමණශීලී ආකාරයෙන් ක්‍රීඩා කරන්න මට හැකියාව ලැබුණා.
ශ්‍රී ලාංකිකයින් අවතැන් කළ නයිරෝබියේ ‘අෆ්‍රිඩි’ සුළි කුණාටුව
1996 ඔක්තෝබර් 4 වැනිදා කෙන්යාවේ නයිරෝබි නුවර හරහා චණ්ඩ මාරුතයක් හමා ගියේය. පෙර දැනුම්…
මගේ ක්‍රිකට් ක්‍රීඩා ජීවිතය සම්පූර්ණයෙන්ම වෙනස් කළ අයෙක් ලෙසට ටෙරී ජෙනර් හඳුන්වන්න පුළුවන්. පා දඟපන්දුකරුවෙක් ලෙසට මට පන්දුව හොඳින් දඟ කැවීමේ හැකියාව සහ විවිධාකාරයේ පන්දු කිහිපයක් යැවීමේ හැකියාව තිබුණා. නමුත් මා ටෙස්ට් පන්දු යවන්නෙකු කිරීමේ ගෞරවය ටී. ජේ (ටෙරී ජෙනර්) සතුයි.
මට මතකයි ඉන්දියාවට එරෙහිව මගේ පළමු ටෙස්ට් තරගය අතරතුර මා දැඩි ප්‍රහාරයකට ලක්වුණා. එම තරගාවලියෙන් අනතුරුව මා ටී. ජේ හමුවීමට මෙල්බර්න් නුවර සිට ඇඩිලේඩ් දක්වා පැමිණි ගමන මට තාමත් මතකයි. මම ඔහුට කිව්වා මට මේ ගැන මට වැඩිදුරටත් ගැඹුරින් හැදෑරීමට උවමනා කරන බව.
ටී. ජේගේ අදහස වුනේ මගේ ශරීර යෝග්‍යතාව එතරම් ඉහළ මට්ටමක නොමැති බව. එමෙන්ම ඕස්ට්‍රේලියානු ටෙස්ට් කණ්ඩායමට ක්‍රීඩා කිරීමට මා කිසිදු සුදුසුකමක් සපුරා නැති බව ද ඔහු මතක් කළා. එමෙන්ම මට වඩා අති දක්ෂ ක්‍රීඩකයින් රාශියක් අවස්ථාවක් නොමැතිව තිරයෙන් පිටුපස සැඟව ගිය බවත් ඔහු මට මතක් කර දුන්නා.
පිතිකරුවෙකු දවා ගැනීමකට සූදානම් කරන්නේ කෙසේ ද, කිනම් පන්දුවක් කුමන අවස්ථාවක යැවිය යුතු ද යන්න මට කියා දුන්නේ ටී. ජේ විසින්.
නැවත ටෙස්ට් ක්‍රිකට් හා සම්බන්ධ වූ පසූ එතරම් අධික මිලක් නැති වයින් බෝතල් දෙකක් මා මිලට ගත්තා. ඉන් එකක් ඕස්ට්‍රේලියානු ක්‍රිකට් ඇකඩමියේ ප්‍රධාන චරිතයක් වූ හිටපු ඕස්ට්‍රේලියානු කඩුලු රකින්නා වූ රොඩ්නි මාෂ්ට, අනෙක ටී. ජේට.
ඔවුන් දෙදෙනාගේම මතය වූයේ ක්‍රිකට් පිටියේ ස්ථාවර වූ දිනක එම වයින් බෝතලය විවෘත කළ යුතු බව. අවුරුද්දකට හෝ දෙකකට පසු බටහිර ඉන්දීය කොදෙව් කණ්ඩායමට එරෙහිව මා කඩුලු හතක් දවා ගත් විට රොඩ්නි මාෂ් පැවසුවා වයින් බෝතලය විවෘත කිරීමට සුදුසුම කාලය දැන් බව.
මම සැනෙකින් අනෙක් පසට ටී. ජේට දුරකථනයෙන් ඇමතුවා. ඔහු පැවසුවේ තවමත් එය විවෘත කිරීමට තරම් මා ස්ථාවර වී නොමැති බවයි. අවාසනාවකට ටී. ජේට කිසිම දිනෙක ඔහුට ලබා දුන් වයින් බෝතලය විවෘත කිරීමට අවස්ථාවක් ලැබුණේ නැහැ.
යම් සහජ හැකියාවක් තිබුනත් මම සෑහෙන මහන්සි වුනා විශිෂ්ටයෙකුගේ තැනට පැමිණීමට. මට හැමදාම අවශ්‍ය වුනේ හොඳම පිටපත වීමට. මා සිතනවා ක්‍රීඩාව නිමා කරන විට මට එය ළඟා කරගැනීමට හැකි වූවා කියා.”
ක්‍රිකට් පිටියේ කෙතරම් දැවැන්තයෙකු වුවද ක්‍රිකට් පිටියෙන් පිටත ෂේන් වෝන් සතුව ඇත්තේ එතරම් හොඳ චරිත සහතිකයක් නොවේ. ස්ත්‍රීන් සම්බන්ධ ගැටලු, අධික දුම්පානය නිසා ඇතිවූ ප්‍රශ්න මෙන්ම 2003 ලෝක කුසලාන තරගාවලියට පෙර එල්ල වූ තහනම් උත්තේජක චෝදනා ද වෝන්ගේ ක්‍රිකට් ජීවිතයේ කළු පැල්ලම් ලෙස ඉතිරිවී පවතී.
නමුත් ඒ සැම වසා ගනිමින් දැවැන්ත ක්‍රිකට් ක්‍රීඩකයෙකුගේ පෞරුෂය ඉස්මතු කර ගැනීමට ෂේන් වෝන් නම් වික්ටෝරියානුවාට හැකියාව ලැබුණ බව නම් නොකියාම බැරිය.
>> තවත් විශේෂාංග ලිපි සඳහා පිවිසෙන්න <<
