Mohun Bagan හමුවේ Blue Star සිහින බොඳ වෙයි

ආසියානු පාපන්දු සම්මේලනය විසින් සංවිධානය කරන ‘AFC කුසලානය 2022’ තරගාවලියේ මූලික තරග වටයේ දෙවැනි අදියරේ අද (12) පැවති තරගයෙන් Blue Star FC පරදවා ගෝල 5-0ක දැවැන්ත ජයක් ලබා ගැනීමට ATK Mohun Bagan ක්‍රීඩකයින්ට හැකි වුනා.

ATK Mohun Bagan දකුණු ආසියානු කලාපයේ ප්‍රබල පාපන්දු ක්‍රීඩා සමාජයක් වන අතර තරගය පැවැත්වුණේ ඉන්දියාවේ Salt Lake Stadium ක්‍රීඩාංගණයේ දීයි.

තරගය ආරම්භයේ සිටම සිය ප්‍රබලත්වය පෙන්නුම් කළ Mohun Bagan වෙනුවෙන් පළමු ගෝලය රැස් කිරීමට Joni Kauko සමත් වුනේ 22 වැනි මිනිත්තුවේ දීයි.

එම ගෝලයෙන් කෙටි වේලාවකට පසුව ක්‍රියාත්මක වූ Mohun Bagan ක්‍රීඩක Manvir Singh දඬුවම් රාමුවෙන් පිටත දී ලබා ගත් පන්දුවක් දඬුවම් රාමුව තුළ සිට ගෝලයට එල්ල කරමින් තරගයේ ආධිපත්‍ය සිය කණ්ඩායමට ගෙන ඒමට සමත් වුනා.

Blue Star ක්‍රීඩකයින් තරගය තුළ තවත් අසරණ කරමින් 38 වැනි මිනිත්තුවේ දී හිමි වූ දඬුවම් පහරක් සාර්ථක කර ගත් Joni Kauko තරගයේ තෙවැනි ගෝලය සහ ඔහුගේ දෙවැනි ගෝලය වාර්තා කළා.

එම අර්ධය තුළ කිසිදු ගෝලයක් රැස් කිරීමට Blue Star ක්‍රීඩකයින්ට නොහැකි වීම නිසා පළමු අර්ධය අවසන් වුනේ ගෝල 3-0ක් ලෙස ATK Mohun Bagan ක්‍රීඩයින්ට පෙරමුණ ලබා දෙමිනුයි.

• Blue Star ජයග්‍රහණයකින් තරගාවලිය අරඹයි
• සමුනුගේ අවසන් ගෝලයෙන් Gateway පාපන්දු කිරුළ දිනයි
• ජනාධිපති කුසලානය Hameed Al Husseinie ක්‍රීඩකයින්ට
• සබරගමුව පැරද වූ දකුණේ ක්‍රීඩකයින් අවසන් මහා සටනට

දෙවැනි අර්ධයේ මුල් භාගයේ දී ගෝල රැස් කරගැනීමට හැකි අවස්ථා කිහිපයක්ම Blue Star ක්‍රීඩකයින්ට හිමි වූවත්, ඒවා සාර්ථකව වළකාලීමට Mohun Bagan පසුපෙළ ක්‍රීඩකයින්ට සහ ගෝල රකින්නාට හැකි වුනා.

ඒ අතරවාරයේ දී Blue Star පසුපෙළ ක්‍රීඩකයින්ගේ දුර්වල ක්‍රීඩා විලාශය නිසාවෙන් ලැබූ පන්දුවක් පහසුවෙන්ම ගෝලයට එල්ල කළ Mohun Bagan ක්‍රීඩක David Williams සිය කණ්ඩායම වෙනුවෙන් සිව්වැනි ගෝලය රැස් කළා.

Mohun Bagan වෙනුවෙන් 89 වැනි මිනිත්තුවේ දී ක්‍රියාත්මක වූ Manvir Singh තරගයේ තම දෙවැනි ගෝලය රැස් කරමින් සිය කණ්ඩායමට ගෝල 5-0ක දැවැන්ත ජයක් ගෙන දුන්නා.

අවසන් ගෝල තත්වය: ATK Mohun Bagan 5 – 0 Blue Star FC

ගෝල රැස්කළ ක්‍රීඩකයින්,

ATK Mohun Bagan – Joni Kauko 22’ & 38’, Manvir Singh 28’ & 89’, David Williams 77’.

>> තවත් පාපන්දු පුවත් සඳහා පිවිසෙන්න <<