2022 වසරේ දී පැවැත්වීමට නියමිත ආසියානු කුසලාන ක්‍රිකට් තරගාවලිය විස්සයි විස්ස තරග රටාවට අනුව අගෝස්තු 27 වැනිදා සිට සැප්තැම්බර් 11 දක්වා ශ්‍රී ලංකාවේ දී පැවැත්වීමට තීරණය කර තිබෙනවා.
අද (19) කොළඹ දී පැවති ආසියානු ක්‍රිකට් කවුන්සිලයේ මහා සභා රැස්වීමේ දී එම තීරණය ගෙන තිබෙනවා. 2010 වසරට පසුව ආසියානු කුසලාන ක්‍රිකට් තරගාවලියක් ශ්‍රී ලංකාවේ පැවැත්වෙන පළමු අවස්ථාව මෙයයි.
ආසියානු ක්‍රිකට් කවුන්සිලයේ (ACC) සභාපති හා ඉන්දීය ක්‍රිකට් ආයතනයේ ලේකම් Jay Shah මහතාගේ ප්‍රධානත්වයෙන් පැවැත්වුනු මේ රැස්වීම සඳහා ආසියානු ක්‍රිකට් කවුන්සිලයේ නිලධාරීන් 40 දෙනෙක් පමණ සහභාගී වී තිබුණා. එහි දී 2022 ආසියානු කුසලානය පැවැත්වෙන කාලවකවානුව සහ එහි සත්කාරකත්වය පිළිබඳව වැඩි අවධානයක් යොමු කර තිබුණා.
- Babar Azamගෙන් වාර්තාගත ඉනිමක්
- මලින්ද පුෂ්පකුමාර ක්‍රිකට් දිවියේ වැදගත් කඩඉමක් පසු කරයි
- ආසියානු ක්‍රිකට් කවුන්සිලය ශ්‍රී ලංකාවේ දී රැස්වෙයි
2018 වසරෙන් පසුව පැවැත්වෙන පළමු ආසියානු කුසලාන ක්‍රිකට් තරගාවලිය මෙය වන අතර 2020 වසරේ දී තරගාවලිය පැවැත්වීම සඳහා සැලසුම් සකස් කර තිබූ නමුත්, ඒ වන විට ගෝලීය වශයෙන් ව්‍යාප්ත වී පැවති කොරෝනා වසංගත තත්වය නිසාවෙන් එම තරගාවලිය සැලසුම් කළ පරිදි පැවැත්වුනේ නැහැ.
ආසියානු ක්‍රිකට් කවුන්සිලයේ පූර්ණ සාමාජිකත්වය දරණ ටෙස්ට් වරම් තිබෙන කණ්ඩායම් 5ක් (ශ්‍රී ලංකාව, ඉන්දියාව, පාකිස්තානය, ඇෆ්ගනිස්තානය, බංග්ලාදේශය) සහ ආසියානු කුසලාන සුදුසුකම් ලබා ගැනීමේ තරගාවලිය ජය ගන්නා කණ්ඩායම් මෙවර ආසියානු කුසලානය සඳහා සහභාගී වනු ඇත. ආසියානු කුසලාන සුදුසකම් ලබා ගැනීමේ තරගාවලිය අගෝස්තු 20 වැනිදා ආරම්භ වීමට නියමිතයි.
එසේම 2000 වසරේ සිට ආසියානු ක්‍රිකට් කවුන්සිලයේ සාමාන්‍ය සාමාජිකයෙක් (Associate Member) ලෙස සිටි කටාර් රාජ්‍යය මෙතැන් සිට පූර්ණ සාමාජිකත්වය හිමි කණ්ඩායමක් බවට උසස් කිරීම සිදු කිරීම ද විශේෂත්වයක්.
තවද, ආසියානු ක්‍රිකට් සභාපති වන Jay Shah මහතාගේ ධූර කාලය 2024 මහා සභාවාරය දක්වා වැඩි කිරීමට ද අද පැවැත්වුණු ආසියානු ක්‍රිකට් කවුන්සිලයේ මහා සභා රැස්වීමේ දී තීරණය වී තිබෙනවා.
>> තවත් ක්‍රිකට් පුවත් සඳහා පිවිසෙන්න <<
