தொடரினை வெற்றியுடன் ஆரம்பித்த ஜப்னா, கோல் அணிகள்

இலங்கை கிரிக்கெட் சபை (SLC) 2024ஆம் ஆண்டின் பருவத்திற்காக ஒழுங்கு செய்த தேசிய சுபர் லீக் ஒருநாள் தொடரின் முதல் நாள் ஆட்டத்தில் கோல், ஜப்னா அணிகள் வெற்றியைப் பதிவு செய்துள்ளன.

>>மகளிர் உலகக் கிண்ண போட்டி அட்டவணை வெளியீடு

கண்டி எதிர் கோல்

இலங்கையின் முன்னணி 5 மாவட்டங்கள் பிரதிநிதித்துவம் செய்யப்படும் இந்த தொடரில் முதல் போட்டி கோல், கண்டி அணிகள் இடையில் கொழும்பு ஆர். பிரேமதாச அரங்கில் ஆரம்பமாகியது.

போட்டியில் முதலில் துடுப்பாடிய கண்டி அணி தடுமாறிய போதிலும் அஹான் விக்ரமசிங்க சதம் (112) விளாச அவ்வணி 9 விக்கெட்டுக்களை இழந்து 259 ஓட்டங்கள் எடுத்தது. தனன்ஞய லக்ஷான் கோல் அணிக்காக 4 விக்கெட்டுக்களைக் கைப்பற்றினார்.

பின்னர் போட்டியின் வெற்றி இலக்கை அடைய பதிலுக்கு துடுப்பாடிய கோல் அணி 47.3 ஓவர்களில் வெற்றி இலக்கை 4 விக்கெட்டுக்களை இழந்து அடைந்தது. கோல் அணிக்காக யசோதா லங்கா (63) மற்றும் ரவிந்து ரசன்த (56*) அரைச்சதம் விளாசினர்.

கண்டி – 259/9 (50) அஹான் விக்ரமசிங்க 112, சாமிக்க 43, தனன்ஞய லக்ஷான் 36/4

 

கோல் – 263/4 (47.3) யசோதா லங்கா 63, ரவிந்து ரசன்த 56*

 

முடிவு – கோல் அணி 6 விக்கெட்டுக்களால் வெற்றி

ஜப்னா எதிர் கொழும்பு

ஹம்பாந்தோட்டையில் நடைபெற்ற இந்தப் போட்டியில் சரித் அசலன்க தலைமையிலான கொழும்பு அணியை, ஜனித் லியனகேவின் ஜப்னா அணி 4 விக்கெட்டுக்களால் தோற்கடித்தது.

கொழும்பு அணி போட்டியில் முதலில் துடுப்பாடி 8 விக்கெட்டுக்களை இழந்து 269 ஓட்டங்கள் எடுத்தது. விஷாத் ரன்திக்க (66) மற்றும் தசுன் ஷானக்க (49) ஆகியோர் துடுப்பாட்டத்தில் பிரகாசித்தனர். ஜப்னா அணியின் பந்துவீச்சில் வேகப்பந்துவீச்சாளரான இசித விஜேசுந்தர 5 விக்கெட்டுக்களை சாய்த்தார்.

>>5 புதுமுக வீரர்களுடன் ஆஸி.யை சந்திக்கும் இங்கிலாந்து அணி

பின்னர் போட்டியின் வெற்றி இலக்கினை (270) ஜப்னா அணி 48.5 ஓவர்களில் 6 விக்கெட்டுகளை இழந்து 271 ஓட்டங்களுடன் அடைந்தது. சந்துன் வீரக்கொடி (73), ரொன் சந்திரகுப்தா (63) ஆகியோர் ஜப்னா அணிக்கு வெற்றியை பெற்றுக்கொடுத்தனர்.

போட்டியின் சுருக்கம்

 

கொழும்பு – 269/8 (50) விஷாத் ரன்திக்க 66, தசுன் ஷானக்க 49, இசித விஜேசுந்தர 60/5

 

ஜப்னா – 271/6 (47.5) சந்துன் வீரக்கொடி 73, ரொன் சந்திரகுப்தா 63, திலும் சுதீர 55/3

 

முடிவு – ஜப்னா 4 விக்கெட்டுக்களால் வெற்றி

>> மேலும் கிரிக்கெட் செய்திகளைப் படிக்க <<