இந்த ஆண்டு ஐபிஎல் தொடரிலிருந்து தனிப்பட்ட காரணங்களால் விலகுவதாக டெல்லி கெப்பிடல்ஸ் அணியில் இடம்பிடித்திருந்த இங்கிலாந்து அணியின் அதிரடி வீரர் ஹெரி ப்ரூக் அறிவித்துள்ளார்.
கடந்தாண்டு ஐபிஎல் தொடரில் சன்ரைசர்ஸ் ஹைதராபாத் அணிக்காக விளையாடிய ஹெரி ப்ரூக், 11 போட்டிகளில் விளையாடி ஒரு சதம் உட்பட 190 ஓட்டங்களை மட்டுமே எடுத்திருந்தார். இதனால் அவரை இம்முறை ஐபிஎல் ஏலத்திற்கு முன்னரே ஹைதராபாத் அணி கழட்டிவிட்டது. இந்த நிலையில் ஐபிஎல் மினி ஏலத்தில் டெல்லி கெப்பிடல்ஸ் அணி அவரை 4 கோடி ரூபாய்க்கு ஏலத்தில் எடுத்தது.
இங்கிலாந்து அணியானது அண்மையில் இந்தியாவில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் விளையாடியது. இதில் அபாரமாக விளையாடிய இந்திய அணி 4-1 என்ற கணக்கில் டெஸ்ட் தொடரைக் கைப்பற்றி அசத்தியது. முன்னதாக இத்தொடருக்கான இங்கிலாந்து அணியில் சேர்க்கப்பட்டிருந்த நட்சத்திர வீரர் ஹெரி ப்ரூக் தனிப்பட்ட காரணங்களினால் இத்தொடரிலிருந்து விலகினார்.
இதையடுத்து அவர் இந்தியாவில் நடைபெறும் ஐபிஎல் தொடரில் விளையாடுவார் என எதிர்பார்க்கப்பட்டது. ஆனால், கடைசி நேரத்தில் அவர் தனிப்பட்ட காரணங்களுக்காக இம்முறை ஐபிஎல் தொடரிலிருந்து விலகுவதாக அறிவித்துள்ளார்.
- ஐபிஎல் தொடரில் களமிறங்கும் ஷெமார் ஜோசப்
- கொல்கத்தா நைட் ரைடர்ஷ் அணியில் இணையும் இங்கிலாந்து வீரர்
- T20 உலகக் கிண்ணத்திலிருந்து விலகினார் மொஹமட் ஷமி
தனது பாட்டி இறந்தன் காரணமாகவே நடப்பாண்டு ஐபிஎல் தொடரிலிருந்து விலகியுள்ளதாக ஹெரி ப்ரூக் தனது சமூகவலைத்தள பதிவில் தெரிவித்துள்ளார்.
இதுகுறித்து அவர் தனது பதிவில், ‘வரவிருக்கும் ஐபிஎல் தொடரில் விளையாடுவதில்லை என்ற கடினமான முடிவை நான் எடுத்துள்ளேன் என்பதை என்னால் உறுதிப்படுத்த முடியும். டெல்லி கெப்பிடல்ஸ் அணியால் தேர்ந்தெடுக்கப்பட்டதில் நான் மிகவும் உற்சாகமாக இருந்தேன், மேலும், அனைவருடனும் இணைவதற்கு மிகவும் ஆவலுடன் இருந்தேன். இந்த முடிவின் பின்னணியில் எனது தனிப்பட்ட காரணங்களைப் பகிர்ந்து கொள்ளத் தேவையில்லை என்று நான் நினைக்கவில்லை என்றாலும், நான் விலகியதற்கான காரணம் என்ன என்று பலர் கேட்பார்கள் என்று எனக்குத் தெரியும்.
எனவே இதைப் பகிர விரும்புகிறேன். கடந்த மாதம் நான் என் பாட்டியை இழந்தேன். அவர் எனக்கு எப்போதும் உறுதுணையாக இருந்தார். நான் என் குழந்தைப் பருவத்தின் பெரும்பகுதியை அவரது வீட்டில் கழித்தேன். கிரிக்கெட் மீதான எனது அணுகுமுறையை நான் மறைந்த என் தாத்தாவால் கற்றுக்கொண்டேன். நான் அபுதாபியில் இருந்து இந்தியாவுக்கு விமானத்தில் செல்வதற்கு முந்தைய நாள் இரவு இந்திய டெஸ்ட் சுற்றுப்பயணத்தை விட்டு வெளியேற முடிவு செய்தேன்.
ஏனென்றால் என் பாட்டிக்கு உடல்நிலை சரியில்லாமல் இருக்கிறது என்றும், அவரால் நீண்ட காலம் உயிர் வாழ முடியாது என்றும் எனக்கு முதலில் கூறப்பட்டது. இப்போது அவர் என் குடும்பத்தை விட்டு நிரந்தரமாக பிரிந்துவிட்டார். அதனால் நான் என் குடும்பத்துடன் இருக்க வேண்டும். கடந்த சில ஆண்டுகளாக, எனது மனநலம் மற்றும் எனது குடும்ப நலனுக்கு முன்னுரிமை அளிக்கக் கற்றுக்கொண்டேன், உண்மையாகச் சொல்வதானால், குடும்பத்தை விட வேறு எதுவும் எனக்கு முக்கியமில்லை’ என்று கூறியுள்ளார்.
இதனிடையே, இம்முறை ஐபிஎல் தொடரில் டேவிட் வோர்னருடன் இணைந்து ஹெரி ப்ரூக் ஆரம்ப துடுப்பாட்ட வீரராகவோ அல்லது நான்காம் இடத்திலோ களமிறங்குவார் என எதிர்பார்க்கப்பட்ட நிலையில் தற்போது ஐபிஎல் தொடரிலிருந்தே ஹெரி ப்ரூக் விலகியுள்ளது டெல்லி கெபிட்டல்ஸ் அணிக்கு பெரும் பின்னடைவை ஏற்படுத்தும் என எதிர்பார்க்கப்படுகிறது. இதனால் அவருக்கு சரியான மாற்று வீரரை தேர்வு செய்யும் முயற்சியில் தற்போது அந்த அணி இறங்கியுள்ளதாக இந்திய கிரிக்கெட் வட்டாரங்கள் செய்தி வெயியிட்டுள்ளன.
>> மேலும் கிரிக்கெட் செய்திகளைப் படிக்க <<
