මාලිගාවත්ත, කොරෝනා සහ ක්‍රිකට්

වේලාව සවස හය පමණ වන්නට ඇත. මම මාලිගාවත්ත මාවත ඔස්සේ “ලක්සෙත සෙවන” මහල් නිවාස සංකීර්ණය ඉදිරියෙන් දිවෙන සෙබස්තියන් කැනල් මාවත දෙසට ඇවිද යමින් සිටිමි. මා සිටිනා ස්ථානයට මීටර දෙතුන් සියයකට නොවැඩි දුරකින් ආර්. ප්‍රේමදාස ජාත්‍යන්තර ක්‍රිකට් ක්‍රීඩාංගණයේ විදුලි පහන් කණු විරාජමානව නැගී සිටින අයුරු දිස්වේ.

මාලිගාවත්ත…

නමට අනුව නම් එය මාලිගාවේ උද්‍යානයයි.. නමුත් මාලිගාවත්ත මහපොළොවේ ඇති යථාර්ථය එය නොවේ. මාලිගාවත්ත නාමය සමඟින් බැඳී පවතින බොහෝ දේ තිබේ. ඒ අතර ඉහළින්ම තිබෙන අංගයක් වන්නේ ක්‍රිකට් ක්‍රීඩාවයි.

ක්‍රිකට්වලින් මාලිගාවත්ත වෙන් කිරීම කළ නොහැකි දෙයකි. වත්මන් ශ්‍රී ලාංකික ක්‍රිකට් ක්‍රීඩාවේ නිල නොලත් මහගෙදර ලෙසින් හැඳින්විය හැකි ආර්. ප්‍රේමදාස ක්‍රීඩාංගණය හෙවත් ඛෙත්තාරාම ක්‍රීඩාංගණය  පිහිටා තිබෙන්නේ ද මේ කියනා මාලිගාවත්තේ ය. 

සාමාන්‍ය දිනයක නම් මේ වේලාවට මෙම මාවත දිගේ නිදහසේ ඇවිද යාම සිහිනයකි. වෙනදාට මේ මාවත සමාජයේ බොහෝ දෙනෙකුට විවෘත නොවන වෙනස්ම ආකාරයේ පැතිකඩක් නිරූපණය කරයි. එහි ප්‍රධාන චරිත නිරූපණය කරමින් ත්‍රිරෝද රථ රියදුරන් රංචු පිටින් එකා පසු පස එකා තරගයට මෙන් නළා ශබ්ද කරමින් ජීවන අරගලයේ යෙදෙන අතරේ සෙසු චරිත නිරූපණය කරන තවත් බොහෝ පිරිසක් “ඩේලි බිස්නස්” තුළින් තම ජීවන අරගලයේ නිරත වෙයි. 

මාලිගාවත්තේ හැදී වැඩෙන යොවුන් ගැටවරයන් හා වීදි ක්‍රිකට් ක්‍රීඩාව අතර ඇත්තේ ආත්මීය බැඳීමකි. වෙනදාට මෙම අතුරු පාරවල් තැනින් තැන ඇඳි කැඩුණ ප්ලාස්ටික් පුටු කැබැල්ලක් හෝ හිස් තීන්ත බකට්ටුවක් වැනි යමක් කඩුල්ලට තබාගෙන ඇඳිරි වැටෙන තෙක් වීදි ක්‍රිකට් ක්‍රීඩාවේ යෙදුණ කොල්ලෝ කුරුට්ටන්ගෙන් පිරී පවතී.

නමුත් අද මේ මොහොතේ මාලිගාවත්ත මාවතත් ඇතුළුව මේ අවට සියලු මං මාවත් හිස්ව ගොසිනි. වෙනදා අතුරු ජනාකීර්ණව පවතින අතුරු පාරවල් අද සම්පූර්ණයෙන්ම හිස්ය. මේ ප්‍රදේශයන් පමණක් නොව මේවායේ ජීවත් වන ජනතාවගේ සාමාන්‍ය ජන ජීවිතය ද දැන් ලොක් ඩවුන් වී ඇති සෙයකි. අද මාලිගාවත්ත නිහඬ ය.

මාලිගාවත්තටත් මෙසේ වී නම් අන් පළාත් ගැන අමුතුවෙන් කිවයුතු නොවේ.

අහෝ කොරෝනාව අපට කළ හදියක තරම!

2020 වසර ආරම්භ වූයේ නැවුම් බලාපොරොත්තු රැසක් පොදි බැඳගෙන බව අමුතුවෙන් කිවයුතු නොවේ. ආර්ථික හා සමාජීය වශයෙන් පමණක් නොව ක්‍රීඩා ක්ෂේත්‍රය තුළින් ද අප බොහෝ දෙනා 2020 වසර වෙත පියමැන්නේ ඉතා විශාල බලාපොරොත්තු රැසක් කරපින්නාගෙනය..

විශේෂයෙන්ම 20/20 ක්‍රිකට් ලෝක කුසලානයට ඉතිරි වී තිබුණේ මාස කිහිපයක් පමණක් නිසා බොහෝ ක්‍රිකට් ප්‍රේක්ෂකයන් වෙනදාටත් වැඩි උනන්දුවකින් සිටි බව අමුතුවෙන් කිවයුතු නොවේ. පරාජ රැල්ලකින් හෙම්බත්වී සිට නව පුහුණුකාරීත්වයක් සමඟින් ඉදිරියට ගමන් කරන්නට අප සූදානම් වූවා පමණි.

නමුත් සොබාදහම අපට සරදම් කළ අපූරුව..

පියවි ඇසටවත් නොපෙනෙන තරම් වූ ඉතා කුඩා වයිරසයක් ලොව පුරා මිනිස් ජීවිත මිලියන ගණනක් උඩු යටිකුරු කරවන්නට සමත් වන බව කිසිවෙකුත් අනුමාන නොකරන්නට ඇති බවට සැකයක් නොමැත. ලොව දැවැන්ත රාජ්‍යයන් පවා දණින් වට්ටවන්නට සමත් වූ මෙම වයිරසය ඒ හා සමානවම ක්‍රීඩා ලෝකය ද ගිලගත්තේ අප බොහෝ දෙනෙකුගේ බලාපොරොත්තු සුනුවිසුනු කර දමමිනි. 

ලොව විශාලතම ක්‍රීඩා සැණකෙළිය ලෙසින් හඳුන්වන ගිම්හාන ඔලිම්පික් උළෙල පවත්වන්නට නියමිතව තිබුණේ 2020 වසරේ දී ජපානයේ ටෝකියෝ නගරයේ දී වුවත් එම සැණකෙළිය ද 2021 වසරේ ජූලි මාසය දක්වා කල් දමන්නට සංවිධායකයන්ට සිදු වූයේ කොරෝනා වයිරසය නිසා ඇතිවූ දැඩි බලපෑම හේතුවෙනි.

ශ්‍රී ලාංකිකයන් වන අපට ඔලිම්පික් උළෙල කල් යෑමටත් වඩා කණගාටුදායක සිදුවීම වූයේ 2020 වසරේ අප්‍රේල් මාසයේ පවත්වන්නට නියම වී තිබූ පන්දුවාර 20/20 ක්‍රිකට් ලෝක කුසලාන තරගාවලිය 2021 වසරේ ඔක්තෝබර් මාසය දක්වා කල් යෑමය. 

අපි මේ වසංගතයේ මුල් වකවානුව දෙස මොහොතක් හැරී බලමු.

ඉදිරියේ සිදුවන්නට නියමිතව තිබූ ආපදාවන්ට පූර්විකාවක් සපයමින් මේ සිදුවීම් පෙළේ කූටප්‍රාප්තිය දිග හැරෙන්නේ මෙම වසරේ මුල් භාගයේ, එනම් මාර්තු මාසයේ එංගලන්ත කණ්ඩායමේ ශ්‍රී ලංකා තරග සංචාරය අතරතුර දී ය.

එහි දී එංගලන්තය සහ ශ්‍රී ලංකාව අතර මාර්තු 19 සිට 23 දක්වා ගාල්ල ජාත්‍යන්තර ක්‍රිකට් ක්‍රීඩාංගණයේ සහ මාර්තු 27 සිට 31 දක්වා කොළඹ එස්. එස්. සී. පිටියේ පැවැත්වීමට නියමිතව තිබූ ටෙස්ට් තරග දෙක දින නියමයක් නොමැතිව කල් දමන ලදි.

තරගාවලියේ පුහුණු තරග දෙකම බාධාවකින් තොරව පැවැත්වීමට අවස්ථාව ලැබී තිබුනත් එම පුහුණු තරග දෙක අවසාන වන විට ශ්‍රී ලංකාව තුළ කොරෝනා වයිරසය ආසාදනය වූ රෝගීන් තිදෙනෙකු හමුවීමත්, ගෝලීය වශයෙන් COVID–19 වසංගතය නරක අතට හැරීමත් නිසා පැවැත්වීමට නියමිතව තිබූ ටෙස්ට් තරගාවලිය කල් දැමීමට තීරණය කර ඇති බව රටවල් දෙකෙහිම ක්‍රිකට් ආයතන විසින් ප්‍රකාශයට පත් කෙරිනි. එහි දී ක්‍රීඩකයන්ගේ ආරක්ෂාව පිළිබඳව සලකා බලා මෙම තීරණයට එළඹුණ බව දෙපාර්ශවය විසින්ම සඳහන් කරන ලදි.

ඉන් පසුව ඉන්දියාව හා දකුණු අප්‍රිකාව අතර පැවැත්වෙමින් තිබූ එක්දින තරගාවලියේ ඉතිරි තරග ප්‍රේක්ෂකයන් රහිතව පැවැත්වීමට දෙරටේ ක්‍රිකට් පාලක මණ්ඩලයන් තීරණය කිරීමත්, පසුව පැවති තත්වය තවදුරටත් නරක අතට හැරීම නිසා එම තීරණය වෙනස් කරමින් ක්‍රීඩකයන්ගේ ආරක්ෂාව තකා තරගාවලිය සම්පූර්ණයෙන් අවලංගු කිරීමටත් තීරණය කිරීමත්, ඉන් අනතුරුව පැවැත්වීමට නියමිතව තිබූ අනෙකුත් බොහෝ ජාත්‍යන්තර මෙන්ම දේශීය තරගාවලි ද එකින් එක දින නියමයක් නොමැතිව කල් යද්දී ප්‍රේක්ෂකයන් වශයෙන් අපට ඉතිරි වී තිබුණේ සිදු වන්නේ කුමක්ද යන්න බලා සිටීමට පමණි.

ඉන් අනතුරුව පැවති තත්ත්වය පාලනය කිරීම සඳහා ශ්‍රී ලංකා රජය විසින් රට පුරා නිරෝධායන ඇඳිරි නීතිය පැනවීම නිසා ඉන් පෙර කවරදාකවත් නොලැබූ අත්දැකීම් රැසකට මුහුණ දෙන්නට අපට අවස්ථාව උදා විය. දින දෙකකට වැඩි කාලයක් එක දිගට නිවසේ රැඳී සිට පුරුද්දක් නොමැති අප බොහෝ දෙනෙකුට ආරම්භයේ දී එය ඉතා අසීරු අත්දැකීමක් වූ බව නොරහසකි. නමුත් ක්‍රමයෙන් ඒ රටාවට ගැළපෙන ආකාරයට දිවි පෙවෙත වෙනස් කර ගන්නට අප බොහෝ දෙනෙකු සමත් විය. 

වෙනදා නිවාඩුවක් ලද සැණින් නිවසින් පිටව ගොස් මිතුරන් හා එක්ව ක්‍රිකට්, වොලිබෝල් වැනි ක්‍රීඩාවල නිරත වූ තරුණ තරුණියන් ඒ දින කිහිපය තුළ නිවෙස් වලම රැඳී සිටිමින් තම පවුලේ සාමාජිකයන් හා ක්‍රීඩාවේ නිරත වූයේ ඔවුන්ගේ අතීත මතකයන් රැසක් නැවතත් ආවර්ජනය කර ගැනීමට අවස්ථාව උදා කරගනිමිනි.

එසේම ඒ කාල සීමාව තුළ යොවුන් තරුණ තරුණියන් බොහෝ දෙනෙකු පරිගණක ක්‍රීඩාවන්ට යොමුවීම ද වැඩි වශයෙන් දක්නට ලැබුණ අතර අප කුඩා කළ බොහෝ සෙයින් ඇලුම් කළ බුක් ක්‍රිකට් වැනි විනෝදාත්මක ක්‍රීඩා ද වැඩි වශයෙන් ජනප්‍රිය වී තිබුණි.

කෙසේ හෝ දේශීය වශයෙන් මේ සිදුවීම් පෙළ ඒ අයුරින් දිග හැරෙන විට ජාත්‍යන්තර ක්‍රීඩා කවුන්සිලයන් මෙම වසංගතයට මුහුණ දෙමින් ක්‍රීඩා තරගාවලි පවත්වා ගෙන යාමේ හැකියාව පිළිබඳව හදාරමින් තිබුණි. එහි ප්‍රතිඵලයක් ලෙස ජාත්‍යන්තර ක්‍රිකට් කවුන්සිලය විසින් ඉදිරියේ පවත්වන ක්‍රිකට් තරගාවලි සඳහා නව නීතිරීති හා යෝජනා කිහිපයක් හඳුන්වා දීමට තීරණය කරන ලදි. 

ඒවායෙන් ප්‍රධානතම යෝජනා කිහිපයක් පහතින් සඳහන් කර ඇත.

• ටෙස්ට් තරගයක් අතරතුර දී Covid-19 රෝග ලක්ෂණ පෙන්වන ක්‍රීඩකයෙකු වෙනුවට වෙනත් ක්‍රීඩකයෙකු ආදේශ කිරීමට කණ්ඩායම්වලට අවසර ලැබේ.
• සංචරණය සඳහා පවතින බාධා නිසා තරග විනිශ්චය කිරීමට ක්‍රීඩා කරන රටවල් දෙකටම අයත් නොවන මධ්‍යස්ථ විනිසුරුවන් පත් කිරීමේ අවශ්‍යතාවය තාවකාලිකව ඉවත් කරනු ලැබේ.
• දේශීය විනිසුරුවන් යොදා ගැනෙන නිසා සිදු විය හැකි අවාසි මගහැරවීමට තරගයක එක් එක් ඉනිමේ දී එක් එක් කණ්ඩායම සඳහා අතිරේක අසාර්ථක DRS අවස්ථාවක් හිමි වේ. මේ අනුව ටෙස්ට් තරගයක එක් ඉනිමක දී එක් කණ්ඩායමකට අසාර්ථක Review අවස්ථා 3ක් හා එක්දින තරගයක දී අසාර්ථක Review අවස්ථා 2ක් බැගින් හිමි වේ.
• තරගාවලියට සහභාගී වන කණ්ඩායම් සෑම විටම ජෛව ආරක්ෂිත බුබුලක් තුළ නවාතැන් ගත යුතුය. ඉන් පිටතට සහ නැවත බුබුල තුළට ගමන් කරන සෑම අවස්ථාවකම සනීපාරක්ෂාව තහවුරු කළ වාහනයක පමණක් ගමන් කළ යුතුය. (ජෛව ආරක්ෂිත බුබුලක් යනු COVID–19 ආසාදන අවදානම අවම කිරීම සඳහා නිර්මාණය කරන ලද බාහිර ලෝකයෙන් හුදකලා වූ ආරක්ෂිත හා ආරක්ෂිත පරිසරයකි. එය බොහෝ විට කණ්ඩායම නවාතැන් ගෙන සිටින හෝටලය විය හැක. කොරෝනා වයිරසය ආසාදනය නොවී ඇති බවට පරීක්ෂණ මඟින් තහවුරු කරගැනීමෙන් පසුව ක්‍රීඩාවට සම්බන්ධ පුද්ගලයින්ට, සහායක කාර්ය මණ්ඩලයට සහ තරග නිලධාරීන්ට පමණක් එම ආරක්ෂිත ප්‍රදේශයට ඇතුළු වීමට අවසර හිමි වේ.)
• ක්‍රීඩකයන් සහ සහායක කාර්ය මණ්ඩල සාමාජිකයන් විසින් පුද්ගලික ආරක්ෂක උපකරණ (Personal Protective Equipment) භාවිතා කළ යුතුය.
• පන්දුව ස්පර්ශ කිරීමෙන් පසු සනීපාරක්ෂක අත් සේදීම කළ යුතුය.
• පන්දුව ස්පර්ශ කිරීමෙන් පසු ඇස්, නාසය සහ මුඛය ස්පර්ශ නොකළ යුතුය.
• පන්දුව ඔපදැමීම සඳහා ඛේටය භාවිතා නොකළ යුතුය.
• විනිසුරුවන් පන්දුව ස්පර්ශ කිරීමේ දී අත්වැසුම් පැලඳීම ගැන සලකා බැලිය යුතුය.
• පිටිය තුළ දී සෑම විටම සමාජ දුරස්ථභාවය පවත්වා ගත යුතුය. තවද කැප්, තුවා, අව් කණ්ණාඩි ආදී පුද්ගලික අයිතමයන් විනිසුරුවන්ට හෝ කණ්ඩායම් අනෙකුත් සාමාජිකයින්ට ලබා දීම සම්පූර්ණයෙන් තහනම්ය. සෑම ක්‍රීඩකයෙකුටම ඔහුට පමණක් සීමා වූ පුද්ගලික අයිතම කට්ටලයක් තිබිය යුතුය.
• පිටියෙන් පිටත දී සෑම විටකම සමාජ දුරස්ථභාවය පවත්වා ගැනීම කළ යුතුය.
• ක්‍රීඩාව තුළ හා ඉන් පිටත දී ක්‍රීඩකයන්ට අවශ්‍ය කරන උපකරණ පොදුවේ භාවිතා කිරීම හැකිතාක් සීමා කළ යුතුය. එසේ කිරීම අත්‍යවශ්‍ය නම් පමණක් එම උපකරණ නිසි පරිදි පිරිසිදු කර ඇති බවට සහතික කළ යුතුය.
• රඹන්නන්ට තරග නැරඹීමට අවසර තිබේ නම්, සෑම විටෙකම සමාජ දුරස්ථභාවය පවත්වා ගත යුතුය.

ඉහත සඳහන් නීතිරීති වලට අනුකූලව යමින් ක්‍රිකට් තරග බිමේ තරගාවලි කිහිපයක්ම මේ වන විට සාර්ථකව පැවැත්වෙමින් තිබෙයි. ඒ අතරින් එක්සත් අරාබි එමීර් රාජ්‍යයේ පැවැත්වෙන ඉන්දීය ප්‍රීමියර් ලීග් තරගාවලිය විශේෂත්වයක් ගනී. 

මේ නුපුරුදු වටපිටාව ක්‍රීඩකයන්ට මෙන්ම පරිපාලකයන්ටත් අලුත් අත්දැකීමක් වූ නමුත් ඔවුන් සියලු දෙනා ඒ සඳහා සාර්ථක ලෙසින් මුහුණ දෙමින් සිටින බව පෙනෙන්නට තිබේ. විශේෂයෙන්ම මෙවැනි දැඩි ආරක්ෂිත වටපිටාවක රැඳී සිටිමින් දිගින් දිගටම ක්‍රීඩාවේ නිරත වීම ඉතා අපහසු කටයුත්තකි. එසේ ක්‍රීඩා කරන විට ක්‍රීඩකයන්ගේ මනසට දැනෙන්නා වූ පීඩනය අතිමහත් ය. 

මේ නිසා තරගාවලි සංවිධායකයන් මෙන්ම පුහුණුකරුවන් ඇතුළු සහය කාර්ය මණ්ඩල සාමාජිකයන් ද ක්‍රීඩකයන්ගේ කායික සෞඛ්‍යය පිළිබඳව මෙන්ම මානසික සෞඛ්‍ය පිළිබඳවත් වැඩි අවධානයක් යොමු කරන බව දක්නට ලැබෙයි. ඒ සඳහා ක්‍රීඩකයන් වෙනුවෙන් නිර්මාණය කරන ලද විවිධ විනෝද ක්‍රීඩාවන්, දැනුම මිනුම තරග ආදිය යොදාගන්නා ආකාරය දැකිය හැක.

කෙසේ නමුත් දැනට පැවැත්වූ තරගාවලි වල සාර්ථකත්වය විමසීමේ දී ඉදිරියට පැවැත්වීමට නියමිත තරගාවලි එතරම් බාධාවකින් තොරව පැවැත්වීමේ හැකියාවක් පවතින බව පැහැදිලිය. එනමුත් ක්‍රීඩාංගණ තුළ ප්‍රේක්ෂකාගාර ප්‍රේක්ෂකයන්හට විවෘත වීමට නම් තවත් කාලයක් ගත වනු ඇත. ඒ පිළිබඳව අනාගත වාක්‍ය පැවසීමට සුදුසු කාලය මෙය නොවේ.

>> ස්වීප් පහර නම් සිල්වා! චාමර සිල්වා!

කොරෝනාවෙන් ක්‍රීඩාවට පමණක් නොව මුළු මහත් ජන ජීවිතයටම ඇතිවී තිබෙන අර්බුදය සුළුපටු නොවේ. එහි බලපෑම කෙතරම් ද යන්න ඇස්තමේන්තු කිරීමට තවම කල් වැඩිය. නොදන්නා අයවලුන්ගේ දැනගැනීම පිණිස මේ ලිපිය ලියැවෙන මොහොත වන විට ඉන් සෘජුව බලපෑම් එල්ල වූ මිනිස් ජීවිත ගණන පමණක් පහතින් සැකෙවින් ලියා දක්වමි.

• ලොවපුරා ආසාදනය වූ ගණන 41,500,885 (කෝටි 4යි ලක්ෂ 15ක්)
• ඉන් මරණයට පත් වූ ගණන 1,136,530 (ලක්ෂ 11ක්)
• සුවය ලබා ඇති ගණන 30,918,824 කෝටි 3යි ලක්ෂ 9ක්)
• මේ මොහොතේ ප්‍රතිකාර ලබන ගණන 9,445,531 (ලක්ෂ 94 ක්)

ලොව පුරා මිනිස් ජීවිත ලක්ෂ 11කට වැඩි ප්‍රමාණයක් බිලිගෙන ඇති මේ මාරාන්තික වයිරසය තවමත් එහි ගමන නිමා කර නැත. ඔබ මේ ලිපිය කියවන මොහොතේ ද එය මිනිස් ජීවිත බිලි ගනිමින් සිටියි. ඉතින් අප ආරක්ෂා විය යුතුය. 

ඒ සඳහා සෞඛ්‍ය අංශ නිරන්තරයෙන් ලබා දෙන උපදෙස් ඒ අයුරින්ම පිළිපදිමින් ඒවාට අනුකූල වීමේ වගකීම ඇත්තේ ඔබටත් මටත් ය. අපි අපේ වගකීම නිසි අයුරින් ඉටු කළහොත් මෙම ව්‍යසනයෙන් ගැලවීම එතරම් අපහසු නොවනු ඇත. එසේ වුවහොත් පමණක් අපිට අපේ අනාගතය ගැන සුභවාදී බලාපොරොත්තු තබා ගත හැකි වනු ඇත.

>> තවත් විශේෂාංග ලිපි සඳහා පිවිසෙන්න <<