ඔහු සාම්ප්‍රදායෙන් පිට තමන්ගේ රටාවකටම පන්දු යවයි. සාමාන්‍ය පන්දු යවන්නෙකු මෙන් හිස අසලින් දකුණත් බාහුව ගේනවා වෙනුවට පොළොවට තරමක් සමාන්තර ලෙසින් අත කරකවමින් යොමු කරන පන්දුවෙන් ඔහු ප්‍රතිවාදී පිතිකරුවා අන්දමන්ද කරවයි.
ඔහුගේ ඇඟිලිවලින් ගිලිහෙන පන්දු බොහෝමයක් යෝකර් පන්දු ලෙසින් පැමිණෙන බව පිතිකරුවන් දැන සිටිය ද පිත්තත් පාදයත් අතරින් ගොස් කඩුල්ල බිඳී යෑම වළක්වා ගැනීමට ඔවුහු අසමත් වෙති. ඒ, ඒ තරමටම ඔහුගේ පන්දු යැවීමේ ඇති අසාමාන්‍ය බව හේතුවෙනි. පිට පිටම යවන ලද පන්දු 4ක දී කඩුලු 4ක් දවා ගනිමින් ලෝකයටම අලුත් වාර්තාවක් ඔහුගේ නමින් ලියා ගනු ලැබුවේ එම පන්දු යැවීමේ ඇති සුවි‍ශේෂීතාවය නිසාමය. එපමණක් නොව ලොව වැඩිම කඩුලු ත්‍රිත්ව සංඛ්‍යාවකට හිමිකම් කියන්නේ ද ඔහුය. ‘ස්ලිංගා’ යන සුරතල් නාමයෙන් ලෝකයේම දැඩි ගෞරවයට පාත්‍ර වී සිටින ඔහු වෙන කවුරුත් නොව ‘මාලි’ හෙවත් ලසිත් මාලිංගය.
අගමැති වුන ඉම්රාන් ඛාන් ගැන අරවින්ද කියන කතාව
පාකිස්තානු ක්‍රිකට් වංශ කථාවේ තුන් ඉරියව්වෙන්ම සාර්ථකත්වයට පත් ක්‍රීඩකයා ලෙසින් අදටත් …
අර්ජුන රණතුංගයන්ගේ නායකත්වය යටතේ 1996 දී අපි ක්‍රිකට් ලොව කිරුළු පැළඳුවෙමු. අර්ජුණ රණතුංගයන්ගේ නම ක්‍රිකට් වංශ කතාවේ සදාතනික වන්නේ එකී සුවිශේෂී වූ ජයග්‍රහණය ලෝක සිතියමේ පෑන් තුඩක් තරමට සීමා වී තිබෙන ශ්‍රී ලංකාවට දිනා දීම හේතුවෙනි.
රණතුංගයන්ගෙන් පසු ක්‍රිකට් නායකත්වයට නායකයින් කිහිප දෙනෙක්ම පැමිණියහ. අවසන් මහා තරග 4කට ද සුදුසුකම් ලැබුවෙමු. එහෙත් අහම්බයෙන් මෙන් කණ්ඩායම මෙහෙයවීමට වරම් ලද ලසිත් මාලිංග 2014 වසරේ දී දිනා දුන් විස්සයි විස්ස ලෝක කුසලානය හැරෙන්නට එකී නම් දැරූ කිසිම නායකයකුට ලෝක කුසලානයක් ශ්‍රී ලංකාවට දිනා දීමට නොහැකි විය. එසේ නම් අර්ජුනගේ නම ඉතිහාසයේ රන් අකුරින් ලියැවෙනවා සේම ලසිත් මාලිංගගේ නම ද මෙරට ක්‍රිකට් ක්‍රීඩාවේ රන් අකුරින් ලියැවෙනු ඇත. මේ කුසලාන ජයග්‍රහණයේ අප නොකියැවුණු නොලියැවුණු තැන් බොහෝය. නායකත්වයේ බලාපොරොත්තු සහ එය යථාර්ථයක් බවට පත්වීම, අවසන් මහ තරගයට පෙර දින රාත්‍රිය, කාසියේ වාසිය, පිටියේ සැලසුම් සහ ජයග්‍රහණ රාත්‍රිය සැමරුව හැටි ගැන අපි මාලිංගගෙන් විමසුවෙමු. එහි රස මුසු තැන් බොහෝය.
මේ ලෝක කුසලානය අමුතුම එකකි. පිටත්ව ගිය කණ්ඩායමේ නායකත්වය දිනේෂ් චන්දිමාල් විසින් හෙබවූවද නියමිත වේලාවට පන්දුවාර සංඛ්‍යාව යවා අවසන් කිරීමට නොහැකි වීම නිසා ඔහු තරග තහනමකට ලක්වන්නේය. චන්දිමාල්ට තහනම් වන්නේ එක් තරගයක් පමණි. එහෙත් චන්දිමාල් වෙනුවට කණ්ඩායමට ආ ලහිරු තිරිමාන්න දක්ෂතා අතරට පැමිණීමත්, එතෙක් උප නායකයා ලෙස කටයුතු කළ ලසිත් මාලිංග නායකත්වයේ වගකීම නිසි ලෙස ඉටු කිරීමට සමත්වීම නිසාත් අවසන් පූර්ව සහ අවසන් මහා තරගවල දී අකමැත්තෙන් වුවද චන්දිමාල්ට සිදු වූයේ අතිරේක ක්‍රීඩකයන් සඳහා වූ බංකුවේ සිට තරග නැරඹීමටය. යම් ලෙසකින් ලෝක කුසලානය පැරදුණේ නම් මාලිංග ඇතුළු මුලු තේරීම් කමිටුවට මල් මාලා පැලැන්දූ අත්වලින්ම ගල්මුල් එල්ල කිරීම සාමාන්‍ය තත්ත්වයකි. එහෙත් බලාපොරොත්තු වූ සියල්ල එලෙසම සිදු විය. මාලිංග තම මතකය ශ්‍රී ලංකාවේ අංක 1 ක්‍රීඩා වෙබ් අඩවිය වන ThePapare වෙබ් අඩවිය සමඟ දිග හැරියේ මෙතෙක් මාධ්‍යයට නොකී කතාවක් ද සමඟිනි.
“මේ දේ වුනේ අපි දිනපු වර්ලඩ් කප් එකට ගොඩක් කලින්. දවසක් මම අනූෂ (සමරනායක) අයියටයි තවත් දෙතුන් දෙනකු ඉන්න තැනකදි කිව්වා බය වෙන්න එපා 2014 වර්ල්ඩ් කප් එක මං කැප්ටන් කරලා දිනාගෙන එනවා කියලා. මං දන්නේ නෑ මොන හේතුවක් නිසා එදා මම ඒක කිව්ව ද කියලා. එතකොට මං කැප්ටන් වෙන්න හිතලවත් නැහැ. කොහොම හරි නවසීලන්තය එක්ක තිබුණ තරගය ජය ගත්තට පස්සේ තේරීම් කමිටු සභාපති ලෙස කටයුතු කළ සනත් අයියා (ජයසූරිය) ඇවිල්ලා මට කිව්වා දිගටම කැප්ටන් කරන්නේ මම කියලා. හැබැයි ඒ වෙනකොට චන්දිමාල්ට පැහැදිළිවම කියලා තිබුණා එයා ඉස්සරහ මැච් ක්‍රීඩා කරන්නේ නෑ කියන එක. ඒ අවස්ථාවේ දී එයා කණ්ඩායමෙන් අයින් කළා කියලා එයාට වෙනස්කමක් කරන්නවත් එයාව පහතට දැම්මෙවත් නැහැ. එයත් එක්ක සුහදව කතා බහ කරලා, එයා අපිටත් අපි එයාටත් දෙන්න පුලුවන් සපෝර්ට් එක දුන්නා”.
“මුලින්ම කියන්න ඕන අපිට ලෝක කුසලානය දිනන අඩිතාලම දැම්මේ රංගන (හේරත්) අයියා. ඒ තරගයෙදි අපි ගැහුවේ ලකුණු 120ක් වගේ අඩු ලකුණු සංඛ්‍යාවක්. ඒත් රංගන අයියා තනියම මැච් එක දිනෙව්වා. ඒ දේ වුනේ නැත්නම් අපිට මේ ලෝක කුසලානය ජයග්‍රහණය කරන්න වෙන්නේ නෑ. මේ ජයග්‍රහණයේ පළමු ගෞරවය රංගන අයියාට හිමිවෙනවා. එයා තමයි කඩුලු 6ක් අරගෙන අපිට නොසිතූ ජයග්‍රහණයකට පාර කැපුවේ” යැයි ලෝක කුසලාන මතක පෙළහර මාලිංග දිග හැරියේය.
එම ලෝක කුසලාන ගමනේ අවසන් කණ්ඩායම් 4ට පිවිසීම සඳහා සුපිරි කණ්ඩායම් 10 යටතේ පැවති නවසීලන්තය සමඟ තරගයේ ජය ශ්‍රී ලංකාවට තීරණාත්මක එකකි. ශ්‍රී ලංකාව රැස් කළේ ලකුණු 119ක් වුවත් සුපිරි පන්දු යැවීමක නිරත වුන රංගන හේරත් තනිවම එම තරගය ජයග්‍රහණය කරා රැගෙන යෑම සුවිශේෂී විය. මාලිංග පවසන අන්දමට ශූරතාව කරා යෑමට අවශ්‍ය අධිෂ්ඨානය සහ විශ්වාසය ගොඩනැගෙන්නේ එකි ජයග්‍රහණයෙන් පසුව බවයි.
ලෝක කුසලානය ජය ගැනීම සඳහා සියලු පිඹුරු පත් සැකසෙන්නේ අවසන් තරගය ක්‍රියාත්මක වන දින උදෑසන නොව ඊට පෙර දින රාත්‍රියේදීයි. මාලිංග පවසන අන්දමට එම සාකච්ඡාව සඳහා ස්ථානය වී ඇත්තේ ද මාලිංගගේ කාමරයයි.
“මට මතකයි එදා රෑ පන්දු යවන්නන් සියලුම දෙනා මගේ කාමරයේ හිටියා. කොච්චර ජ්‍යෙෂ්ඨයෙක් වුනත් රංගන අයියත් (හේරත්) ඒ අතර හිටියා. එතැන දී අපි බැලුවේ ප්‍රතිවාදී කණ්ඩායම පීඩනයකට පත් කරනවාට වඩා අපේ හැකියා‍වෙන් කොහොමද පන්දු යවන්නේ කියන එක. විශේෂයෙන්ම පීඩනයක් ආවොත් කවුද ඒ වෙලාවට පන්දු යවන්න ගේන්නේ. මොන වගේ තැන්වලට ද අපි පන්දු යැවිය යුත්තේ වගේ දේවල්. ඒ වගේම අපි අවස්ථානුකූලව හැසිරෙන්න කොහොමද කියන එක ගැනත් ගොඩක් කතා කළා”.
“විශේෂයෙන්ම අපි උත්සාහ කළේ ඒ ඒ ක්‍රීඩකයන්ට හිමි වගකීම මොකද්ද කියන එක ගැන අවබෝධය ලබා දෙන්න. ඒ දේ ගොඩක් සාර්ථක වුනා. ඒ තරගයෙදි අපි අවසන් පන්දුවාර 4 යැව්වේ කොහොමද කියන එක ගැන අදටත් ලෝකය කතා කරනවා. එක පාරටම ඒ දේවල් කරන්නත් බැහැ. නමුත් කළ යුතු දේ අපි වටහා ගත්තා. අපේ දක්ෂතාවය ඕන වෙලාවක අපිට යොදා ගන්න පුළුවන් කියන මානසිකත්වයේ අපි හිටියා. ඒත් දක්ෂතා ඒකාකාරීව පවත්වා ගෙන යන එකයි අමාරු. අපි අවධානය යොමු කළේ අන්න ඒ දේවල් ගැන” යැයි මාලිංග අවධාරණය කරයි.
බංග්ලාදේශයේ පැවති එම අවසන් මහ තරගයේ ශ්‍රී ලංකාවේ ප්‍රතිවාදීන් බවට පත්වූයේ මහේන්ද්‍ර සිං දෝනිගේ නායකත්වයෙන් යුතු ප්‍රබල ඉන්දීය කණ්ඩායමයි. අයි. පී. එල්. හරහා විස්සයි විස්ස තරගයන්හි පමණට වඩා තෙම්පරාදුව සිටින ඉන්දීය කණ්ඩායම සතුව සිටියේ ලොව භයානකම පිතිකරු බලඇණිය යැයි කීවද වැරැද්දක් නොමැත. මාලිංග පැවසූ පරිදිම එම අවසන් පන්දුවාර 4 සඳහා මුහුණ දුන්නේ ඉන්දීය පිලේ ප්‍රබලතම පිතිකරුවන් තිදෙනෙකුය. 2011 ලෝක කුසලාන තරගාවලියේ දක්ෂතම ක්‍රීඩකයා ලෙසින් සම්මාන ලද යුවරාජ් සිං, විරාත් කෝලි සහ මහේන්ද්‍ර සිං දෝනි එම පිතිකරුවන් තිදෙනා වන අතර ඔවුන්ට අවසන් පන්දු 24 තුළ දී රැස්කරගත හැකි වූයේ ලකුණු 19ක් පමණි. මෙහි 18 වැනි සහ 20 වැනි පන්දුවාර යවන ලද්දේ මාලිංග විසින් වන අතර එහි දී පිළිවෙළින් ලකුණු 04ක් සහ 07ක් වශයෙන් ලබා දෙමින් මෙම ලෝක කුසලානයේ වැඩි වගකීමක් ඉටු කරන ලද පන්දු යවන්නා බවට ද පත්විය
“ගොඩක්ම බැලුවේ හයේ, හතරේ ඒවා නොදී ඉන්න. ඒ අරමුණින් පන්දු යැව්වොත් අපිට කඩුලු ලබාගන්න අවස්ථාවක් නැති බව අපි දැනගෙන හිටියා. හැබැයි අපිට වෙන ඩැමේජ් එක අඩුයි කියන විශ්වාසෙන් අපි හිටියා. අවසානයේ අපි ඒ දේ කළා. ඔච්චර දක්ෂ පිතිකරුවන් හිටිය ඉන්දීය කණ්ඩායම කඩුලු 4ක දී ලකුණු 130කට සීමා කරන්න අපිට එදා පුළුවන් වුනා. ඒකයි මං කලිනුත් කිව්වේ ඔවුන්ගේ දක්ෂතා ගැන හිතනවාට වඩා අවධානය යොමු කළ යුත්තේ අපේ දක්ෂතා ගැනයි කියලා”.
එදින රාත්‍රියේ හෝ තරගය පැවති දින උදෑසන හෝ ඉන්දීය කණ්ඩායමේ කිසිදු ක්‍රීඩකයකු මුණ නොගැසුණු බව පවසන මාලිංග, කාසියේ වාසිය ජයග්‍රහණය කිරීම ද අපූරු සිදුවීමක් බව පවසයි.
“කවුරු හරි මට කිව්වා දෝනි එක්ක කාසියේ වාසිය දිනන එක හරි අමාරුයි කියලා. එයා කවදාවත් මේ වගේ ලොකු තරගවල දී ටොස් එක පරාද වෙන්නෙ නෑ කියලා. ඒ වෙලාවෙදි ඒ කියපු කෙනාට මං කිව්වා රයිට්, ඕ.කේ. මෙදා පාර බලන්න ටොස් එක අනිවාර්යයෙන්ම දිනනවා කියලා. ඒ වෙලාවේ මාත් එක්ක නිරෝෂන් කියලා අපේ ඇනලයිසර් කෙනෙකුත් හිටියා. කිව්ව විදියටම මගේ වාසනාවට එදා මම ටොස් එක ජයග්‍රහණය කළා. ඒකත් මේ ලෝක කුසලානෙ පොඩි පොඩි සුන්දර මතකයන් අතරට එකතු වුන කරුණක්”.
“ඉන්දීය කණ්ඩායම ගත්තහම අපි දන්නවා එයාලා හඹා යන්න ගොඩක් කැමති කට්ටිය. ඒ නමුත් වර්ල්ඩ් කප් ෆයිනල් එකක් වගේ ගත්තොත් ලකුණු පුවරුවේ ලොකු ස්කෝර් එකක් තිබුනොත් ඕනෑම කණ්ඩායමක් පීඩනයට පත්වෙනවා. වාසනාවට ටොස් එක දිනුවා. ඒ තීරණය ගොඩක් සාර්ථක වුනා” යැයි වචන අතරින් වූ මුවඟ රැඳී සිනහවත් සමඟ මාලිංග පවසයි.
“මට මතක විදියට ෆයිනල් එක දවසේ අපිට එච්චරම පීඩනයක් තිබුණේ නෑ. ගොඩක්ම සෙමි ෆයිනල් මැච් එකේ තමයි පීඩනය තිබුණේ. මොකද ඊට කලින් අවුරුද්දේ අපි පැරදුණ කොදෙව් කණ්ඩායම අපේ ප්‍රතිවාදීන් බවට පත්වෙලා තිබුණ නිසා. තරගය දවසේ කිසිම දෙයක් මම මගේ ක්‍රීඩකයන්ට කිව්වේ නෑ. මොකද කියන්න තියෙන දේවල් ඔක්කොම කලින් දවසේ රෑ කියලා තිබුණ නිසා. ඒ තරමටම මට ඔවුන් ගැන විශ්වාසයක් තිබුණා. මට තිබුණේ ඔවුන්ට සුබ පතන එක විතරයි” යැයි තරගයේ පීඩනය සම්බන්ධව මාලිංග අදහස් දැක්විය.
මෙරට පහළ වුන අග්‍රගන්‍ය ක්‍රීඩා දෙපළක් වන හිටපු නායක මහේල ජයවර්ධන සහ කුමාර් සංගක්කාරගේ දශක දෙකකට ආසන්න ක්‍රිකට් දිවියේ සමුගැන්ම සටහන් වුන මෙම ලෝක කුසලාන අවසන් මහ තරගයේ දී ඔවුන්ගෙන් ලැබුණු සේවය කියා නිම කළ නොහැකි බව ද මාලිංග පවසයි.
“මං පන්දු රකින තැනේ හැටියට ෆීල්ඩර් කෙනෙක් දැම්මොත් ඒ ඈන්ගල් එක හරි ද කියලා බැලුවේ කුමාර් අයියා. එයා විකට් කීපර් නිසා හොඳට පේනවා. ඒ වගේම මම පන්දු රකින්නන් යොදවන්නේ කොහොමද කියන එක මහේල අයියා හොඳට දන්නවා. ඒක නිසා මං ගත්ත ගොඩක් තීරණ එයත් එක්ක ගැලපුණා. සීනියර්ස්ලා හිටියා කියලා කැප්ටන්ලා හිටියා කියලා කිසිම කරදරයක් මට තිබුණේ නෑ. ඒක තමයි මේ ජයග්‍රහණයේ රහස” යැයි මාලිංග කියයි.
මෙම තරගයේ දී ලකුණු 77ක් ලබමින් වැඩිම ලකුණු ලද පිතිකරුවා බවට පත්වූ විරා;a කෝලි ලකුණු 11ක් ලබා සිටිය දී හේරත්ගේ පන්දුවකට ලබා දුන් උඩ පන්දුව මාලිංග අතින් ගිලිහී නොයන්නට මෙම ලකුණු සංඛ්‍යාව මීට වඩා අඩුවීමට ඉඩ තිබුණි. එහෙත් ඒ පිළිබඳව මාලිංග දරන්නේ ඊට හාත්පසින්ම වෙනස් අදහසකි.
“නෑ. අපි හැම තිස්සෙම බැලුවේ ලකුණු නවත්තන විදිය ගැන. කෝලි 77ක් ගැහුවත් අපිට පුළුවන් වුනා ඔවුන්වට ලකුණු 130කට නවත්වන්න. එක පිතිකරුවෙකු කොච්චර ලකුණු ගැහුවත් එයාට අන්තය නොදී අනිත් අයව පීඩනයකට පත් කරන එකයි අපේ සැලසුම වෙලා තිබුණේ. කෝලී කියන්නේ හොඳ පිතිකරුවෙක්. ඒත් ඒ ටීම් එක ගත්තහම ඒ වගේ අය ගොඩක් හිටියා. ඉතිං අපිට එයා අවුට් කරගත්තා කියලා නිදහස් වෙන්න බැහැ. ඒ කැච් එක අත ඇරුණු එක හොඳයි කියලා තමයි මට නම් හිතෙන්නේ. මොකද එහෙම නැතුව (සුරේෂ්) රයිනා වගේ ඇවිල්ලා පහර එල්ල කරලා ලොකු ලකුණු සංඛ්‍යාවක් රැස් කළා නම් මේ තත්ත්වය එහෙම් පිටින්ම වෙනස් වෙන්න තිබුණා” යැයි උඩපන්දු ගිලිහී යෑමෙන් වාසි ද සිදු වන බවට මාලිංග ඇඟවීය.
තිසර පෙරේරා එල්ල කරන ලද හයේ පහරත් සමඟ ශ්‍රී ලංකාව ඉදිරියේ කඩුලු 6ක ජයග්‍රහණයක් සනිටුහන් වන විටත් අනෙක් අන්තයේ සිටි කුමාර් සංගක්කාර ලකුණු 52ක් ලබා සිටියේය. ශ්‍රී ලංකාවට සුවිශේෂී වූ එම ජයග්‍රහණයේ තමන් ඇතුළු කණ්ඩායමට අත්‍යාවශ්‍යව තිබූ ජයග්‍රහණයක් බව ද මාලිංග පවසයි. ඒ පිළිබඳව කොතැනකවත් නොකියවුණු සහ නොලියවුණු කවුරුත් නොදන්නා මතකය මාලිංග වචනවලට පෙරළුවේ මේ අයුරිනි.
“ක්‍රීඩකයන් ඉඳලා සපෝර්ට් ස්ටාෆ් එක වෙනකම් හැමෝටම ආසාවක් තිබුණා ලෝක කුසලානයක ජයග්‍රහණය සෙලිබ්‍රේට් කරන හැඟීම ගන්න. මොකද ඒ කණ්ඩායමේ හිටපු කිසිම කෙනෙක් ඒ වෙනකොට ලෝක කුසලානයක් දිනපු අත්දැකීමක් ලබාගෙන නොතිබුණු නිසා. ඒ සතුට මම වැඩියෙන්ම දැක්කේ කුමාර් සහ මහේල අයියලගෙන්. මොකද අපි දිනුවට පස්සේ අපිට මෙඩ්ල් එකක් පැලැන්දුවා. ෆයිනල් මැච් එක ඉවර වුනේ රෑ 10ට 11ට විතර. මැච් එකෙන් පස්සේ ටීම් එකේ අයට තිබුණ පාටියෙදි ඒ මෙඩ්ල් එක මහේල අයියා ගැලෙව්වේ උදේ 7ට”.
“අවුරුදු 20කට වැඩිය රටට ක්‍රීඩා කරලා එයාලට තිබුණ ඒ සතුට එහෙම නම් අනිත් අය ගැන තව කියන්න දෙයක් නෑ. ලෝක කුසලානයක් ජයග්‍රහණය කරනවා කියන්නේ අමුතුම හැඟීමක්. ඒ හැඟීම ආයේ වචනවලට පෙරලන්න අමාරුයි. මට මතකයි ජයග්‍රහණය වෙනුවෙන් තිසර එල්ල කරපු හයේ පහරත් එක්ක අපි ග්‍රවුන්ඩ් එකට ගිය විදිය. අපි කරපු කියපුවා ගැන ඒ වෙලාවේ කිසි ගාණක් තිබුණේ නෑ. ඒත් පස්සේ ටී. වී. එකෙන් පෙන්නනකොට තමයි දැක්කේ කවුරුවත් ඒ දේවල් කළේ හිතලා නොවන බව” යැයි කට කොනකට ආ සිනහව ද සමඟින් ලෝක කුසලාන ජයග්‍රහණයක වූ සුන්දර මතක පෙළ හර මාලිංග අවසන් කළේය.
>> තවත් විශේෂාංග ලිපි සඳහා පිවිසෙන්න <<
