ස්මිත් මාධ්‍ය හමුවේ හඬා වැටෙමින් සමාව ඉල්ලයි

“ඕස්ට්‍රේලියානු කණ්ඩයමේ නායකයා විදිහට මම එහි සියලුම වගකීම් බාර ගන්නවා, මම තීරණ ගැනීමේ දී ලොකු වරදක් කරා, දැන් මම එහි ප්‍රතිඵල අත්විඳිනවා” යැයි මුළු මහත් ක්‍රිකට් ප්‍රජාවෙන් හා ඕස්ට්‍රේලියානු ජනතාවගෙන් කොන්දේසි රහිතව සමාව අයදිමින් ස්ටීවන් ස්මිත් අද (29) ඕස්ට්‍රේලියාවේ සිඩ්නි නුවර දී පැවති මධ්‍ය හමුවක දී සිය හඬ අවදි කළේය. මාධ්‍ය සාකච්ඡාව අතරතුර දී කිහිපවරක්ම හැඟුම්බර වූ හිටපු ඕස්ට්‍රේලියානු නායකයා පන්දුව පළුදු කිරීමේ සිදුවීමට සම්පූර්ණ වගකීම තමා කරට ගත්තේය.

“මගේ කණ්ඩායමේ සියලු දෙනාගෙන් හා ලොව පුරා වෙසෙන ක්‍රීඩාලෝලීන්ගෙන් හා බලාපොරොත්තු කඩවී, තරහින් සිටින සියලු දෙනාගෙන් මම සමාව ඉල්ලා සිටිනවා. කේප් ටවුන්හී වුන සිදුවීමට මට ලැබිය යුතු දඬුවම් ඕස්ට්‍රේලියානු ක්‍රිකට් පාලක මණ්ඩලයෙන් මට ලබා දී තිබෙනවා, මගේ නායකත්වය යටතේ සිදු වූ සිදුවීමෙන් ඔප්පු වෙන්නේ මගේ නායකත්වය අසාර්ථකයි කියලා”, කිහිප වරක්ම ආ හැඬුම් නවතා ගනිමින් ස්ටීවන් ස්මිත් පැවසිය.   

මේ වන විටත් ඕස්ට්‍රේලියානු ක්‍රිකට් පාලක මණ්ඩලය වසරක තරග තහනමක් සමඟින් පැය දහසක ක්‍රිකට් ක්‍රීඩාව උදෙසා ස්වේච්ඡා සේවා කාලයක් ස්ටීව් ස්මිත් හට නියම කර ඇති අතර ඕස්ට්‍රේලියානු ක්‍රිකට් පාලක මණ්ඩලයේ චර්යා ධර්ම පද්ධතියේ පන්දුව පළුදු කිරීමේ සැලැස්ම නැවැත්වීමට කටයුතු නොකිරීම, තරග විනිසුරුවන් හා නිලධාරීන් නොමග යැවීම ඇතුළු කරුණු පහක් උල්ලංඝනය කිරීම මෙම තීරණයට  හේතු වී තිබේ.

වංචාවෙන් දිනන්න ගිය ස්මිත් සහ වෝනර්ට දඬුවම් ලැබුණු හැටි

දකුණු අප්‍රිකාවට එරෙහිව නිව්ලන්ඩ්ස් හී පැවති ටෙස්ට් තරගයේ දී සිදු වූ පන්දුව පළුදු කිරීමේ සිද්ධි මාලාව හේතුවෙන් ස්ටීවන් ස්මිත් හා ඩේවිඩ් වෝනර් හට වසරක ජාත්‍යන්තර ක්‍රිකට්…

“මම මගේ වැරැද්ද නිවැරදි කරගන්න කළ හැකි සෑම දෙයක්ම කරනවා, මේ සිදුවීමෙන් සිදු වූ එකම හොඳ දෙය අනික් අයට මේක හොඳ පාඩමක් වීම පමණයි, මම මුළු ජීවිත කාලයම පසුතැවේවි, මං හිතනවා කාලයත් සමඟ මට නැවත ගෞරවය හා සමාව උපයාගත හැකි වේවි” යැයි ඔහු පවසා සිටියේය.

මම සිදුවීම ස්මිත් විසින් පාපොච්චාරණය කිරීමෙන් අනතුරුව මාධ්‍යවේදීන් ප්‍රශ්න කර සිටියේ මේ මෙවැනි සිදුවීමක් කළ පළමු වතාව මෙය ද නැතිනම් ඔබ කණ්ඩයම මෙවැනි සිදුවීම් පෙරත් කර තිබෙනවා ද යන්නයි. ඒ පිළිබඳව අදහස් දක්වමින් ඔහු ප්‍රකාශ කර සිටියේ තමාගේ මතකයට අනුව තමාගේ නායකත්වය යටතේ මෙවැනි සිදුවීමක් සිදු වූයේ පළවෙනි වතාවට බවයි. ”මගේ දැනීමට අනුව මෙවැනි සිදුවීමක් ඕස්ට්‍රේලියානු කණ්ඩායම තුල කලින් සිදුවී නැහැ, මේ තමයි පළමු වතාව, මම පොරොන්දු වෙනවා අයෙත් මෙවැනි සිදුවීමක් නොවේවි, මම කාටවත් දොස් පවරන්නේ නැහැ, මම ඕස්ට්‍රේලියානු කණ්ඩායමේ නායකයා, කණ්ඩායම තියෙන්නේ මගේ යටතේ, සිදුවූ සිදුවීම් සියල්ලටම මම වගකීම භාර ගන්නවා”   

සිද්ධිය සැලවීමත් සමඟ ඕස්ට්‍රේලියානු අගමැති මැල්කම් ටර්න්බුල් මහතා සිද්ධිය හෙලා දැක ඇති අතර ඕස්ට්‍රේලියානු ක්‍රිකට් පාලක මණ්ඩලයේ ප්‍රධාන විධායක නිලධාරි ජේම්ස් සදර්ලන්ඩ් ප්‍රකාශ කර සිටියේ ක්‍රිකට් පාලක මණ්ඩලයට ක්‍රිකට් ප්‍රේක්ෂක ප්‍රජාව නැවත ක්‍රීඩාව කෙරෙහි නැඹුරු කර ගන්නා ආකාරය පිළිබඳව නැවත සිතීමට සිදුවන බවත්, ක්‍රිකට් ක්‍රීඩාව කෙරෙහි ඕස්ට්‍රේලියාවේ තිබෙන ගෞරවය හා අභිමානය නැවත ගොඩනැගීමට සිදුවන බවත්ය.

නවතා ගත නොහැකිවූ හැඬුම් අතරින් අවසාන වශයෙන් අදහස් පල කළ ස්මිත්, ”මට සමා වෙන්න, මම ක්‍රිකට් ක්‍රීඩාවට ආදරෙයි, මම ආදරෙයි පොඩි ළමයින්ට, මම අසයි ඔවුන් සතුටු කරන්න, මම අසයි ඔවුන් මා ආදරය කරන ක්‍රිකට් ක්‍රීඩාව සෙල්ලම් කරනවා බලන්න, තීරණයක් ගන්න කලින් දෙවරක් හිතා බලන්න, හිතන්න එම තීරණයෙන් අපහසුතාවයට පත් වෙන්නේ කවුද කියලා, ඔබ ඔබේ දෙමාපියන් අපහසුතාවයට පත් කරනවා, මගේ දෙමාපියන් දිහා බලන කොටත් මට වේදනා දැනෙනවා” යැයි පැවසූ ස්ටීවන් ස්මිත් සිය පියාගේ දෑතේ එල්ලී හැඟුම්බර විය. ”මට සමාවෙන්න. මම ඔස්ට්‍රේලියාවට ගෙනා වේදනාවට සමාවෙන්න, ප්‍රේක්ෂකයිනි ඇත්තටම මට සමාවෙන්න” මුළු මහත් ක්‍රිකට් ලෝකයාටම තීරණ ගැනීමේ දී දෙවරක් සිතිය යුතු බව මනාව පසක් කරමින් හිටපු ඕස්ට්‍රේලියානු නායක ස්ටීවන් ස්මිත් පැවසිය.

>> තවත් ක්‍රිකට් පුවත් සඳහා පිවිසෙන්න <<