75 වැනි බ්‍රැඩ්බි පලිහ තරගාවලියේ දෙවන අදියර අද (15) කොළඹ රාජකීය විද්‍යාලයීය රග්බි ක්‍රීඩාංගණයේ දී පැවැත්වුණු අතර නොසිතූ ලෙස රාජකීයයින්ට ප්‍රබල අභියෝගයක් එල්ල කළ ත්‍රිත්ව ක්‍රීඩකයින් දෙවන අදියර ලකුණු 13–24ක් ලෙස ජය ගන්නට සමත් විය.
කෙසේ වෙතත් රාජකීය විද්‍යාලය පළමු අදියරේ දී රැස් කළ ලකුණු 34ත් සමඟ මුළු ලකුණු 47-41ක් ලෙස ලකුණු 6ක පරතරයකින් බ්‍රැඩ්බි පලිහ තමන්ගේ විද්‍යාලයේම රඳවා ගැනීමට රාජකීයයින් සමත් විය.
බ්‍රැඩ්බි පලිහ දෙවෙනි අදියර වෙනුවෙන් නව විනිසුරුවරයෙක්
එළඹෙන 15 වැනිදා පැවැත්වීමට නියමිත 75 වැනි බ්‍රැඩ්බි පලිහේ දෙවෙනි අදියරේ…
75 වැනි බ්‍රැඩ්බි තරගාවලියේ පළමු අදියර මහනුවර පල්ලෙකැලේ ත්‍රිත්ව විද්‍යාලයීය රග්බි ක්‍රීඩාංගණයේ දී පැවැත්වුණු අතර තියුණු තරගයකට පසු ලකුණු 17–34ක් ලෙස තරගය ජය ගෙන ලකුණු 17ක වාසියක් කොළඹට රැගෙන එන්නට රාජකීය ක්‍රීඩකයෝ සමත් වූහ. පසුපසින් සිටියත් දෙවන අදියරේ දී සුපිරි දස්කම් දැක්වූ ත්‍රිත්ව ක්‍රීඩකයින් එක් අවස්ථාවක ලකුණු පරතරය ලකුණු තුනක් දක්වාම අඩු කර ගත්තේ රාජකීයයින්ට නොසිතූ පීඩනයක් එල්ල කරමින්.
රාජකීය ක්‍රීඩක කළිඳු නන්දිලගේ පා පහරින් තරගය ආරම්භ වූ අතර ත්‍රිත්ව ක්‍රීඩකයින් පළමු මිනිත්තුවේ සිටම තරගයට පිවිසුණේ පළමු අර්ධයේ ඔවුන්ට අහිමි වූ ලකුණු 17 සීමාව ඉක්මනින් ඉක්මවා යාමේ අරමුණින්.
කෙසේ වෙතත් දිනේන්ද්‍ර රත්වත්ත පන්දුව අතේ නොතිබුණු රාජකීය ක්‍රීඩකයෙකුට බාධා කළ නිසා විනිසුරු රාජකීය කණ්ඩායමට දඬුවම් පහරක් ලබා දුන් අතර දුලාන් ගුණවර්ධන දෙවන මිනිත්තුවේ දී රාජකීය ලකුණු පුවරුව ක්‍රියාත්මක කරන්නට සමත් විය. (රාජකීය 03 – 00 ත්‍රිත්ව)
06 වැනි මිනිත්තුවේ දී ත්‍රිත්ව කණ්ඩායම රාජකීය උත්සාහක දිනුම් සීමාව ආසන්නයේ දී ස්ක්‍රම් අවස්ථාවක් ලබා ගත් නමුත් අවාසනාවන්ත ලෙස එම අවස්ථාව සාර්ථක වූයේ නැත.
ත්‍රිත්ව ක්‍රීඩකයින් දිගින් දිගටම අතපසුවීම් සිදු කළ අතර 13 වැනි මිනිත්තුවේ දී ත්‍රිත්ව ක්‍රීඩක අමිත් කුලතුංග හට කහ කාඩ්පතක් ලබා දී පිටියෙන් ඉවත් කිරීමට විනිසුරු තීරණය කළේ ත්‍රිත්ව කණ්ඩායමට අර්බුද රාශියක් ගෙනෙමින්.
කෙසේ වෙතත් ක්‍රමයෙන් රාජකීය අර්ධය ආක්‍රමණය කළ ත්‍රිත්ව ක්‍රීඩකයෝ සිය උත්සාහක දිනුම් රේඛාව පෙනෙන මානයේ Line Out අවස්ථාවක් ලබා ගත්තේ රාජකීයයින්ට ප්‍රබල පීඩනයක් එල්ල කරමින්.
රාජකීයයෝ පල්ලෙකැලේ දී ගිනිකෙළි පෙන්වයි
මසකට වැඩි විවේක කාලයක් නිමා කරමින් පාසල් රග්බි වසන්තය 75 වැනි…
රාජකීය ක්‍රීඩකයින් දිගින් දිගටම සිදු කළ අතපසුවීම් නිසා රාජකීය ක්‍රීඩක කළිඳු නන්දිල ද ක්‍රීඩාගාරයට හරවා යැවීමට විනිසුරු තීරණය කළේ දෙපසේම ක්‍රීඩකයින් සම කරමින්.
මිනිත්තු 10ක් පමණ ත්‍රිත්ව ක්‍රීඩකයින් රාජකීය අර්ධයේ රැඳෙමින් ප්‍රබල ආක්‍රමණයක යෙදුණු අතර ස්ක්‍රම් අවස්ථාවකින් පන්දුව ලබා ගෙන දිනේන්ද්‍ර රත්වත්ත 23 වැනි මිනිත්තුවේ දී සිය පළමු උත්සාහක දිනුම වාර්තා කිරීමට සමත් විය. මිනිඳු ජයසුන්දර එහි ප්‍රවර්තනය ද සාර්ථක කර ගැනීමට සමත් විය. (රාජකීය 03 – 07 ත්‍රිත්ව)
ත්‍රිත්ව ක්‍රීඩකයින් රාජකීය ක්‍රීඩකයින්ට ප්‍රබල පීඩනයක් එල්ල කළේ ඔවුන් සිය අර්ධයේම සිර කරමින්. 31 වැනි මිනිත්තුවේ දී ත්‍රිත්ව ක්‍රීඩකයින් සිය ඉදිරිපෙළ ක්‍රීඩකයින් යොදාගෙන ප්‍රබල ආක්‍රමණයක යෙදුනත් තරගය පුරා ඔවුන් සිදු කළ එකම වැරැද්ද – පන්දුව බිම අත හැරීම, නැවත වතාවක් සිදු කරමින් ඔවුන් ධවල රේඛාව ඉදිරිපිට දී ම ලැබුණු අවස්ථාවක් අහිමි කර ගන්නා ලදි.
>> තරගයේ ඡායාරූප ඇල්බමය සඳහා පිවිසෙන්න <<
පළමු අර්ධය අවසානයට මොහොතක් තිබිය දී ත්‍රිත්ව විද්‍යාලයට නැවත වරක් රාජකීය අර්ධයේ Line Out අවස්ථාවක් හිමි වුණු අතර ත්‍රිත්ව කණ්ඩායම එම අවස්ථාව දෝතින්ම ලබා ගත්තේ අලංකාර ක්‍රීඩා විලාසයක් පෙන්නුම් කරමින්.
නිමේෂ් ඒකනායක අලංකාර ලෙස පන්දුව ඉදිරියට රැගෙන ආ අතර හර්ෂ සමරසිංහගේ අලංකාර පන්දු යොමු කිරීමක් සමඟ මිනිඳු ජයසුන්දර පිටිය කොනෙන් ලකුණු රැස් කළේ පළමු අර්ධය ලකුණු සමඟ නිමා කරමින්. එහි අමතර ලකුණු එකතු කිරීමට නම් මිනිදු සමත් වූයේ නැත.
පළමු අර්ධය නිමා වන විට ත්‍රිත්ව විද්‍යාලය කණ්ඩායම් දෙක අතර මුළු ලකුණු පරතරය ලකුණු 8ක් දක්වා අඩු කර ගැනීමට සමත් වූයේ මුළු ලකුණු ගණන ලකුණු 37-29ක් බවට පත් කරමින්.
පළමු අර්ධය: රාජකීය විද්‍යාලය 03 (1P) -12 (2T, 1C) ත්‍රිත්ව විද්‍යාලය
දෙවන අර්ධය ආරම්භයත් සමඟම රාජකීය ක්‍රීඩකයින් OFF SIDE වරදකට හසු වූ අතර ඒ සමඟම ත්‍රිත්ව ක්‍රීඩකයින්ට ස්වර්ණමය අවස්ථාවක් හිමි විය.
Line out අවස්ථාවක් ලබා ගත ඔවුන් රාජකීයයින්ට තමන්ගේ අවියේම පහස ලබා දෙමින් අලංකාර Rolling Maul අවස්ථාවකින් ලකුණු රැස් කරන්නට සමත් විය. ලේනොක්ස් කල්‍යානරතන එම උත්සාහක දිනුම වාර්තා කළ අතර මිනිදුට අමතර ලකුණු එකතු කිරීමට හැකියාවක් ලැබුණේ නැත. (රාජකීය 03 – 17 ත්‍රිත්ව)
ඒ සමඟම මුළු ලකුණු පරතරය ලකුණු තුනක් දක්වා අඩු වූ අතර 41 වැනි මිනිත්තුවේ දී ත්‍රිත්ව ක්‍රීඩකයෙකුට කහ කාඩ්පතක් ලැබීම ඔවුන්ට තරමක අවාසියක් විය.
කෙසේ වෙතත් එම අවස්ථාව උපරිම ලෙස ප්‍රයෝජනයට ගත් රාජකීයයෝ සිය ඉදිරිපෙළට සවි දෙමින් අලංකාර Rolling Maul අවස්ථාවකින් සිය පළමු උත්සාහක දිනුම වාර්තා කිරීමට සමත් විය. රජින්ද ජයසූරිය එම උත්සාහක දිනුම වාර්තා කළ අතර දුලාන් ගුණවර්ධන හට අමතර ලකුණු එකතු කිරීමට හැකියාවක් ලැබුණේ නැත. (රාජකීය 08 – 17 ත්‍රිත්ව)
වෙස්ලි ක්‍රීඩකයෝ අපරාජිතයින්ගේ ඔටුනු ගලවයි
සිංගර් අන්තර් පාසල් ලීග් රග්බි තරගාවලියේ සුපිරිම පෙරළිය සිදු…
ලකුණු පරතරය ලකුණු අටක් දක්වා නැවත ඉහළ ගිය අතර පීඩනය නැවත ත්‍රිත්ව ක්‍රීඩකයින්ගේ දෙසට හැරුණේ ඔවුන්ට එක් ක්‍රීඩකයෙකු අඩු වීමේ අවාසිය ද දැරීමට සිදු වූ නිසාවෙනි.
රාජකීය ක්‍රීඩකයෝ නැවත වතාවක් බ්‍රැඩ්බි පලිහ තමන්ගේ දෙසට හරවා ගනිමින් 53 වැනි මිනිත්තුවේ දී සිය ධවල රේඛාව ආසන්නයේ දී ම Rolling maul අවස්ථාවක් ගොඩ නැගූ අතර රජින්ද ජයසූරිය නැවත වතාවක් ලකුණු රැස් කළේ පෙර උත්සාහක දිනුමේම පුනරූපන දර්ශනයක් පිටියේ දිග හරිමින්. මලීෂ පෙරේරා හට එහි ප්‍රවර්තනය සාර්ථක කර ගන්නට ලැබුණේ නැත. (රාජකීය 13 – 17 ත්‍රිත්ව)
තරගයේ තවත් මිනිත්තු 15ක් ඉතිරිව තිබුණු අතර ත්‍රිත්ව විද්‍යාලයට ජයග්‍රහණය සඳහා ප්‍රවර්තනය කරන ලද උත්සාහක දිනුම් දෙකක් අවශ්‍ය විය. රාජකීය ක්‍රීඩකයින්ට අවශ්‍ය වූයේ විනිසුරුගේ අවසන් සංඥාව පමණයි.
අවසන් මිනිත්තු කිහිපයේ ත්‍රිත්ව ක්‍රීඩකයින් ප්‍රබල උත්සහයක් දැරූ අතර අබ්දුල් රහ්මාන් දක්ෂ ලෙස පන්දුව ඉදිරියට රැගෙන යාමෙන් අනතුරුව කුජන කුලතුංග සුපිරි වේගයෙන් ධවල රේඛාව ඉක්මවා ගියේ තරගය තවත් උණුසුම් කරමින්. බ්‍රැඩ්බි පලිහ ත්‍රිත්ව ක්‍රීඩකයින්ගේ ඇඟිලිවලට ගෑවෙන දුරකට ගෙන එමින් මිහිරංග සුබසිංහ අලංකාර ලෙස අමතර ලකුණු එකතු කළේ ලකුණු පරතරය ලකුණු 6කට අඩු කරමින්. (රාජකීය 13 – 24 ත්‍රිත්ව)
66 වැනි මිනිත්තුවේ දී වාර්තා වූ එම උත්සාහක දිනුමෙන් පසුව ත්‍රිත්ව ක්‍රීඩකයින් ඉතිරි මිනිත්තු කිහිපයත් දැඩි අධිෂ්ඨානයෙන් ක්‍රීඩා කළේ නොසිතූ ජයක් මහනුවරට රැගෙන යාමේ උත්සාහයෙන්.
අවසන් මිනිත්තුවේ දී ඔවුන්ට ස්ක්‍රම් අවස්ථාවක් හිමි වුණු නමුත් පන්දුව ඔවුන්ගෙන් උදුරා ගත් රාජකීයයෝ සුපිරි අවසන් තරගයක් අවසන් කළේ බ්‍රැඩ්බි පලිහ තමන්ගේ දෑතේම තබා ගනිමින්.
අවසන් ලකුණු තත්වය: ත්‍රිත්ව විද්‍යාලය 24 (4T, 2C) – 13 (2T, 1P) රාජකීය විද්‍යාලය
ThePapare.com තරගයේ වීරයා – රෙෂාන් බණ්ඩාරනායක (ත්‍රිත්ව)
ලකුණු රැස් කළ ක්‍රීඩකයෝ
- රාජකීය විද්‍යාලය – දුලාන් ගුණවර්ධන (1P), රජින්ද ජයසුරිය (2T)
- ත්‍රිත්ව විද්‍යාලය – දිනේන්ද්‍ර රත්වත්ත (1T), මිනිඳු ජයසුන්දර (1T, 1C), කුජන කුලතුංග (1T), මිහිරංග සුබසිංහ (1C), ලේනොක්ස් කල්‍යාණරත්න (1T)
>> තවත් රග්බි පුවත් සඳහා පිවිසෙන්න – රග්බි පිටුවට <<
 කොළඹ රාජකීය විද්‍යාලයීය රග්බි ක්‍රීඩාංගණයේ දී පැවැත්වුණු අතර නොසිතූ ලෙස රාජකීයයින්ට ප්‍රබල අභියෝගයක් එල්ල කළ ත්‍රිත්ව ක්‍රීඩකයින් දෙවන අදියර ලකුණු 13–24ක් ලෙස ජය ගන්නට සමත් විය.){kind=link}