ශ්‍රී ලංකා කනිෂ්ඨ මලල ක්‍රීඩා කණ්ඩායම පසුගිය දා ඉන්දියාවේ පටියාලේ හිදී පැවති 60 වැනි ඉන්දියානු ප්‍රාන්ත අතර මලල ක්‍රීඩා තරගාවලියට සහභාගී වී දිවයිනට පැමිණි පසු ඔවුන් නිරෝධායනය කටයුතු සඳහා මාතර නිල්වලා නිරෝධායන මධ්‍යස්ථානය වෙත යොමු කර ඇත.
නිරෝධායන කටයුතු සඳහා මාතර නිල්වලා නිරෝධායන මධ්‍යස්ථානයේ පවතින පහසුකම් ප්‍රමාණවත් නොවන බවට මෙම කණ්ඩායම කළ ඉල්ලීමෙන් අනතුරුව PCR පරීක්ෂණ නිකුත් වීමෙන් පසු ක්‍රීඩා අමාත්‍යාංශයේ මැදිහත් වීමෙන් එම කණ්ඩායම නිරෝධායන කටයුතු සඳහා සුගතදාස හෝටල් පරිශ්‍රය වෙත ගෙන්වා ගැනීමට කටයුතු කර තිබුණි.
එහි දී සුගතදාස හෝටලය වෙත යොමු කළ පළමු දිනයේ දී ම කණ්ඩායමේ කිහිපදෙනෙකු විනය විරෝධී ව කටයුතු කර ඇතැයි සැල වූ වහාම ඒ සම්බන්ධව විනය පරීක්ෂණයක් පැවැත්වීමට ශ්‍රී ලංකා මලල ක්‍රීඩා සංගමය ත්‍රිපුද්ගල කමිටුවක් පත් කළේය.
ක්‍රීඩක ක්‍රීඩිකාවන් තිදෙනෙකු, පුහුණුකරු හා කළමනාකරු සම්බන්ධයෙන් වූ චෝදනා පිළිබඳව අදාළ කමිටුවේ විනය පරීක්ෂණ වාර්තාව ශ්‍රී ලංකා මලල ක්‍රීඩා සංගමයට යොමු කිරීමෙන් පසු අදාළ නිර්දේශ ක්‍රීඩා සංවර්ධන දෙපාර්තමේන්තුවට පසුගිය අගෝස්තු මස ඉදිරිපත් කර තිබුණි.
- උස පැනීමේ ජාත්‍යන්තර පදක්කම් බලාපොරොත්තුව – උෂාන් තිවංක
- සරණාගතයෙකු ලෙස පැමිණ නෙදර්ලන්ත ඉතිහාසය අලුත් කළ ධාවන ශූරිය
- යුපුන් දකුණු ආසියාවේ ක්‍රීඩකයෙකු පැමිණි ඉහලම ශ්‍රේණිගත කිරීමට
- Video – යුද්ධයේදී තුවාල ලැබූ ලෝක වාර්තාලාභියා – දිනේෂ් ප්‍රියන්ත සහ පුහුණුකරු ප්‍රදීප් නිශාන්ත සමඟ සාකච්ඡාව
- සුසන්තිකාටත් කොරෝනා ආසාදනය වෙයි
කණ්ඩායම භාරව කටයුතු කළ කළමනාකරු ඒ. එස්. එන්. අබේසේකර, පුහුණුකරු විමුක්ති ද සොයිසා, ක්‍රීඩක කාලිංග කුමාරගේ, ක්‍රීඩිකා සෙලින්ඩා ජැන්සන් හා ඩබ්ලිව්. වී. එල්. සුගන්ධි සඳහා විනය තීරණ ලබා දී ඇත.
ඒ අනුව මලල ක්‍රීඩා සංගමයේ ත්‍රිපුද්ගල විනය කමිටුව විසින් අදාළ දඬුවම් පැනවීමට තීරණය ලබා දුන් 2021.08.16 දින සිට ඉදිරියට අදාළ දඬුවම් ක්‍රියාත්මක විය යුතු බවට ක්‍රීඩා සංවර්ධන දෙපාර්තමේන්තුව ශ්‍රී ලංකා මලල ක්‍රීඩා සංගමය හා අදාළ ක්‍රීඩක ක්‍රීඩිකාවන්, පුහුණුකරු සහ කළමනාකරු දැනුවත් කළේය.
මේ යටතේ ක්‍රීඩක ක්‍රීඩිකාවන්ට මාස 04ක් සඳහා උසස් දක්ෂතා පුහුණු දීමනාව අත්හිටුවීම, ක්‍රීඩා දෙපාර්තමේන්තුවේ දේපළ පරිහරණය තහනම් කිරීම, පුහුණුකරු හා කළමනාකරු සඳහා මාස 06ක හා වසරක ජාත්‍යන්තර තරග සඳහා සහභාගී වීම අත්හිටුවීම අදාළ විනය ක්‍රියාමාර්ගයන්ට අනුව දඬුවම් ලෙස ක්‍රියාත්මක වේ.
අභිමානවත් ජවසම්පන්න තරුණ පරපුරක් බිහි කිරීමේ දී විනය ප්‍රමුඛ කාරණයක් වන බැවින් ක්‍රීඩක ක්‍රීඩිකාවන් ඇතුළු සියලු දෙනා තම විනය පවත්වා ගැනීම සම්බන්ධව ඉතා වගකීමෙන් කටයුතු කළ යුතු අතර අනාගත පරපුරට වැරදි පූර්වාදර්ශ ලැබීම වැළැක්වීම සඳහා නිරෝධායනයට යොමු කළ හෝටලය තුළ දී විනය නීතිරීති හා නිරෝධායන නීතිරීති ද උල්ලංඝනය කරමින් සාදයක් පැවැත්වූ කනිෂ්ඨ මලල ක්‍රීඩා කණ්ඩායමේ මෙහි නම් සඳහන් අයවලුන්ට ඉහත පරිදි දඬුවම් ලබා දෙන බව ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජනරාල් අමල් එදිරිසූරිය මහතා අවධාරණය කළේය.
ක්‍රීඩා අමාත්‍යාංශය විසින් නිකුත් කරන ලද මාධ්‍ය නිවේදනයකි.
>> තවත් මලල ක්‍රීඩා පුවත් සඳහා පිවිසෙන්න <<
