ශ්‍රී ලංකාවේ දීර්ඝතම ඉතිහාසයක් සහිත පාසල් ක්‍රිකට් මහා සංග්‍රාමය වන, කොළඹ රාජකීය සහ ගල්කිස්ස සාන්ත තෝමස් විද්‍යාල අතර මහාමාන්‍ය ඩී. එස්. සේනානායක අනුස්මරණ කුසලානය වෙනුවෙන් පැවැත්වෙන ‘නිල් මහා සටන’ වාර්ෂික ක්‍රිකට් සංග්‍රාමය, 143 වැනි වරටත් 2022 ජූලි 21 වැනිදා සිට 23 වැනිදා දක්වා කොළඹ SSC ක්‍රීඩාංගණයේ දී පැවැත්වීමට නියමිතය.
කොරෝනා වසංගත තත්ත්වය සහ වර්තමාන ආර්ථික අර්බුදය හේතුවෙන් රාජකීය-සාන්ත තෝමස් ඒකාබද්ධ තරග සංවිධාන කමිටුව පාසල් ද්විත්වයේ ප්‍රධානීන්ගේ මඟපෙන්වීම යටතේ ඉතිහාසයේ 143 වැනි තරග වාරය වන මෙවර තරගය ප්‍රේක්ෂක සහභාගිත්වයකින් තොරව පැවැත්වීමට තීරණය කර ඇති අතර, අදාළ පාසල්වල ක්‍රීඩකයන් රැඳී සිටින ක්‍රීඩක කුටිවලට පමණක් පරිශ්‍රය තුළ අවසර හිමි වී තිබේ.
143 වැනි ‘නිල් මහා සටන’ Dialog TV නාලිකා අංක 140 ඔස්සේ, ThePapare.com හා Dialog ViU app තුළින් සජීව විකාශය කෙරේ. ‘Mustangs කුසලාන’ වෙනුවෙන් පැවැත්වෙන සීමිත පන්දුවාර තරගය, මහා ක්‍රිකට් තරගයෙන් පසුව එළඹෙන සෙනසුරාදා පැවැත්වීමට නියමිතය.
‘නිල් මහා සටන’ සඳහා ශ්‍රී ලංකාවේ ප්‍රමුඛතම සන්නිවේදන සම්පාදකයා වන Dialog Axiata සමාගම අනුග්‍රාහකත්වය දක්වන 14 වැනි අවස්ථාව මෙයයි. මෙම තරගයේ දී රැස් කරන සෑම ලකුණකටම රු.1000ක මුදලක් හා බිඳ වැටෙන සෑම කඩුල්ලක් සඳහාම රුපියල් 10,000ක මුදලක් ලබා දීමට Dialog Axiata සමාගම ප්‍රතිඥා ලබා දී ඇත.
පසුගිය වසරේ මහා තරගයෙන් රුපියල් 383,000ක දායකත්වයක් ‘Play for a Cause’ වෙනුවෙන් සටහන් විය. එම ප්‍රදානයන් කොළඹ රාජකීය විදුහලේ විදුහල්පතිතුමන් හා ගල්කිස්ස සාන්ත තෝමස් විදුහලේ විද්‍යාලාධිපතිතුමන්ගේ උපදෙස් අනුව සහාය හා බලගැන්වීම අවශ්‍ය පාසල් සඳහා බෙදා දීම සිදු කෙරිණි.
සංවිධායක කමිටුවේ සම සභාපති රොෂාන් ඇඩම්ස් මහතා අදහස් දක්වමින්,
“රට තුළ පවතින වත්මන් ආර්ථික අර්බුදය හේතුවෙන් Play for a Cause වැඩසටහන පුළුල් කරන ලෙස විද්‍යාල දෙකේ ප්‍රධානීන් රාජකීය-සාන්ත තෝමස් ඒකාබද්ධ තරග සංවිධායක කමිටුවට උපදෙස් ලබා දී තිබෙනවා. එතෙර සිටින රාජකීය-සාන්ත තෝමස් ප්‍රජාවගේ සහාය ඇතිව තවත් අවශ්‍යතා සහිත බොහෝ පාසල් සඳහා හැකි තරම් උදව් කිරීමට අපට අවශ්‍යයි”, යැයි පැවසීය.
ශ්‍රී ලංකාවේ ප්‍රමුඛතම සන්නිවේදන සම්පාදකයා වන Dialog Axiata PLC සමාගම විසින් බලගන්වනු ලබන 143 වැනි ‘නිල් මහා සටනේ දී’ ගල්කිස්ස සාන්ත තෝමස් කණ්ඩායම තුන් ඉරියව් ක්‍රීඩක රයන් ප්‍රනාන්දු විසින් මෙහෙයවන අතර, වමත් දඟපන්දු යවන්නෙකු වන ගිෂාන් බාලසූරිය විසින් රාජකීය විදුහල් කණ්ඩායම මෙහෙයවනු ලබයි.
- 59 වැනි සහෝදරයින්ගේ සටනට අලුත් දිනයක්
- 88 වැනි ‘සාන්තුවරුන්ගේ සටන’ කල් දමයි
- අර්බුද මැද ආසියානු කුසලානය පවත්වන්න SLC සූදානමින්
- Galle Gladiators නායකත්වය කුසල් මෙන්ඩිස්ට
- දකුණු අප්‍රිකාවේ ලෝක කුසලාන බලාපොරොත්තු අනතුරේ?
රාජකීය – සාන්ත තෝමස් ‘නිල් මහා සටන’ වසර 143ක පොහොසත් සහ විචිත්‍රවත් අතීතයක් සහිත තරගයකි. එමෙන්ම මෙය ලොව අඛණ්ඩව පැවැත්වෙන මහා ක්‍රිකට් සංග්‍රාම අතරින් දෙවැනි දීර්ඝතම ඉතිහාසයකට හිමිකම් කියන අතර, එය දෙවැනි වන්නේ ඉන් වසරකට පෙර ආරම්භ කරන ලද ඕස්ට්‍රේලියාවේ ඇඩිලේඩ් හි සාන්ත පීතර විදුහල සහ ඇඩිලේඩ් ඇල්ෆ්‍රඩ් කුමර විදුහල අතර පැවැත්වෙන ක්‍රිකට් තරගයට සහ ඉන් වසර දෙකකට පෙර ආරම්භ කරන ලද ඕස්ට්‍රේලියාව සහ එංගලන්තය අතර පැවැත්වෙන අළුබඳුන තරගාවලියට පමණි.
ක්‍රීඩකයන් පමණක් සහභාගි වූ ‘නිල් මහා සටනේ’ පළමු තරගය 1880 වසරේ දී ගාලු මුවදොර පිටියේ දී පැවැත්විණි. එය මේ වන විට කොළඹ ටාජ් සමුද්‍රා හෝටලය පිහිටි ස්ථානයයි. එය සියවස් තරගාවලියේ ආරම්භය ද සනිටුහන් කරන ලදි. මෙම තරගයට ක්‍රීඩා කිරීම සඳහා කණ්ඩායම් දෙකටම බෝට්ටු යොදාගෙන බේරේ වැව තරණය කිරීමට සිදු වූ බව ද වාර්තා වේ.
රාජකීය – සාන්ත තෝමස් මහා තරගයේ දී බිහි වූ ක්‍රිකට් ක්‍රීඩකයන් අතර පසුකලෙක මේ රට පාලනය කිරීමට වරම් ලැබූවෝ ද වූහ. ජාතියේ පියා යන විරුදාවලිය ලත් මහාමාන්‍ය ඩී. එස්. සේනානායක මැතිතුමන් (1901-1902), ඔහුගේ පුත් දිවංගත ඩඩ්ලි සේනානායක මැතිතුමන් (1927-1929) යන හිටපු අගමැතිවරුන් සාන්ත තෝමස් විදුහල නියෝජනය කරමින් ද, හිටපු අග්‍රාමාත්‍ය ශ්‍රීමත් ජෝන් කොතලාවල මැතිතුමන් (1914-1915) මෙන්ම, ප්‍රථම විධායක ජනාධිපති ජේ. ආර්. ජයවර්ධන මැතිතුමන් (1925) රාජකීය විදුහල නියෝජනය කරමින් අදාළ වසරවල දී මෙම ඓතිහාසික මහා සටනට ක්‍රීඩා කළහ.
මහත් විවාදයකට ලක්වූ 1885 තරගය සමඟින් නිල් මහා සටන් ඉතිහාසයේ මේ දක්වා කණ්ඩායම් දෙකම ජයග්‍රහණ 35 බැගින් වාර්තා කර ඇත. පළමු දිනයේ රාජකීය විදුහල ලකුණු 09කට සියලු දෙනා දැවීගොස්, දෙවැනි දිනයේ ක්‍රීඩා කිරීම ප්‍රතික්ෂේප කිරීමත් සමඟ අදාළ 1885 තරගය තමන් ජය ගත් තරගයක් ලෙසින් සාන්ත තෝමස් විදුහලේ සමරු අතර සටහන් වෙද්දී එය ජය පැරදුමෙන් තොර තරගයක් ලෙස රාජකීය විදුහලේ සමරු සටහන්වල දැක්වේ.
අවසන් වරට නිල් මහා සටනක් ජය ගනිමින් මේ වන විට අදාළ කුසලානය සාන්ත තෝමස් විදුහල සතුව පවතින අතර වර්ෂ 2019 දී සිතාර හපුහින්නගේ නායකත්වයෙන් සුපිරි දස්කම් දක්වමින් සාන්ත තෝමස් කණ්ඩායම හිමි කර ගත් එම කුසලානය තමන් සන්තකයට ගැනීම පිණිස, කොරෝනා වසංගතයෙන් බලපෑමට ලක්වූ තරග දින දර්ශනය තුළ කැපී පෙනෙන ජයග්‍රහණ වාර්තා කළ රාජකීය කණ්ඩායම සැරසී සිටියි. රාජකීය කණ්ඩායම අවසන් වරට නිල් මහා සටනක් ජයගෙන ඇත්තේ ගීශාන්ත් පණ්ඩිතරත්නගේ නායකත්වය යටතේ 2016 වසරේ දී ය.
විශිෂ්ටත්වයේ ඉහළම සම්ප්‍රදායට අනුව පැවැත්වෙන මේ තරගයට දායක වන කණ්ඩායම් දෙකේ සාමාජිකයන් ශතවර්ෂ එකහමාරකට ආසන්න කාලයක් තිස්සේ අන්‍යෝන්‍ය ගෞරවයෙන්, සුහදත්වයෙන්, ක්‍රීඩාශීලීත්වයෙන් මිත්‍රශීලී ප්‍රතිවාදීන් ලෙස පිටිය තුළත් ඉන් පිටතත් දැඩි එකමුතුකමින් යුතුව කටයුතු කරති.
මෙම තරගය පිළිබඳව දශක කිහිපයකට පෙර රාජකීය විදුහලේ හිටපු කීර්තිමත් විදුහල්පතිවරයෙකු අපූරු ප්‍රකාශයක් සිදු කර තිබුණි. ඒ, සාන්ත තෝමස් විදුහල නොමැතිව රාජකීය විද්‍යාලයක් සහ රාජකීය විද්‍යාලය නොමැතිව සාන්ත තෝමස් විදුහලක් පැවතිය නොහැකි බවයි.
Dialog Axiata ජාතික ක්‍රිකට්, වොලිබෝල්, දැල්පන්දු සහ Esports කණ්ඩායම්හි නිල අනුග්‍රාහකයා ලෙස කටයුතු කරයි. ජනාධිපති රන් කුසලාන වොලිබෝල් තරගාවලිය බලගැන්වීමට අමතරව ජාතික කනිෂ්ඨ සහ ජ්‍යේෂ්ඨ දැල්පන්දු තරගාවලි, පාසල් රග්බි, හා යුද හමුදා පැරා ක්‍රීඩා තරගාවලිය, ජාතික පැරා ක්‍රීඩා තරගාවලිය, ලෝක පැරාලිම්පික් තරගාවලියට සහභාගි වන ශ්‍රී ලංකා පැරා කණ්ඩායම බලගැන්වීමට කටයුතු කර ඇත.
ඡායාරූපයේ වමේ සිට දකුණට: කොළඹ රාජකීය විද්‍යාලයේ කණ්ඩායම් නායක ගිෂාන් බාලසූරිය, රාජකීය – සාන්ත තෝමස් ඒකාබද්ධ තරග සංවිධාන කමිටුවේ සම ලේකම් අර්ජුණ වෛද්‍යසේකර, කොළඹ රාජකීය විද්‍යාලයේ විදුහල්පති සනත් ජයලත්, Dialog Enterprise හි සමූහ ප්‍රධාන නිලධාරි නවීන් පීරිස්, ගල්කිස්ස සාන්ත තෝමස් විද්‍යාලයේ විදුහල්පති ගරු මාර්ක් බිලිමෝරියා පියතුමා, රාජකීය – සාන්ත තෝමස් ඒකාබද්ධ තරග සංවිධාන කමිටුවේ සම සභාපති රොෂාන් ඇඩම්, ගල්කිස්ස සාන්ත තෝමස් විද්‍යාලයේ කණ්ඩායම් නායක රයන් ප්‍රනාන්දු.
මාධ්‍ය නිවේදනයක් ඇසුරෙනි.
>> තවත් ක්‍රිකට් පුවත් සඳහා පිවිසෙන්න <<
